ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ފުލުހުންގެ އިދާރާއަށް ހާޒިރުކޮށްފި އެވެ.
ފުލުހުންގެ އިދާރާއަށް ފަލާހު މިއަދު ހާޒިރުކޮށްފައި މިވަނީ މިމަހުގެ 24 ވަނަ ދުވަހު ރައްޔިތުންގެ މަޖިލިސް އިދާރާ ސަރަހައްދު ފުލުހުން ބަންދުކޮށްފައި ވަނިކޮށް ފުލުހުންގެ ސަފުތައް ފަޅާލާފައިވާ ކަަމަށް ބުނާ މައްސަލާގަ އެވެ.
ފަލާހު ފުލުސް އޮފީހަށް ހާޒިރުކުރީ މިއަދު މެންދުރުފަހު 3:00 އަށެވެ.
ފުލުހަށް ހާޒިރުވުމަށްފަހު ނޫސްވެރިންނާ ބައްދަލުކުރައްވާ ފަލާހު ވިދާޅުވީ އޭނާ ފުލުސް އޮފީހަށް ހާޒިރުކޮށް މައްސަލައިގެ މައުލޫމާތު ހިއްސާކުރުމުން ވަކީލަކު ހަމަޖައްސަން ވަގުތު ދިނުމަށް ފުލުހުންނަށް ދެންނެވުމުން މާދަމާ ހަވީރު 4:00 ޖަހާއިރު ވަކީލަކާއި އެކު ފުލުސް އޮފީހަށް ހާޒިރުވާން އެންގި ކަމަށެވެ. ނަމަވެސް މިދުވަސް ވަރަކީ މިނިވަން ދުވަހުގެ ބަންދު ދުވަސްވަރަށް ވާތީ ގިނަ ވަކީލުން މާލޭގައި ނެތުމުން ވަކީލަކު ހަމަޖައްސަން އިތުރު ފުރުސަތު ދިނުމަށް ފުލުހުންނަށް ދެންނެވި ކަމަށާއި އެކަމަކު އެފުރުސަތު ފުލުހުން ނުދެއްވި ކަމަށްވެސް ވިދާޅުވި އެވެ.