"މިހާރު" ނޫހުން އަލަށް ތައާރަފްކުރި ކުޅިވަރު އެވޯޑްސް ކަމަށްވާ "މިހާރު އެވޯޑްސް" ގެ "ސްޕޯޓްސް ސްޓާސް ފިއެސްޓާ" ކުޅިވަރުގެ ތަރިންނާ އެކު ކ. މާފުށީގައި މާދަމާ ހަވީރު އޮންނާނެ އެވެ.
އެވޯޑްސްގެ އިޖްތިމާއީ ޒިންމާގެ ދަށުން ބާއްވާ މި ފިއެސްޓާ އަށް ރާއްޖޭގެ ކުޅިވަރުގެ ތަރިންނާއި ކޯޗުންނާއި އޮފިޝަލުން އަދި އެވޯޑްސް ޕާޓްނަރުންނާ އެކު ސަތޭކައެއްހާ މެހެމާނުން މާފުށްޓަށް ޒިޔާރަތްކުރާނެ އެވެ.
މި ފިއެސްޓާގެ އެންމެ މުހިއްމު ހަރަކާތަކީ މާދަމާ ހަވީރު ބާއްވާ ކުޑަކުދިންގެ ހަވީރެވެ. މި ހަރަކާތުގައި ރާއްޖޭގެ ކުޅިވަރުގެ މަޝްހޫރު ތަރިންނާއި ދިމާވެ، އެ ތަރިންނާ އެކު ފޮޓޯ ނަގާލުމުގެ ފުރުސަތު އޮންނާނެ އެވެ. އަދި ކުޑަކުދިން ގަޔާވާނެ ވަރަށް ގިނަ ހަރަކާތްތަކެއް ކުރިއަށްދާނެ އެވެ.
"އަޅުގަނޑުމެން މިހާރު އެވޯޑްސް އިން ރާއްޖޭގެ ކުޅިވަރު ތަރިން މި ގެނެސްދެނީ މާފުށްޓަށް. ރާއްޖެ އަށް ކުޅިވަރުން ރީތި ނަން ހޯދައިދޭން ރެޔާ ދުވާލު ބުރަކޮށް މަސައްކަތްކުރަމުން އަންނަ މި ތަރިންނާ އެކު، މާފުށީގެ ކުދިބޮޑު އެންމެންނަށް ވެސް ވަރަށް އުފާވެރި ވަގުތުކޮޅެއް ހޭދަކުރެވޭނެ މާދަމާ ހަވީރު،" މިހާރު އެވޯޑްސްގެ އޮފިޝަލަކު ބުންޏެވެ.
މިހާރު އެވޯޑްސް ތައާރަފްކުރުމުގެ ހަފުލާގެ ތެރެއިން: ކުޅިވަރުގެ ތަރިންގެ އިތުރުން ކޯޗުންނާއި އޮފިޝަލުން ވެސް މި ހަރަކާތުގައި ބައިވެރިވާނެ. --ފޮޓޯ: ނިޝާން އަލީ/ މިހާރު
އޭނާ ބުނި ގޮތުގައި ކުޑަކުދިންގެ ހަވީރުގައި ކުދިންނަށް ވަރަށް ކަމުދާނެ، އުފާވެރި، ފޯރިގަދަ ހަރަކާތްތަކެއް އޮންނާނެ އެވެ. އެގޮތުން ތަފާތު ކުޅިވަރުތަކުގައި ބައިވެރިވެ އިނާމް ހޯދުމުގެ ފުރުސަތު ކުދިންނަށް ލިބޭނެ ކަމަށް އޭނާ ބުންޏެވެ.
"މި ފިއެސްޓާ އަށް މާފުށީގެ އެންމެންނަށް ހާއްސަކޮށް ކުޑަކުދިންނަށް ދައުވަތު ދެން،" އޮފިޝަލް ބުންޏެވެ.
މި ފިއެސްޓާގައި ރާއްޖޭގެ މަޝްހޫރު ލަވަކިއުންތެރިއާ އިބްރާހިމް ޒައިދު އަލީ (ކުޑައިއްބެ) ގެ ފޯރިގަދަ ހުށަހެޅުންތަކެއް އޮންނާނެ އެވެ. ފިއެސްޓާގެ އެންމެ ހާއްސަ އެއް ބަޔަކީ މިހާރު އެވޯޑްސްގެ ޕާޓްނަރުންގެ ފަރާތުން މާފުށްޓަށް އެހީތެރިކަން ފޯރުކޮށްދޭނެ އެވެ. އެގޮތުން މާފުށީ ސްކޫލާއި މާފުށީ ޒުވާނުންނަށް ބޭނުންވާ ތަފާތު ހަދިޔާތައް ދޭނެ އެވެ.
