އާޓިފިޝަލް އިންޓެލިޖެންސް (އޭއައި) ގެ ދާއިރާގައި އަލަށް އުފެދޭ ކުންފުނިތަކުގެ ތެރެއިން ވަކި ވިޔަފާރި މޮޑެލްތަކަކަށް ބިނާވެފައިވާ ކުންފުނިތައް ކުރިއަށް އޮތް ތަނުގައި ނެތިދާނެ ކަމަށް ގޫގުލްގެ އިސްވެރިއަކު އިންޒާރު ދެއްވައިފިއެވެ. ގޫގުލްގެ ގްލޯބަލް ސްޓާޓްއަޕް އޮގަނައިޒޭޝަންގެ ވެރިޔާ ޑަރެން މައުރީ ވިދާޅުވީ، އެހެން ކުންފުނިތަކުން އުފައްދާފައިވާ އޭއައި މޮޑެލްތައް ބޭނުންކޮށްގެން ހަމައެކަނި މޫނުމަތީގެ ލޭޔަރެއް އިތުރުކޮށްގެން ހިންގާ "އެލްއެލްއެމް ރެޕާ" ތަކާއި، އެކި މޮޑެލްތައް އެއްތަނަކުން ލިބޭގޮތް ހަދާ "އޭއައި އެގްރިގޭޓާ" ތަކަށް އޮތް ފުރުސަތު ހަނިވަމުންދާ ކަމަށެވެ. https://sun.mv/218205 "އެލްއެލްއެމް ރެޕާ" ތަކާ ގުޅޭގޮތުން ވާހަކަ ދައްކަވަމުން މައުރީ ވިދާޅުވީ، އޯޕަން އޭއައިގެ ޖީޕީޓީ ނުވަތަ ގޫގުލްގެ ޖެމިނައި ފަދަ ވަރުގަދަ މޮޑެލްތަކުގެ މައްޗަށް ބަރޯސާވެ، އަމިއްލަ އެއްވެސް އުފެއްދުންތެރިކަމެއް ނެތް ކުންފުނިތަކަށް މި ސިނާއަތުގައި ދެން މާ ބޮޑު ޝައުގުވެރިކަމެއް ނެތް ކަމަށެވެ. އޭނާ ފާހަގަކުރެއްވި ގޮތުގައި ވަކި ޚާއްޞަ ދާއިރާއަކަށް އަމާޒުކޮށްގެން ވަރުގަދަ ބިންގަލެއް ނާޅާ ކުންފުނިތަކަކީ ދެމެހެއްޓެނިވި ވިޔަފާރިތަކަކަށް ނުވާނެއެވެ. ނަމަވެސް 'ކާސާ' ނުވަތަ 'ހާވީ އޭއައި' ފަދަ ވަކި ދާއިރާއަކަށް ޚާއްޞަވެގެން މަސައްކަތްކުރާ ކުންފުނިތަކަށް ކުރިއެރުން އެބައޮތް ކަމަށް އޭނާ ވިދާޅުވިއެވެ. އޭއައި އެގްރިގޭޓާ ވިޔަފާރިތަކަށް ވެސް މައުރީ ދެއްވީ ހަރުކަށި އިންޒާރެކެވެ. އޭނާ ވިދާޅުވީ ތަފާތު އޭއައި މޮޑެލްތައް އެއްކޮށްލައިގެން ޚިދުމަތް ދިނުމުގެ ވިޔަފާރީގެ ތެރެއަށް އަލަށް ވަންނަ މީހުން ދުރުވާންޖެހޭ ކަމަށެވެ. މީގެ ސަބަބެއްގެ ގޮތުގައި އޭނާ ދެއްކެވީ މޮޑެލްތައް އުފައްދާ ބޮޑެތި ކުންފުނިތަކުން އަމިއްލައަށް އެފަދަ ފީޗާތައް ތައާރަފްކުރަން ފެށުމުން، މެދުވެރިއެއްގެ ގޮތުގައި ތިބޭ ކުންފުނިތައް މާކެޓުން ބޭރުވެގެން ދިއުމުގެ ފުރުސަތު ބޮޑުވުމެވެ. މި ހާލަތަކީ 2000 ގެ އަހަރުތަކުގެ ފަހުކޮޅު ކްލައުޑް ކޮމްޕިއުޓިން ތައާރަފްވި ދުވަސްވަރު އެމެޒޯންގެ އޭޑަބްލިއުއެސް ފަދަ ޚިދުމަތްތައް އަލުން ވިއްކި ކުންފުނިތަކަށް ދިމާވި ފަދަ ހާލަތެއް ކަމަށް މައުރީ ސިފަކުރެއްވިއެވެ. އޭރުވެސް އެމެޒޯން އަމިއްލައަށް ވަރުގަދަ ޓޫލްތައް އުފެއްދުމުން، ހަމައެކަނި މެދުވެރިއެއްގެ ގޮތުގައި މަސައްކަތްކުރި ކުންފުނިތައް ނެތިގޮސް، ސަލާމަތްވީ ސަލާމަތީ ކަންކަމާއި އެހެނިހެން ޚިދުމަތްތައް ދިން ކުންފުނިތައް އެކަނި ކަމަށް އޭނާ ވިދާޅުވިއެވެ. އޭއައިގެ ދާއިރާގައި ކުރިމަގު އޮތް ގޮތާ ބެހޭގޮތުން ވާހަކަ ދައްކަވަމުން އޭނާ ވިދާޅުވީ، ކޯޑު ކުރުމަށް އެހީތެރިވާ ޕްލެޓްފޯމްތަކާއި އާންމު ކަސްޓަމަރުންނަށް ސީދާ ޚިދުމަތްދޭ އޭއައި ވަސީލަތްތަކަށް ބޮޑު ކުރިއެރުމެއް ފެންނަމުންދާ ކަމަށެވެ. މީގެ އިތުރުން ބަޔޯޓެކްނޮލޮޖީ އާއި މޫސުމީ ބަދަލުތަކާ ގުޅޭ ޓެކްނޮލޮޖީގެ ދާއިރާއަކީ ވެސް މިހާރު ލިބެން ހުރި ގިނަ އަދަދެއްގެ ޑޭޓާ ބޭނުންކޮށްގެން ބޮޑެތި އުފެއްދުންތަކެއް ނެރެވޭނެ ދާއިރާތަކެއް ކަމަށް އޭނާ ފާހަގަކުރެއްވިއެވެ.