ރާއްޖޭގެ ޒުވާނުން އައިއެސްއާ ގުޅިގެން ހަނގުރާމަކުރުމަށް ދިއުމާބެހޭ ގޮތުން ބޭރުގެ ނޫސްތަކުގައި ޖަހަމުން ގެންދަނީ އެކަން ހިނގަމުންދާ ކަން ހިނގަމުންދާ ވަރަށްވުރެ މާބޮޑުކޮށްގެން ކަމަށް ކުރީގެ ރައީސް އަލްއުސްތާޒް މައުމޫން އަބްދުލް ގައްޔޫމް ވިދާޅުވެއްޖެ އެވެ.
ރައީސް މައުމޫން މިހެން ވިދާޅުވެފައިވަނީ ސިންގަޕޫރުގައި ހިންގަމުންދާ އިންޑިއަން އޯޝަން ކޮންފަރެންސް 2016 ގައި ވާހަކަ ދައްކަވަމުން ކޮންފަރެންސުގެ ބައިވެރިޔަކު ދެންނެވި ސުވާލެއްގެ ޖަވާބު ދެއްވަމުންނެވެ.
ރައީސް މައުމޫން ވިދާޅުވީ މިހަރަކާތަކީ ރާއްޖެ ފިޔަވައި ވަރަށް ގިނަ އެހެން ގައުމުތަކުގައިވެސް ހިނގަމުންދާ ހަރަކާތެއް ކަމަށާއި ރާއްޖޭގައި އެކަން ކޮންޓްރޯލް ކުރުމަށްޓަކައި އެކަށީގެންވާ ފިޔަވަޅުތަކެއް އަޅަމުންދާ ކަމަށެވެ. އިސްލާމްދީނަކީ ސުލްހައަށް ގޮވާލާ ދީނެއް ކަމަށާއި، އައިސިސްއިން ހިންގަމުންގެންދާ ފަދަ ލާއިންސާނީ ޖަރީމާތަކަކީ އިސްލާމްދީން ހުއްދަކުރާ ކަމެއް ނޫން ކަމަށްވެސް ވިދާޅުވި އެވެ.
މި ކޮންފަރެންސަކީ އިންޑިއާގެ އަމިއްލަ ޖަމިއްޔާއެއް ކަމަށްވާ އިންޑިއާ ފައުންޑޭޝަނާއި، ސިންގަޕޫރުގެ އެސް. ރާޖަރަތުނަމް ސްކޫލް އޮފް އިންޓަނޭޝަނަލް ސްޓަޑީޒްއާ ގުޅިގެން ބާއްވަމުންގެންދާ މިސަރަހައްދުގެ ގައުމުތައް ހިމެނޭ ޖަލްސާ އެކެވެ. މިޖަލްސާގައި 21 ގައުމަކުން ބައިވެރިވި އެވެ. ދިވެހިރާއްޖޭގެ ފަރާތުން މިޖަލްސާގައި ބައިވެރިވެވަޑައިގަންނަވަނީ ރައީސް މައުމޫން އަބްދުލްގައްޔޫމެވެ.