ސްޕްރީމް ކޯޓުން އިލެކްޝަންސް ކޮމިޝަންގެ މެމްބަރުންގެ މައްޗަށް ކޮށްފައިވާ ހުކުމަކީ ޝަރުއީ ނިޒާމުގެ ބާރުގަދަކުރުމަށް ކޮށްފައިވާ ހުކުމެއް ކަމަށް އެމެރިކާއިން ބުނެފި އެވެ.
އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޖެން ސެކީ އިއްޔެ ނެރުނު ބަޔާނެއްގައި ބުނެފައިވަނީ ސްޕްރީމް ކޯޓުގެ ހުކުމާއި އެމެރިކާއިން ދެކޮޅު ހަދާ ކަމަށެވެ. އަދި ސްޕްރީމް ކޯޓުގެ ހުކުމަކީ ދުވަހަކުވެސް ގަދަ ނުކުރާވަރަށް ޝަރުއީ ދާއިރާގެ ބާރުގަދަކުރުމަށް ކޮށްފައިވާ ހުކުމެއް ކަމަށާއި އަދި އެ އަމަލަކީ ޖުޑީޝަރީގެ އުނދަގުލާއެކު އިންސާފްވެރި އިންތިހާބެއް ބޭއްވުމަށް މަސައްކަތް ކުރަމުންދިޔަ މުއައްސަސާއެއްގެ ބާރުތަކަށް އަރައިގަތުމަށް ކޮށްފައިވާ ހުކުމެއް ކަމަށް ވެސް ބަޔާނުގައި ބުނެ އެވެ.
"އިންތިހާބު ބޭއްވުމުގެ ޒިންމާ އެޅިފައިވާ މެންބަރުން ހަމަހަށް ޖަލަށް ލުމަށްފަހު މާޗް 22 ގައި އިންތިހާބު ބޭއްވުމަށް ސްޕްރީމް ކޯޓުން ހުކުމްކުރުމަކީ ސަރުކާރުން ޑިމޮކްރަސީއަށްދޭ އަހައްމިއްޔަތާމެދު ސުވާލު އުފެދޭ ކަމެއް" ބަޔާނުގައި ބުނެފައިވެ އެވެ.
ކޯޯޓުގެ ހުކުމްތަކާއި އަމުރުތަކަށް ފާޅުގައި ގޮން ޖައްސަވައި އެ ކޯޓުގެ ހުރުމަތް ކެނޑޭ ގޮތަށް އާއްމު ތަންތަނުގައި ވާހަކަ ދައްކަވާފައިވާތީ ސްޕްރީމް ކޯޓުން ކޮމިޝަންގެ ކުރީގެ ރައީސް ފުއާދު ތައުފީގާއި ކުެރީގެ ނައިބު ރައީސް އަހުމަދު ފަޔާޒު ހަސަންގެ މެންބަރު ކަމުގެ ގޮނޑި ގެއްލިއްޖެ ކަމަށް ކަނޑައަޅައި ފުއާދްއަށް ވަނީ ހަމަހުގެ ޖަލު ހުކުމެއްކޮށްފަ އެވެ. އަދި އެ ހުކުމް ތަންފީޒް ކުރުމަށް ނިންމާފައި ވަނީ ތިން އަހަރު ފަހުންނެވެ.
ރައްޔިތުންގެ މަޖިލިސް އިންތިހާބު ފެށެން ދެ ހަފްތާއަށް ވެފައިވަނިކޮށް އިލެކްޝަންސް ކޮމިޝަންގެ މެމްބަރުންގެ މައްޗަށް އިއްވި ހުކުމުގެ ސަބަބުން އިންތިހާބުގެ ތައްޔާރީތަކަށް ގޮންޖެހުންތަކެއް ކުރިމަތި ވެދާނެ ކަމަށް އިންތިހާބް އޮބްޒާވްކުރުމަށް ވަޑައިގެން އުޅުއްވާ ޔޫރަޕިއަން ޔޫނިއަން (އީޔޫ)ގެ ވަފުދުން ވެސް ވަނީ ބުނެފަ އެވެ.