ތިން މިނިސްޓްރީއެއްގައި ރޯވެ، މި މަހުގެ 12 ވަނަ ދުވަހު ހިނގި އަލިފާނުގެ ހާދިސާގެ ތަހުގީގަށް އައި ބޭރުގެ ތަޖުރިބާކާރުން ތަހުގީގު ފުރިހަމަ ކުރުމަށް ފަހު ރާއްޖެއިން ފުރައިފިއެވެ.
މި ހާދިސާގައި އޭރުގެ ކޮންސްޓްރަކްޝަން މިނިސްޓްރީ، ހައުސިން މިނިސްޓްރީ އަދި އެންވަޔަރަމަންޓް މިނިސްޓްރީގެ އިތުރުން މާލޭ ސިޓީ ކައުންސިލުގެ ޚިދުމަތްދޭ އިމާރާތަކާއި އެންވަޔަރަމަންޓް ޕްރޮޓެކްޝަން އޭޖެންސީ ހުންނަ އިމާރާތް ވަނީ އަނދައި ހުލިވެފައެވެ.
ދިވެހި ފުލުހުންގެ ޚިދުމަތުން ވެސް މި ހާދިސާގެ ތަހުގީގު ކުރަމުންދާއިރު، އެކަމަށް އެހީތެރިކަން ފޯރުކޮށްދިނުމަށް އިންޑިއާގެ ޓީމެއް ވަނީ މި މަހުގެ 20 ވަނަ ދުވަހު ރާއްޖެ އައިސްފައެވެ.
މީޑިއާތަކަށް ފޮނުވި މެސެޖެއްގައި ފުލުހުން ވުނީ ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާ ކުރުމަށްފަހު މި މަހުގެ 22 ވަނަ ދުވަހު އެ މީހުން ފުރައިގެން ގޮސްފައިވާ ކަމަށެވެ.
ހާދިސާއާ ގުޅޭ ފޮޓޯ، ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައް އެ ޓީމާއި ފުލުހުންގެ ފަރާތުން ހިއްސާކޮށްފައިވާ ކަމަށް ފުލުހުން ވަނީ ބުނެފައެވެ.
މި ހާދިސާގެ އެއްވެސް މައުލޫމާތެއް އެނގޭ ފަރާތްތަކެއް ވާނަމަ ފުލުހުންނާ ހިއްސާކޮށްދިނުމަށް މީގެކުރިން އެ މުއައްސަސާއިން ވަނީ އެދިފައެވެ.
އިމާތް އެއްކޮށް އަނދައި ހުލިވި ނަމަވެސް ރައްޔިތުންނަށް ފޯރުކޮށްދޭ ޚިދުމަތްތައް މެދުކެނޑުމެއް ނެތި ފޯރުކޮށްދިނުމަށްޓަކައި ސަރުކާރުން ވަނީ ދެ ދުވަހުގެ ތެރޭގައި އެ މިނިސްތްރީތަކުގެ މަސައްކަތްތައް ދަރުބާރުގެއަށް ބަދަލުކޮށް ޚިދުމަތް ދޭން ފަށާފައެވެ.