ގައުމުގެ ކަންކަން ނިންމުމުގައި އާންމު ރައްޔިތުންގެ ބައިވެރިވުމަކީ ހަމައެކަނި ވޯޓުލުމެއް ނޫނެވެ. ރައްޔިތުންގެ މަޖިލީހުގެ ޕެޓިޝަން ނިޒާމަކީ، އިންތިހާބުތަކުގެ މެދުތެރެއިން ވެސް، ގައުމީ ސިޔާސަތުތަކަށް ބަސް ބުނުމަށާއި، ކަންބޮޑުވާ މައްސަލަތަކަށް ހައްލު ހޯދުމަށް ރައްޔިތުންނަށް ލިބިފައި އޮތް ވަރުގަދަ ބާރެވެ.
ދައުލަތުގެ ތިން ބާރު މިހާރު އެއް ބާރަކަށްވެ، ހިންގުމުގެ ނިޒާމު ބޮއްސުންލައި، ހައްގުތައް ސޮއްސާލައި، މުދަލުގެ އަގު އުފުލި، ވައްކަމާއި ހިޔާނާތަކީ ވާޖިބެއްގެ ގޮތުގައި ވެރިންނަށް ގަބޫލު ކުރެވޭ ދަރަޖައަށް ކަންކަން ގޯސްވެ، އަދުލް އިންސާފު ވެއްޔާ މޮޑެވުމުން ރައްޔިތުންގެ އަޑު އިއްވަން ހުރި ހުރިހާ ގޮތެއް ހޯދަންޖެހެ އެވެ. ނޫނީ ވެރިން ޒިންމާދާރުކޮށް ޖަވާބުދަރީކުރުވުމުގެ ފުރުސަތާއި ދޮރުތައް ދާނީ ގެއްލެމުންނެވެ. އެއާއެކު ވަރުގަދަ ވާނީ އަނިޔާވެރިކަމާއި ދާނީ ހުދުމުހުތާރު ވެރިކަމެކެވެ.
މި ފާހަގަ ކުރި އެއްވެސް ކަމެއް މިހާރު އިހުސާސް އެބަ ކުރެވެ ހެއްޔެވެ؟ ކުރެވޭ ނަމަ އެ ކަންބޮޑުވުން ހިފައިންގެ ރައްޔިތުންގެ ދަރުބާރަށް ދިޔުމުގެ ފުރުސަތު ރައްޔިތުންގެ މަޖިލީހުން ފަހިކޮށްދީފި އެވެ.
އީ-ޕެޓިޝަންގެ މި މަސައްކަތަކީ، އަންހެނުންނާއި، ޒުވާނުން އަދި މަދަނީ ޖަމްއިއްޔާތަކާ އެކު ކުރެވުނު މަޝްވަރާތަކަކަށް ފަހު، 2023 ވަނަ އަހަރު ޔޫއެންޑީޕީ އާއި ރައްޔިތުންގެ މަޖިލީހުން އެކުލަވައިލި ސިޔާސަތު ކަރުދާހެއްގެ މައްޗަށް ބިނާކޮށް ކުރިއަށްގެންގޮސްފައިވާ މަސައްކަތެކެވެ.
މިއީ ސީދާ ރައްޔިތުންގެ އަޑު، ގާނޫނު ހަދާ މަޖިލީހުގެ މޭޒުތަކާ ހަމައަށް ފޯރުކޮށްދޭ ރަސްމީ މަގެވެ.
ޕެޓިޝަނަކީ ރައްޔިތުންގެ މެދުގައި އޮތް ހިޔާލެއް، ކަންބޮޑުވުމެއް ނުވަތަ އިސްލާހެއް، ވަކި އަދަދެއްގެ މީހުންގެ ސޮޔާއެކު ރަސްމީކޮށް މަޖިލީހަށް ހުށަހެޅުމެވެ. މިއީ ދައުލަތުގެ ސަމާލުކަމަށް ކަމެއް ގެނައުމަށް އޮތް އެންމެ ހާމަކަން ބޮޑު ވަސީލަތެވެ. އަދި އެންމެ ފަސޭހަ މަގެވެ.
މީގެ ކުރިން ވެސް ކަރުދާސް ޕެޓިޝަން ސީދާ މަޖިލީހުގެ އިދާރާއަށް ހުށަހެޅެ އެވެ. ނަމަވެސް ރައްޔިތުންގެ މަޖިލީހުގެ ވެބްސައިޓު މެދުވެރިކޮށް އީ-ޕެޓިޝަން ހުށަހެޅޭ ގޮތް މިހާރު ވަނީ ތައާރަފުކޮށްފަ އެވެ. އީ ޕެޓިޝަން ހުށަހަޅަން ޖެހެނީ އީފާސް މެދުވެރިކޮށް ރައްޔިތުންގެ ރުހުން ހޯދައިގެންނެވެ.
ޕެޓިޝަން މަޖިލީހަށް ބަލައި ގަންނާނީ މަޖިލީހުގެ ގަވާއިދު 257 ގެ އެކެއްގައި ބަޔާކޮށްފައިވާ ޝަރުތުތައް ހަމަވާނަމަ އެވެ. ތިރީގައި މި ވަނީ މި މާއްދާގައި ބަޔާންކޮށްފައިވާ ޝަރުތުތައް ފަސޭހައިން ދޭހަކޮށް ދިނުމަށް ހުލާސާއެކެވެ. ޕެޓިޝަން ހުށަހެޅުމުގެ ކުރިން މި މާއްދާ ރަނގަޅަށް ކިޔާށެވެ.
