ރ.އަތޮޅު އަލިފުށީގައި ކަރަންޓު ކެނޑޭ މައްސަލަ ބޮޑުވެ އެންމެ ފަހުން ރައްޔިތުން އެރަށު އިންޖީނުގޭ ދޮށަށް އެއްވެއްޖެއެވެ. އަލިފުށީ ރައްޔިތުން އިންޖީނުގޭ ދޮށަށް އެއްވެ އިހުތިޖާޖު ކުރަން ފަށާފައިވަނީ މިރޭ 8:30 އެހާކަށްހާއިރުއެވެ.
އެރަށުން މައުލޫމާތުދޭ ގޮތުގައި އިންޖީނުގޭ ސަރަހައްދުގައި މިހާރު ވެސް 100 އެއްހާ މީހުން އެބަ ތިއްބެވެ.
2600 މީހުންގެ އާބާދީއެއް އޮންނަ އަލިފުއްޓަށް ކުރިން ކަރަންޓު ދެމުން ގެންދިޔައީ އެރަށު ވަޑިންގެ އެކުވެރި ޖަމިއްޔާއިންނެވެ. 2008 ވަނަ އަހަރު ވެރިކަން ބަދަލުވުމަށްފަހު އެރަށަށް ކަރަންޓު ދެމުން ގެންދިޔައީ ޔުޓިލިޓީސް ކުންފުނީގެ ބެލުމުގެ ދަށުންނެވެ.
"ނަޝިދުގެ ދުވަސްވަރު ވެސް ސާވިސްއެއް ނުދޭ، މިސަރުކާރުގައި ވެސް މައްސަލަ ޖެހެމުން ދިޔައީ، އެކަން ސަމާލު ކަމަށް ގެނައިން އެކަމަކު ހައްލެއް ނުލިބޭ،" އަލިފުށި ކައުންސިލުގެ ރައީސް އަބުދުއްލަތީފު އަބުދުއްރަހުމާން ވިދާޅުވިއެވެ.
"2011ގެ ފަހު ކޮޅުން ފެށިގެން ދުވާލަކު މަދު ވެގެން 11 ފަހަރުދޭ، އެހެންވެ ތާވަލުތަކެއް ހަދައިގެން ވަކި ގަޑިތަކެއްގައި ވަކި ސަރަހައްދުތަކަކުން ކަނޑަމުން ދިޔައީ، އޭޢރު ހައްލުވި، ނަމަވެސް ޑިސެމްބަރުގައި ޝެޑިއުލް އުވާލީ،އަނެއްކާ ވެސް ހައްދު ފަހަނަޅާ ހިސާބަށް ދިއުމުން ފެބްރުއަރީ މަހު ޝެޑިއުލަށް އަމަލު ކުރަން ފެށީ، އެހެން ތިއްބާ މިއަދު 20 ފަހަރަށް ކަނޑައިގެން ގޮސް އެންމެ ފަހުން ނުވެސް ލިބުނީ،" ކައުންސިލުގެ ރައީސް ވިދާޅުވިއެވެ.
"އަސްލު އަލިފުށީ ރައްޔިތުންނަކީ ކެތްތެރި މަޑުމައިތިރި ބައެއް، އެހެންވެ މިހާ ދުވަހު ވެސް މިތިބެވުނީ، މިލިބުނު ލަނޑަކީ ސަރުކާރަށް އެއްބާރުލުންދީގެން ތިބީމާ ދިން އަނިޔާއެއް،" ކައުންސިލުގެ ރައީސް ވިދާޅުވިއެވެ.
ސީއެންއެމަށް މައުލޫމާތު ދެއްވަމުން އަލިފުށި އިންޖީނުގޭ ހިންގުމާ ހަވާލުވެ ހުންނެވި މުހައްމަދު ހަސަން ވިދާޅުވީ މިރޭ އަށެއް ޖަހާއެހާކަށްހާ އިރު ކަރަންޓު ކަނޑައިގެން ދިޔައީ ހަތަރު އިންޖީނު އެއްކޮސް ފެއިލްވުމުން ކަމަށެވެ.
"DEUTZ، ބްރޭންޑުގެ އިންޖީނު މިހިރީ، މިއެއްޗެއްސަކީ ކޮންމެ ކޮންމެ ޓޫލަކުން ރިޕެއަރ ކުރެވޭނެ އެއްޗެއް ވެސް ނޫން، އަޅުގަނޑުމެންވަނީ ބަޔަކާ ހަވާލުކޮށްފައި މިހާރު އެކޮޅުން ތީމެއް ވެސް އަންނަ ގޮތަށާް ހަމަޖެހިއްޖެ، އައުމުގެ ކުރިން ވެސް ދެވޭތޯ ކުރެވެން ހުރި މަސައްކަތެއް ކުރަމުން މިދަނީ،" މުހައްމަދު ހަސަން ވިދާޅުވިއެވެ.
"އަސްލު ސާވިސް ނުކުރެވޭތީ ދެން، މިހާރު ޑިާންޑު ވެސް ބޮޑީ، ހިފަހައްޓާލަން އުނދަގޫ ހަމަ" އޭނާ ވިދާޅުވިއެވެ.