ސ. މަރަދޫފޭދޫ ސިއްހީ މަރުކަޒުގެ ހިންގާ އައްޑޫ ޕަބްލިކް ހެލްތު ޔުނިޓަކީ މިހާރު އެއްވެސް ހިދުމަތެއް ދެމުންދާ ތަނެއް ނޫން ކަމަށާއި ހަރަދު ކުޑަކުރުމުގެ ގޮތުންނާ އެކު އެތަނުން ކަރަންޓް ކަނޑާލަން އައްޑޫ ސިޓީ ކައުންސިލުން އެދުމާ ގުޅިގެން މިއަދު ހެނދުނު ސަދަން ޔުޓިލިޓީޒް ލިމިޓެޑް (އެސްޔޫއެލް) އިން އެތަނުގެ ކަރަންޓް ކަނޑާލައިފި އެވެ. މޭޔަރު އަބްދުﷲ ސޯދިގް (ސޯބެ) ސޮއި ކުރައްވައި އެސްޔޫއެލް އަށް ފޮނުއްވި ސިޓީއަކާ ގުޅިގެން ޕަބްލިކް ހެލްތު ޔުނިޓުން ކަރަންޓު ކަނޑާލުމާ ގުޅިގެން ހިދުމަތެއް ނުދެވި، މަސައްކަތް ހުއްޓިފައިވާ ކަމަށް އެތަނުގެ އޮފިޝަލަކު ވިދާޅުވި އެވެ. "ކައުންސިލުން ފޮނުވައިގެން ކަރަންޓް ކަނޑާލުމާ ގުޅިގެން އެއްވެސް ހިދުމަތެއް ނުދެވި މަސައްކަތް މިވަގުތު ހުއްޓިފައި މި ވަނީ،" އޭނާ ވިދާޅުވި އެވެ. "މިހާތަނަށް ކައުންސިލުން މިތަނުގެ ކަރަންޓް ބިލް ދައްކަމުން ގޮސްފައި ވަނީ." އޮފިޝަލް ވިދާޅުވީ އެތަނަކީ އެއްވެސް ހިދުމަތެއް ނުދޭ ތަނެއް ކަމަށް ބުނެ ކަރަންޓް ކަނޑާލި އިރު، ކައުންސިލުން އެތަނުން ކުރާ އެއްވެސް މަސައްކަތެއް ބަލަމުން ނުދާ ކަމަށެވެ. އެހެންވެ އެތަނުން ހިދުމަތެއް ދިނަސް ނުދިނަސް އެނގޭ މީހަކު ކައުންސިލްގައި ނެތް ކަމަށް ވެސް އޮފިޝަލް ވިދާޅުވި އެވެ. "އަނެއްކޮޅުން މިތަނުގައި ހުރި ބައެއް ގޮނޑިތަކާއި ސޯފާ ފަދަ އެއްޗެހި އެކި ފަހަރުމަތިން ކައުންސިލުން ވަނީ ގެންގޮސްފައި. އެއްވެސް ކަމެއް ރަނގަޅު ކުރާކަށް އެމީހުން މަސައްކަތެއް ނުކުރޭ،" އޭނާ ވިދާޅުވި އެވެ. ސޯބެ މިއަދު ވިދާޅުވީ މަރަދޫފޭދޫ ސިއްހީ މަރުކަޒު ހިންގާ އިމާރާތެއް މިހާރު ނުހުންނާނެ ކަމަށެވެ. އަދި އެތަނުގައި އެކަށީގެންވާ ގޮތަކަށް އެއްވެސް ހިދުމަތެއް ދެމުން ނުދާ ކަމަށް ވެސް އޭނާ ވިދާޅުވި އެވެ. "އެނގިފައި އޮތް ގޮތުން ޕަބްލިކް ހެލްތުގެ ދެ މުވައްޒަފަކު ކޮންމެ ދުވަހަކު އެތަނަށް މަސައްކަތަށް އެބަ ނިކުމޭ. އެތަނުގައި ހަމައެކަނި ކުރާ ކަމަކީ ކުދިން ކިރުން ކަމަށް އެނގިފައި ވަނީ. ވެކްސިނެއް ވެސް ނުދެވޭ. އެ ހިދުމަތް ލިބޭނީ މަރަދޫ ސިއްހީ މަރުކަޒުން. އެކަމަކު މިހާރު އުސޫލެއްގެ ގޮތުން އެ މުވައްޒަފުން