މ.މުލަކު ޕޮލިސް ސްޓޭޝަނުން ޕޮލިސް ރިޕޯޓު ދޫކުރަންފަށައިފިއެވެ.
ފުލުހުން ބުނެފައިވަނީ މިއީ ޒުވާނުން ވަޒީފާގެ ފުރުސަތުތައް ހޯދައިދިނުމަށް ކުރަމުންދާ މަސައްކަތުގައި އެހީތެރިކަން ފޯރުކޮށްދީ ވަޒީފާގެ ކަންކަމަށް އަހުލުވެރިކޮށް ވަޒީފާއަށް ކުރިމަތިލުމަށް ބޭނުންވާ ކަންކަމަށް ފަސޭހަ މާޙައުލެއް ޤާއިމް ކޮށްދިނުމަށް ފުލުހުން ކުރަމުންދާ މަސައްކަތްތަކުގެ ތެރެއިން ފަހިކޮށްދޭ ޚިދުމަތެއް ކަމަށެވެ.
މި ޖުލައި މަހުގެ 26 ވަނަ ދުވަހުން ފެށިގެން މ.މުލަކު ޕޮލިސް ސްޓޭޝަނުން ޕޮލިސް ރިޕޯޓު ދޫކުރަން ފަށާފައިވާއިރު މި ޚިދުމަތަކީ ފުލުހުންގެ ޚިދުމަތް ތަރައްޤީކޮށް ފުލުހުންގެ ޚިދުމަތް ރައްޔިތުންނާ ވީހާވެސް ގާތުންދިނުމަށް ކުރަމުންދާ މަސައްކަތްތަކުގެ ތެރެއިން ލިބިދެވޭ ޚިދުމަތެއް ކަމަށްވެސް ފުލުހުން ބުނެއެވެ.
ޕޮލިސް ރިޕޯޓު ދޫކުރުމަށް ފަށާފައި ވަނީ މ.މުލަކު ޕޮލިސް ސްޓޭޝަނަށް 5 އަހަރު ފުރުމާ ދިމާކޮށް ބޭއްވި ކުޑަކުދިންގެ ހަވީރުގެ ތެރެއިންނެވެ.
ޖުލައި 26 ވަނަ ދުވަހުގެ ހަވީރު ޕޮލިސް ރިޕޯޓު ރަސްމީކޮށް ދޫކުރުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވީ މުލަކު ކައުންސިލްގެ ރައީސް މުހައްމަދު އިބްރާހިމް އާއި ސެންޓްރަލް ޕޮލިސް ޑިވިޝަންގެ ކޮމާންޑަރ އިންސްޕެކްޓަރ އޮފް ޕޮލިސް އަބްދުﷲ ނަސީރު އެވެ
މި ރަސްމިއްޔާތުގައި ވާހަކަފުޅު ދައްކަވަމުން އިންސްޕެކްޓަރ އޮފް ޕޮލިސް އަބްދުﷲ ނަސީރު ވިދާޅުވީ މިއީ ރައްޔިތުން ވަރަށް ބޭނުންވެފައި އޮތް ޚިދުމަތެއް ކަމަށާއި އަވަހަށް ޕޮލިސް ރިޕޯޓް ލިބުމުގެ ފަސޭހަކަން ލިބިގެން ދިއުމަކީ ރައްޔިތުންނާ ފުލުހުންނާ ދެމެދު އޮންނަ ގުޅުން އިތުރަށް ހަރުދަނާވެގެންދާނެ ކަމެއް ކަމަށެވެ. އަދި ޕޮލިސް ރިޕޯޓް ފަދަ މުހިއްމު ޚިދުމަތެއް އެކަމަށް ބޭނުންވެލައްވާފައިވާ ފަރާތްތަކަށް ރަށުގައިތިބެ ލިބިގެން ދިއުމަކީ މިކަމަށް ރައްތިޔުން ކުރަންޖެހޭ ހޭދަ އެތައް ގުނައަކަށް ކުޑަވެގެން ދާނެކަމެއްކަމުގައި ވިދާޅުވިއެވެ.
ޕޮލިސް ރިޕޯޓްތައް މާލޭގެ އިތުރުން ރާއްޖޭގެ ޕޮލިސް ޑިވިޜަންތަކުގައި ހިމެނޭ އެކި ޕޮލިސް ސްޓޭޝަންތަކުން ދޫކުރަމުންދާނެ ކަމަށް ފުލުހުން ބުނެއެވެ.
މިއީ ޚިދުމަތުގެ ފެންވަރު މަތިކުރުމަށްޓަކައި ބިނާކުރަނިވި ގޮތްތައް ބޭނުން ކުރުމާއި ޓެކްނޮލޮޖީ އާއި ވަޞީލަތުގެ ފުރިހަމަ ބޭނުން ހިފުމަށް ފުލުހުންގެ ބިޒްނަސްޕްލޭންގައިވާ ލަނޑުދަނޑިއަށް ވާޞިލްވުމަށް ކުރެވޭ މަސައްކަތުގެ ތެރޭގައި ހިމެނޭ ކަމެއް ކަމަށް ވެސް ފުލުހުން ބުނެއެވެ.