ރައްޔިތުންގެ މަޖިލީހުގައި ހއ. ހޯރަފުށީ ދާއިރާގެ މެމްބަރު އަހުމަދު ރަޝީދު ގެންގުޅުއްވާ ކޮކަޓޫ ގެއްލިގެން ހޯދަމުން ދަނިކޮށް، ގެއެއްގައި ވިއްކަން ބައިންދާފައި އިންދާ ފެނިއްޖެ އެވެ.
އާއްމުކޮށް ރަޝީދުގެ ގޭގެ ބެލްކަނީގައި އިންނަ މިކޮކަޓޫއަކީ، އޭގެ ސަބަބުން އުނދަގޫވާ ކަމަށް ވިދާޅުވެ ތުލުސްދޫ ދާއިރާގެ މެމްބަރު ރޮޒައިނާ އާދަމް ފުލުހުންނަށް މައްސަލަ ހުށަހެޅުއްވި ކޮކޮޓޫ އެވެ. އޭނާ މައްސަލަ ހުށަހެޅުއްވީ އެ ކޮކަޓޫ މާ ބާރަށް ގޮވާތީ އުނދަގޫވާތީ އެވެ.
ރަޝީދު ވިދާޅުވީ މީގެ 16 އަހަރު ކުރިއްސުރެ އޭނާ ގެންގުޅުއްވާ ކޮކަޓޫ ގެއްލިގެން އިއްޔެ ހޯދަން ފަށާފައިވާ ކަމަށާއި އެސޮރު ފެނުނީ ގެއެއްގައި ބައިންދާފައި އިންދާ އިއްޔެ އިރުއޮއްސެން އުޅެނިކޮށް ކަމަށެވެ. ނަމަވެސް ކޮކަޓޫ ގެއްލުމާ ރޮޒައިނާ އާ އެއްވެސް ގުޅުމެއް ނެތް ކަމަށް އޭނާ ވިދާޅުވި އެވެ. ރަޝީދު ވިދާޅުވި ގޮތުގައި "ކޮކަޓޫ ކޮންމެވެސް ބަޔަކު ވަގަށް ނެގީ" އެވެ.
އޭނާ ވިދާޅުވީ، ގޭގެ ދެވަނަ ބުރީގެ ބެލްކަނީގެ، ޗޭނުކޮޅަކުން އައްސާފައި އިންނަ އެ ކޮކަޓޫ ހޯދުނީ، އެކި މީހުން ކައިރީ އަހައިގެން ދޫނި ގެންގުޅުނު ބައެއް ހިސާބުތައް ބަލައިގެން ކަމަށެވެ. އަދި ވަގަށް ނެގި މީހުން ކޮކަޓޫ ވިއްކާލުމަށް ދޫނިވިއްކާ ފިހާރައަކަށް ދިޔަ ކަމަށާއި ނަމަވެސް ފިހާރައިގެ ވެރިފަރާތުން ކޮކަޓޫ ގަތުމަށް ދެކޮޅު ހަދާފައިވާ ކަމަށް ރަޝީދު ވިދާޅުވި އެވެ.
"އެކި މީހުން ކައިރީގައި އަހައިގެން އެ ދޫނި ވިއްކާ ފިހާރައާ ހަމައަށް ދެވުނީ. ދެން އެ މީހުން ގާތު ވެގެން އުޅޭ ގޮތް ކިޔައިދިނުމުން ބުނީ ދޫންޏެއް ވިއްކަން ބަޔަކު އައޭ. އެ މީހުން ކައިރީ އަހައިގެން ދޫނި ގެންދިޔަ ބަޔަކު ހޯދީ،" ރަޝީދު ވިދާޅުވި އެވެ.
އޭނާ ވިދާޅުވީ، ކޮކަޓޫ އިން ގެއަށް ދިޔުމުން އެ ގޭ މީހުން ކޮކަޓޫ ދިނުމަށް ދެކޮޅު ވެސް ހެދި ކަމަށެވެ. އަދި އެ ކޮކަޓޫއަކީ ހެންވޭރުކޮޅުން އެ މީހުން "ހޮވައިގެން" ގެނައި އެއްޗެއް ކަމަށާއި އެ ދޫނި ދޭނީ 10،000ރ. ދިނުމުން ކަމަށް އެ މީހުން ބުނެފައިވާ ކަމަށެވެ. ނަމަވެސް މަސްލަހަތު މާ ގޯސްވުމުން ކޮކަޓޫ ރަޝީދަށް ދިނީ އެވެ.
"ގެއެއްގެ ބެލްކަނީގައި ބަނދެފައި އިން ދޫންޏެއް ކިހިނެތްތޯ ހޮވަން ލިބޭނީ. ކޮންމެވެސް ގޮތަކުން އެ ދޫނި ވަގަށް ނަގާފައި އެ އަޮތީ،" ރަޝީދު ވިދާޅުވި އެވެ.
އޭނާ ވަނީ އެ ކޮކަޓޫ ހޯދައިދިނުމުގައި އެހީތެރިވި މީހުންނަށް އިއްޔެ ހަވީރު ކޮފީ ވެސް ދެއްވައިފަ އެވެ. އެ ކޮފީގައި ކޮކަޓޫ ވެސް ބައިވެރިކުރެއްވި އެވެ.
ހުދުކުލައިގެ އެ ކޮކަޓޫ ކޮންމެ ދުވަހެއްގެ ވެސް 30: 7 ހާއިރު ވަރަށް ބާރަށް ގޮވާ ކަމަށްވެ އެވެ. އަދި މާ ހެނދުނަކާ ބާރަށް ގޮވާތީ، ރޮޒައިނާ އަށް އުނދަގޫވެގެން ފުލުހުންނަށް މައްސަލަ ހުށަހެޅުއްވުމުގެ ކުރިން ރަޝީދު ގާތު އެ ކޮކަޓޫ މަރާލަން އެދިވަޑައިގެންފައިވާ ކަމަށް ރަޝީދު ކުރިން ވަނީ ވިދާޅުވެފަ އެވެ.