މިނިސްޓަރު ފާހަގަކުރެއްވި ގޮތުގައި މީގެ ކުރިން ރާއްޖޭގައި ކަން ހިނގަމުން އައި ގޮތަށް ބަލާއިރު، ސިޔާސީ ބޭނުންތަކަށް ނުވަތަ އިންތިހާބުތަކާ ދިމާކޮށް ބޮޑެތި ކުށްވެރިން ދޫކޮށްލުމުގެ ސަގާފަތެއް އޮތެވެ. އެގޮތުން 25 އަހަރުގެ ޖަލު ހުކުމް ތަންފީޒުކުރަމުންދާ ޑްރަގު ވިޔަފާރިވެރިން ވެސް މީގެ ކުރިން އެކި ނަންނަމުގައި މިނިވަންކޮށްފައި އެބަހުއްޓެވެ. ނަމަވެސް މި ސަރުކާރުން މިކަމަށް ނިމުމެއް ގެނެސް، މަސްތުވާތަކެތީގެ ވިޔަފާރިކުރާ މީހުންނަށް އަދަބު ލިބިދިނުމުގައި ހަރުކަށި ސިޔާސަތެއް ގެންގުޅުއްވާނެ ކަމަށް އިހުސާން ވިދާޅުވިއެވެ.
މައާފު ނުދިނުމުގެ އިތުރުން، މަސްތުވާތަކެތީގެ ވިޔަފާރިކުރާ “ބޮޑުން” މިހާރު ދެނެގަނެވިފައިވާ ކަމަށާއި އެމީހުން ޝަރީއަތުގެ ކުރިމައްޗަށް ހާޒިރުކުރައްވާނެ ކަމަށް ވެސް މިނިސްޓަރު ވިދާޅުވިއެވެ. އަދި މިފަދަ ވިޔަފާރިތަކުން ހޯދާ މުދަލާއި ފައިސާ، އެއީ ހަލާލު ގޮތުގައި ހޯދި އެއްޗެއްކަން ސާބިތުކޮށްނުދެވޭ ހާލަތްތަކުގައި ދައުލަތަށް ނެގުމުގެ ބާރު ވެސް މިހާރު ގާނޫނީ ގޮތުން ލިބިފައިވާކަން މިނިސްޓަރު ފާހަގަކުރެއްވިއެވެ.