މަސައްކަތް ކުރަން ޖެހޭނީ މަރަދޫ ސިއްހީ މަރުކަޒުގައި،" ސޯބެ ވިދާޅުވި އެވެ. "އެތަން ބޭނުން ނުކުރުމަށާއި އެތަން ހުސްކޮށް ދިނުމަށް ވެސް އަޅުގަނޑުމެން ވާނެ ހޮސްޕިޓަލަށް ވެސް މީގެ ކުރިން އަންގާފައި. ކަރަންޓް ބިލަށް ވެސް ކޮންމެ މަހަކު އެބަ އަރާ 2،000 އަށް ވުރެ ގިނަ ރުފިޔާ. އެހެންވެ އެތަނަކީ މި ވަގުތު ބޭނުން ނުކުރާ ތަނެއްގެ ގޮތުގައި ކައުންސިލުން ނުދެކޭތީ ކަރަންޓް ކަނޑާލުމަށް އެންގީ." މަރަދޫފޭދޫ ސިއްހީ މަރުކަޒު ހިންގާ އިމާރާތަކީ މީގެ ކުރިން ވެސް އެ ރަށުގެ ސިއްހީ މަރުކަޒު ހިންގަމުން ދަނިކޮށް، ކައުންސިލްގެ ދަށަށް ޕަބްލިކް ހެލްތުގެ ހިދުމަތްތައް މިދިޔަ އަހަރު ބަދަލުވުމާ ގުޅިގެން އައްޑޫގެ ޕަބްލިކް ހެލްތު ޔުނިޓްގެ ގޮތުގައި ހަމަޖެއްސި އިމާރާތެވެ. ނަމަވެސް ފަހުން އަނެއްކާ ވެސް ޕަބްލިކް ހެލްތު ހިދުމަތްތައް ހެލްތު މިނިސްޓްރީގެ ދަށަށް ބަދަލުވުމުން، ކައުންސިލުން ވަނީ ސިއްހީ މަރުކަޒު ހިންގަމުން އަންނަ އިމާރާތުގައި ސިއްހީ ހިދުމަތްދޭ ޕްރައިވެޓް މަރުކަޒެއް ހެދުމަށް ނިންމައި، އެތަން ކުއްޔަށް ދިނުމަށް ވެސް ނިންމައިފަ އެވެ. އަދި ދެ މުވައްޒަފުން މަސައްކަތް ކުރުމަށް ބޮޑު އިމާރާތެއް، ބޮޑު ހަރަދެއްކޮށްގެން ބޭނުންކުރުމުގެ ބަދަލުގައި އެތަނުގައި ދެމުން އަންނަ ހިދުމަތް މަރަދޫފޭދޫ ސޯޝަލް ޑިޕާޓްމަންޓް ހިންގާ އިމާރާތަށް ބަދަލު ކުރަން ނިންމާފައިވާ ކަމަށް ވެސް ކައުންސިލުން ކުރިން ބުނެފައިވެ އެވެ. "އަޅުގަނޑުމެންނަކަށް ގަބޫލެއް ނުކުރެވޭ މަރަދޫފޭދޫ މީހުން ކިރުމަށާއި ވެކްސިން ޖެހުން ފަދަ ކަންކަމަށް މަރަދު އަށް ދާން ޖެހުމަކީ ބޮޑު ތަކުލީފެއް އުފުލަން ޖެހޭ ކަމެއް ކަމަކަށް،" ސޯބެ ވިދާޅުވި އެވެ. "މިހާރު ދެ މުވައްޒަފަކު ނިކުމެ ބޭނުން ކުރާ އިމާރާތް ތަރައްގީކޮށް ސިއްހީ ހިދުމަތް ދޭ ރަނގަޅު ސެންޓަރެއް ގާއިމު ކުރުމުގެ ވިސްނުން އަޅުގަނޑުމެންގެ ހުރީ. އެކަމަކު ބައެއް މީހުން ދެކިފާނެ ކަންނޭނގޭ މަރަދޫފޭދުއަކީ ކޯޓުން ގާނޫނާ ހިލާފަށް ވަކި އަވަށެއް ކަމަށް ނިންމާފައި އޮތުމުން، އެ ރަށުގައި ވެސް ވަކި ސިއްހީ މަރުކަޒެއް ހުންނަން ޖެހޭނެ ކަމަށް. އެކަމަކު އެއީ ރަނގަޅު ވިސްނުމެއް ނޫން."