ގިނަ ދަރިން ހޯދާ އަންހެނުން މުސްކުޅިވާ ރޭޓް އެވްރެޖް ގޮތެއްގައި ދަށް ކަމަށް ކެނެޑާގެ ސައިމަން ފްރޭސާ ޔުނިވަސިޓީން ކުރި ދިރާސާއަކުން ދައްކައިފިއެވެ.
މި ދިރާސާގައި ބުނެފައިވާ ގޮތުގައި ގިނަ ދަރިން ވިހާ އަންހެނުންގެ ހަށިގަނޑު ޖިސްމާނީ ގޮތުން މުސްކުޅިވުން ލަސްވާނެ ކަމަށެވެ. ގުއަޓެމާލާގެ ދެ ސަރަހައްދަކުން 75 އަންހެނަކު ބޭނުންކޮށްގެން ކުރިއަށް ގެންގޮސްފައިވާ މި ދިރާސާގައި އެ އަންހެނުންނަށް ލިބިފައިވާ ދަރިންގެ އަދަދާއި މައިންގެ ހަށިގަނޑަށް އަންނަމުން ދިޔަ ބަދަލު ވަނީ ބަލައިފައެވެ.
ޔުނިވާސިޓީގެ ދިރާސާގައި ޑީއެންއޭ ސްޓްރޭންޑްގައި ހިމެނޭ "ޓެލޮމިއާސް" ނުވަތަ ސެލް ހަލާކުވެ ދިއުން ލަސްކޮށްދޭ ބަޔަށް އަންނަ ބަދަލު ބަލާފައިވެއެވެ. ޓެލޮމިއާސް ހަލާކުނުވެ ގިނަ ދުވަހު ހުންނަ ނަމަ މީހާގެ ޒުވާންކަމުގެ ސިފަތައް ގިނަ ދުވަހަށް ހިފަހައްޓައިދޭކަމަށްވެއެވެ.
އެދިރާސާގައި ބައިވެރިކުރި އަންހެނުންގެ ޓެލޮމިއާސް އަށް އަންނަ ބަދަލު ދެނެގަތުމަށް، ކޮލުގެ ކުޅުން ޑީއެންއޭ ސާމްޕަލް ނަގައި 13 އަހަރު ފަހުން އަނެއްކާވެސް ސާމްޕަލް ނެގި އެވެ. ޒުވާންކަން ހިފަހައްޓައިދޭ ޓެލޮމިއާސް ވަރުގަދައީ ގިނައިން ދަރިން ލިބުނު އަންހެނުންގެ ހަށިގަނޑުގައިކަން އެދިރާސާއިން ހާމަވެގެން ގޮސްފައިވާއިރު، ގިނަ ދަރިން ހޯދުމުން ޖިސްމާނީ ގޮތުން އަންހެނުން އަވަހަށް މުސްކުޅިވާ ކަމަށް ބުނާ ވާހަކައަކީ ހަޤީޤަތެއް ނެތް ވާހަކައެއްކަން މިދިރާސާ އިން ވަނީ ހާމަވެގެން ގޮސްފައެވެ.
މިގޮތަށް ދިމާވަނީ އަންހެނުންގެ ސެކްސް ހޯމޯން ކަމަށްވާ އެސްޓްރޮޖެންގެ ސަބަބުންނާއި އެމީހުން ނިސްބަތްވާ ސަރަހައްދުގެ އިޖްތިމާއީ ގުޅުން ރަނގަޅުވުމެވެ. މިގޮތުން އެ މީހުންގެ ދަރިންނަށް އެހީތެރިވުމާއި އެހެނިހެން ކަންކަމުގައި އެއްބާރުލުން ދިނުމުން އަރާމުކުރަން ވަގުތު ލިބުމާއި ނަފްސާނީ ދުޅަހެޔޮ ކަމުގެ ސަބަބުން ހަށިގަނޑުގެ ޓިޝޫތައް މަރާމާތުކުރުމަށް ބާރުލިބޭކަމަށް މި ދިރާސާގައި ވަނީ ބުނެފައެވެ.