އެފްއޭ ކަޕުގެ ކުއާޓާ ފައިނަލުގެ ފުރަތަމަ މެޗުގައި އެންމެ ފަހުގެ ޗެމްޕިއަން ވީބީ އައްޑޫ އެފްސީއާ ދެކޮޅަށް މާދަމާ ރޭ ނުކުންނައިރު އެންމެ ތަންފުކެއް ވެސް ދޫނުކުރާނެ ކަމަށާއި އެ ޓީމަށް ރަނގަޅު ފައިޓެއް ދޭނެ ކަމަށް އޭވައިއެލްގެ ކޯޗު އަހުމަދު އާތިފް (އާތީ) މިއަދު ބުނެފި އެވެ. އާތީ ބުނީ ފަހަކަށް އައިސް އޭނާގެ ޓީމުގެ ފާފޯމަންސް ވަރަށް ރަނގަޅު ކޮށްފައިވާ ކަމަށާއި އެހެންވެ ޓީމާ މެދު އުއްމީދު އެބައޮތް ކަމަށެވެ. "ލީގުގައި އެންމެ ފަހުން ކުޅުނު މެޗުތަކަށް ބަލާއިރު ޕާފޯމަންސް ވަރަށް ރަނގަޅު. އެހެންވެ ވަރަށް ބޮޑަށް އުއްމީދުކުރެވޭ ވީބީ އަށް ރަނގަޅު ފައިޓެއް ދެވޭނެ ކަމަށް. އެންމެ ތަންފުކެއް ވެސް ދޫނުދީ މޮޅުވާން މަސައްކަތްކުރާނެ. އުއްމީދުކުރަނީ ރަނގަޅު ކުޅުމެއް ދައްކައިގެން މެޗުން މޮޅުވާން،" އާތީ ބުންޏެވެ. އޭނާ ބުނީ ލީގުގެ ޝެޑިއުލާއި އަދި އެފްއޭ ކަޕުގެ ޝެޑިއުލަށް އައި ބަދަލުތަކާއެކު ތައްޔާރުވާން ވަރަށް އުނދަގޫތައް ކުރިމަތިވި ކަމަށެވެ. "ލީގުގައި ވެސް މިދޭތެރެއިން މެދުކެނޑިއްޖެ. އަނެއްކާ އެފްއޭ ކަޕުގެ ޝެޑިއުލަށް ވެސް ބަދަލުތަކެއް އައިސްފި. އޭގެ ސަބަބުން ތައްޔާރީތަކަށް ވަރަށް ބޮޑެތި ދަތިތަކެއް ކުރިމަތިވޭ. ކޮންމެ ފަހަރަކު ޓްރެއިނިން އަށް ވެސް ބަދަލުތަކެއް ގެންނަން ޖެހޭ. ކުޅުންތެރިންގެ ފިޒިކަލް ފިޓްނަސް އަށް ވެސް އަސަރު ކުރޭ. އެކަމަށް ކުރިއަށް އޮތްތަނުގައި ހައްލެއް އަންނާނެ ކަމަށް އުއްމީދުކުރެވޭ،" އާތީ ބުންޏެވެ. ނެހުރޫ ކަޕުގައި ގައުމީ ޓީމު ވާދަކުރާތީ ލީގުގެ ޝެޑިއުލަށް ބަދަލުއައިރު އެފްއޭ ކަޕުގެ މެޗުތައް ލަސްވީ މިނިވަން ދުވަހުގެ ކުޅިވަރުތަކަށް ގަލޮޅު ދަނޑު ބޭނުންކުރާތީ އެވެ. އޭނާ ބުނީ ގައުމީ ސްކޮޑުގައި ހިމެނޭ އެ ޓީމުގެ މިޑްފީލްޑަރު މޫސާ ޔާމީނަށް އަނިޔާވެފައިވާ ކަމަށާއި އެ ނޫން ހުރިހާ ކުޅުންތެރިން ފިޓް ކަމަށެވެ. އޭގެ ތެރޭގައި އެ ޓީމަށް ކުޅޭ ބްރެޒިލް ޕްލޭމޭކަރު އެވަޓަން ސަންތޯސް ވެސް ހިމެނެ އެވެ. ވީބީގެ ކޯޗު ޖޭން ވަންލީ ކުރިން ދިން އިންޓަވިއުއެއްގައި ބުނީ ވީބީ އަށް މި އަހަރުގެ ދިވެހި ލީގު ހޯދުމުގެ ފުރުސަތު ހަނިވެފައިވާތީ، އެ ކްލަބްގެ ވިސްނުން މިހާރު ބޮޑަށް ހުރީ ޗެމްޕިއަން ޓީމަށް އޭއެފްސީ ކަޕުން ޖާގަ ލިބޭ އެފްއޭ ކަޕް ކާމިޔާބުކުރަން ކަމަށެވެ. މި އަހަރުގެ ދިވެހި ލީގުގެ ފުރަތަމަ ބުރުގައި ވީބީ އާއި އޭވައިއެލް ބައްދަލުކުރި މެޗު 1- 1 އިން އެއްވަރުވި ނަމަވެސް، ދެވަނަ ބުރުގައި ވީބީ ވަނީ އޭވައިއެލް އަތުން 6- 1 އިން މޮޅުވެފަ އެވެ. އެކަމަކު ވަންލީ ބުނީ ރަނގަޅު ބިދޭސީ ތިން ކުޅުންތެރިން ގެނެސް، އޭވައިއެލް އިން މިހާރު ވަރަށް ބޮޑުތަން ރަނގަޅުކޮށްފައިވާ ކަމަށެވެ. އަދި އޭވައިއެލް އަށް ވީބީން ވަރަށް ބޮޑު ސަމާލުކަމެއް ދޭނެ ކަމަށެވެ.