މަޖިލީހަށް ހުށަހެޅޭ ޕެޓިޝަންތައް ބެހިގެންވަނީ ތިން ދަރަޖައަކަށެވެ. އެއީ؛
މި އުސޫލުތަކަށް ބަލާއިރު މަޖިލީހުގައި ޕެޓިޝަނެއް ކުރިއަށް ގެންދެވޭނެ ގޮތަކަށް އޮތީ 500 މީހުންގެ ސޮއި ހޯދައި އެ ޕެޓިޝަން ހުށަހަޅަން މެންބަރަކު ހޯދުމެވެ. ނަމަވެސް އެންމެ މަދުވެގެން އާބާދީގެ 0.2 ޕަސެންޓު މީހުންގެ ސޮއި ހޯދައިފި ނަމަ އެ މައްސަލައެއް މަޖިލީހުގައި ކުރިއަށް ގެންދާނެ އެވެ.
ރައްޔިތުންގެ މަޖިލީހުގެ ޗެމްބަރު
ސްޕޮންސާޑް ނުވަތަ އާންމު ޕެޓިޝަނެއް ނަމަ އެ ޕެޓިޝަން ސަރުކާރުގެ ސަމާލުކަމަށް ގެނެސް، ކަމާގުޅޭ ވުޒާރާއަކަށް ފޮނުވައިގެން ޖަވާބު ހޯދައި، ކޮމިޓީން އެ ޕެޓިޝަނާމެދު ނިންމާގޮތް ޕެޓިޝަން ހުށަހެޅި ފަރާތަށް ހިއްސާކުރާނެ އެވެ.
ހާއްސަ ޕެޓިޝަނެއް ނަމަ ސަރުކާރުގެ ސަމާލުކަމަށް ގެނައުމުގެ އިތުރުން މަޖިލީހުގެ ތަޅުމުގައި ބަހުސްކުރުމަށް އެ ޕެޓިޝަން މަޖިލީހަށް ފޮނުވައި، އެންމެ އަވަހަށް ބާއްވާ 3 ޖަލްސާގެ ތެރެއިން ޖަލްސާއެއްގައި އެޖެންޑާކޮށް، ބަހުސްކުރާނެއެވެ.
އާންމު ޕެޓިޝަނެއް ނަމަ ރަސްމީ ބަންދު ނޫން 2 ދުވަހުގެ ތެރޭގައި ކޮމިޓީން އެ ޕެޓިޝަން ސަރުކާރުގެ ސަމާލުކަމަށް ގެނެސް، ރަސްމީ ބަންދު ދުވަސްތައް ހިމެނޭހެން ގިނަވެގެން 21 ދުވަހުގެ ތެރޭގައި ސަރުކާރުން ދެކޭގޮތް މަޖިލީހަށް ފޮނުވުމުން، ކޮމިޓީން ސަރުކާރުގެ ޖަވާބު ދިރާސާކުރުމަށްފަހު ޕެޓިޝަން ހުށަހެޅި ފަރާތާ ކޮމިޓީގެ ނިންމުން ހިއްސާކުރަންވޭނެ އެވެ.
ހާއްސަ ޕެޓިޝަން ރަސްމީ ބަންދުނޫން 2 ދުވަހުގެ ތެރޭގައި ކޮމިޓީން އެ ޕެޓިޝަން ސަރުކާރުގެ ސަމާލުކަމަށް ގެނެސް، ރަސްމީ ބަންދު ދުވަސްތައް ހިމެނޭހެން ގިނަވެގެން 30 ދުވަހުގެ ތެރޭގައި ސަރުކާރުން ދެކޭގޮތް އަދި ހައްލު ގެނައުމަށް ސަރުކާރުން އަޅާނެ ފިޔަވަޅުތައް މަޖިލީހަށް އަންގާނެއެވެ. އަދި، ކޮމިޓީން ސަރުކާރުގެ ޖަވާބު ދިރާސާކުރުމަށްފަހު ޕެޓިޝަން ހުށަހެޅި ފަރާތާ ކޮމިޓީގެ ނިންމުން ޙިއްޞާކުރާނެއެވެ.
ސްޕޮންސަރޑް ޕެޓިޝަންއަށް ޖަވާބު ދިނުމަށް ވަކި މުއްދަތެއް ނެތް ބަޔާންކޮށްފައި ނެތެވެ.
ޕެޓިޝަނަކީ ރައްޔިތުންގެ އިހުސާސްތަކާއި، ގައުމަށް ބޭނުންވާ ބަދަލުތައް ގާނޫނު ހަދާ މަޖިލީހާ ހަމައަށް ފޯރުކޮށްދޭ ރަސްމީ ބްރިޖެވެ. ޓެކްނޮލޮޖީގެ އެހީގައި، މިއަދު ކޮންމެ ދިވެހި ރައްޔިތަކަށްވެސް ގޭގައި އިނދެގެން ގައުމީ މަސައްކަތުގައި ބައިވެރިވެވިދާނެއެވެ. ވެރިންނަށް ރައްޔިތުންގެ ބާރު ދައްކަން މިއީ ރަނގަޅު ފުރުސަތެކެވެ. ބޭނުން ހިފާށެވެ.