ރައީސް ޑރ.މުހައްމަދު ވަހީދު ހަސަން މަނިކުގެ ގައުމީ އިއްތިހާދަށް މަރުވެފައި ތިބި ބައެއްގެ ނަމުގައި ފޯމު ފުރާފައިވާ މައްސަލަ ބެލުމަށް ފުލުހުންނަށް ހުށަހަޅައިފިއެވެ.
ސީއެންއެމަށް އެނގިފައިވާ ގޮތުގައި އިލެކްޝަންސް ކޮމިޝަނުން ފުލުހުންނަށް ހުށަހަޅާފައިވަނީ މަރުވެފައިވާ 11 މީހެއްގެ ނަމުގައި އެޕާޓީއަށް ފޯމު ފުރާ އެކޮމިޝަނަށް ހުށަހަޅާފައިވާ މައްސަލައިގައެވެ. މަރުވެފައިވާ ބައެއްގެ ނަމުގައި ގައުމީ އިއްތިހާދަށް ފޯމު ފުރި މައްސަލައެއް ފެންމަތިވެފައިވަނީ ދައުލަތުގެ ދެއިދާރާއެއްގައި ހުރި މައުލޫމާތު ގައުމީ އިއްތިހާދަށް މެންބަރުން އިތުރު ކުރުމަށް ބޭނުން ކޮށްފައިވާ ކަމަށް ބުނެ އޭސީސީއަށް ހުށަހެޅުނު މައްސަލައަކައި ގުޅިގެން އެކޮމިޝަނުން ހިންގި ތަހުގީގެއްގައެވެ.
އޭސީސީން މައުލޫމާތުދޭ ގޮތުގައި އެޝަކުވާއައި ގުޅިގެން އެކޮމިޝަނުން ހިންގި ތަހުގީގުގައި މައުލޫމާތު ސާފު ކުރަން ބޭނުން ކުރި މީހުންގެ ތެރެއިން 85 އިންސައްތަ މީހުންވަނީ އެޕާޓީއަށް ސޮއި ނުކުރާ ކަމަށް ބުނެފައެވެ.
އޭސީސީއަށް ޝަކުވާ ހުށަހަޅާފައިވަނީ އެންސްޕާއާއި އިމިގްރޭޝަންގައި ހުރި މައުލޫމާތުތައް ބޭނުންކޮށްގެން ގައުމީ އިއްތިހާދަށް މެންބަރުން އިތުރުކޮށްފައިވާ ކަމަށް ބުނެއެވެ.