އެއްވެސް ގައުމަކަށް ހައްޖު ކޯޓާ އިތުރުކުރެވޭ ހާލަތެއް މެދުވެރިވެއްޖެ ނަމަ ރާއްޖެއަށްވެސް އެފުރުސަތު ލިބިގެންދާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގައި އައްޑޫ މީދޫ ދާއިރާގެ މެމްބަރު، އަބްދުއްރަހްމާން ވަނީ "ގުރުއަތުން ނުވަތަ ހަދިޔާއަކަށް މުއައްސަސާއަކުން ނުވަތަ ކުންފުންޏަކުން ހައްޖު ލިބޭ މީހާއަށް ހަމަ އެއަހަރު ހައްޖަށް ދެވޭތަން ފެނޭ ކަމަށާއި އެގޮތަށް އިސްކަން ދީގެން ބަލި މީހުން ނޫނީ ދެމަފިރިންނަށް އެއްކޮށް ހައްޖަށް ދެވޭ ގޮތް ނެހެދެނީ ކީއްވެތޯ"ސުވާލުކުރައްވާފައެވެ.
މި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، ހައްޖަށް ދިޔުމަށް ދެމަފިރިން އެއްކޮށް ފައިސާ ދައްކާފައިވާނަމަ، ދެމަފިރިންނަށް އެއްކޮށް ހައްޖުވުމުގެ ފުރުސަތު ފަހިކޮށްދިނުމަށް ހައްޖުކޯޕަރޭޝަނުން އަބަދުވެސް މަސައްކަތް ކުރައްވާ ކަމަށެވެ.
މިނިސްޓަރ އިތުރަށް ވިދާޅުވީ، ކުންފުނިތަކަށް ހައްޖު ކޯޓާ ދިނުމަކީ ރާއްޖޭގައި ވަރަށްކުރީއްސުރެ ހިނގަމުން އަންނަ ކަންކަން ކަމަށާއި، އެހެން ނަމަވެސް މި ސަރުކާރުން މިހާރު އެޅިފައިވާ ހަރުދަނާ ފިޔަވަޅުތަކާއެކު ކުންފުނިތަކަށް ކޯޓާދިނުން ވަރަށް ބޮޑަށް މަދުކުރެވިފައިވާ ކަމަށެވެ.
މިނިސްޓަރ ވިދާޅުވީ، ކިޔުގައި އެހާ ގިނައަދަދެއްގެ މީހުން ތިއްބައި ކުންފުނިތަކަށް ހައްޖު ޖާގަ ދިނުމަކީ އެއީ އެހާ އިންސާފުވެރިގޮތެއް ކަމަށް ގަބޫލު ނުކުރައްވާ ކަމަށެވެ. އެހެންނަމަވެސް އެމީހުންވެސް ފައިސާ ދައްކާފައި ކިޔުއަށް އަރާގޮތުގެ މަތިން އެޖާގަވެސް ތަނަވަސްކޮށްދެވިދާނެ ކަމަށް މިނިސްޓަރ ވިދާޅުވި އެވެ.