ފަސޭހަކަމާއެކު ކަރަންޓް ބިލް ދެއްކޭނެ މަގުފަހިކޮށްދިނުމުގެ ގޮތުން، ސްޓެލްކޯއިން މޯބައިލް އެޕެއް ތައާރަފްކޮށްފިއެވެ. ސްޓެލްކޯގައި ބޭއްވި ރަސްމިއްޔާތެއްގައި މި އެޕް ލޯންޗުކޮށްދެއްވީ އެ ކުންފުނީގެ ޗެއާމަން އަހުމަދު އައިމަންއެވެ. މި އެޕްލިކޭޝަން މެދުވެރިކޮށް، ކަރަންޓް ބިލް ފަސޭހައިން ދެއްކުމާއި، ކަރަންޓް ބިލަށް އަރާ އަދަދު ބަލާލެވޭނެ ކަމަށް ސްޓެލްކޯއިން ހާމަކުރެއެވެ. މީގެ އިތުރުން އަލަށް ތައާރަފްކުރި އެޕް މެދުވެރިކޮށް، ޓެރިފްތައް ހުންނަ ވަރާއި، ކުރިއަށް ބިލް އަރާނެ ވަރުވެސް އަންދާޒާކޮށްލެވޭނެ ކަމަށް ސްޓެލްކޯއިން ވަނީ ބުނެފައެވެ. ސްޓެލްކޯގެ ޗެއާމަން އައިމަން ވިދާޅުވީ، އެކުންފުނިން ތައާރަފްކުރި މި އެޕްލިކޭޝަންގެ ސަބަބުން ސްޓެލްކޯއިން ކަރަންޓްގެ ހިދުމަތް ލިބިގަންނަ ކަސްޓަމަރުންނަށް ވަރަށް ބޮޑު ލުޔެއް ލިބިގެންދާނެ ކަަމަށެވެ. ސްޓެލްކޯގެ ޗެއާމަން އިތުރަށް ވިދާޅުވީ ފަހަކަށް އައިސް ސްޓެލްކޯއަށް އަންނަމުންދާ ޒަމާނީ ހެޔޮ ބަދަލުތަކަކީ އެކުންފުނީގެ ބޯޑު މެމްބަރުން ބަލައިގަންނަ ބަދަލުތަކެއް ކަމަށް. އައިމަން ވިދާޅުވީ އެ ބަދަލުތައް އައިސްފައިވަނީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމްގެ އިރުޝާދުގެ ދަށުން އެކުންފުނީގެ ސީއީއޯ އަހްމަދު ޒުހޫރު ކުރައްވާ މަސައްކަތްތަކުގެ ނަތީޖާއެއްގެ ގޮތުން ކަމަށެވެ. މޯބައިލް މެދުވެރިކޮށް ކަރަންޓް ބިލް ދެއްކޭ އެޕްލިކޭޝަން ޕްލޭ ސްޓޯރުންނާއި، އެޕް ސްޓޯރުން ލިބެން ހުންނާނެ ކަަމަށް ސްޓެލްކޯއިން ބުނެއެވެ. މިއީ ހަތް މަސް ދުވަހުގެ މަސައްކަތެއް ކަމަށް ސްޓެލްކޯއިން ވަނީ ބުނެފައެވެ.