މި ހަރަކާތަށް މާފުށީ ކައުންސިލާއި މާފުށީ ސްކޫލުގެ އެހީތެރިކަމާއި އެއްބާރުލުން ވަރަށް ބޮޑަށް ލިބޭއިރު، ހާއްސަކޮށް މާފުށީ ސްކޫލުގެ ޓީޗަރުން އަންނަނީ ވަރަށް ފޯރީގައި ތައްޔާރުވަމުންނެވެ. މެހެމާނުންނަށް މަރުހަބާ ކިއުމަށް ވެސް ވަރަށް ހާއްސަ ހަރަކާތްތަކެއް ސްކޫލުން އަންނަނީ ރާވަމުންނެވެ.
ރާއްޖޭގެ ލޯކަލް ޓޫރިޒަމްގެ މައި ހަބުގެ ގޮތުގައި އޮތް މާފުށްޓަކީ ކުޅިވަރުގައި ވެސް ފާހަގަކޮށްލެވޭ ރަށެކެވެ. އެގޮތުން އެ ރަށުގެ ނިއުސްޓާ ސްޕޯޓްސް ކްލަބުން ވަނީ އެފްއޭ ކަޕް ފުޓްބޯޅަ މުބާރާތުގައި ވާދަކޮށް ނިއު ރޭޑިއަންޓާ ރަނގަޅު ވާދައެއްކޮށްފަ އެވެ. މީގެ އިތުރުން އެ ކްލަބުގެ ތެރެއިން ސަގާފީ ހަރަކާތްތަކާއި ޒަމާނީ މިއުޒިކުގެ ހަރަކާތްތައް ވެސް ކުރިއަށްގެންދެ އެވެ. އެ ރަށު ސްކޫލް ޓީމް ވެސް ތަފާތު ކުޅިވަރުގައި ފާހަގަކޮށްލެވެ އެވެ.
- އިންޑިވިޖުއަލް ކުޅިވަރުތަކެއް ހިމަނައިގެން ތައާރަފްކުރި ފުރަތަމަ އެވޯޑް
މިހާރު އެވޯޑްސްގައި ފުޓްބޯޅައިގެ އިތުރުން ހިމެނެނީ ވޮލީބޯޅަ އަދި އިންޑިވިޖުއަލް ކުޅިވަރުތައް ކަމަށްވާ އެތުލެޓިކްސް އާއި ޓޭބަލް ޓެނިހާއި ފެތުން އަދި ބެޑްމިންޓަނެވެ. މިއީ ރާއްޖޭގައި، އިންޑިވިޖުއަލް ކުޅިވަރުތަކެއް ހިމަނައިގެން އެވޯޑެއް ތައާރަފްކުރި ފުރަތަމަ ފަހަރެވެ.
މުޅިން އަލަށް މި ފަށާ "މިހާރު އެވޯޑްސް"ގައި ދިވެހި ހުނަރުވެރިންނަށް 24 އެވޯޑެއް މި އަހަރު ދޭނެ އެވެ. އޭގެ ތެރޭގައި ފުޓްބޯޅައިގެ އެންމެ މޮޅު ތިން ކުޅުންތެރިންނާއި ޒުވާން ކުޅުންތެރިޔާ އާއި ރަން ބޫޓް ހިމެނެ އެވެ. މީގެ އިތުރުން ވޮލީބޯޅައިން ދެ ޖިންސުން އެންމެ މޮޅު ތިން ކުޅުންތެރިންނާއި ދެ ޖިންސުން އެންމެ މޮޅު ޒުވާން ކުޅުންތެރިޔާ ހޮވާނެ އެވެ. އަދި ބެޑްމިންޓަނާއި އެތުލެޓިކްސް އާއި ޓޭބަލް ޓެނިސް އަދި ފެތުން އެއްކޮށްގެން ދެ ޖިންސުން އެންމެ މޮޅު ތިން ކުޅުންތެރިން ހޮވައި އިނާމް ދޭނެ އެވެ. ކޯޗުންނާއި ރެފްރީގެ އެވޯޑް ދެނީ ހުރިހާ ކުޅިވަރެއް އެއްކޮށެވެ.
އެވޯޑްސްގެ މެއިން ސްޕޮންސަރުންނަކީ އުރީދޫ މޯލްޑިވްސް އާއި އެލައިޑް އިންޝުއަރެންސް އެވެ. އެވޯޑުގެ މީޑިއާ ޕާޓްނަރަކީ ރާއްޖޭގެ އެންމެ ބޮޑު އެއް މީޑިއާ ކަމަށްވާ ވީމީޑިއާ އެވެ. އެވޯޑް ފަރުމާކޮށްދީ އަދި ބްރޭންޑްކޮށްދީ މީގެ އިތުރުން ވެސް އެވޯޑާ ގުޅޭ މާކެޓިންގެ ގިނަ މަސައްކަތްތަކެއްކޮށްދެނީ އެޑްވަޓައިޒިން ޕާޓްނަރު ތިންކް އެޑްވަޓައިޒިން އިންނެވެ. އެސޯސިއޭޓް ޕާޓްނަރުންނަކީ ސޮނީ ސްޕޯޓްސް، ޓޯޓަލް ފިޓްނަސް ގްރޫޕް (ޓީއެފްޖީ)، ވެލިގާ ހާޑްވެއާ، ބީއެޗްއެމް އަދި ޕްރިންޓް ލެބެވެ.