މައްސަލަތައް ހުރި ނަމަވެސް މިހާތަނަށް ވޯޓުގެ ކަންކަން ދިޔައީ ރަނގަޅަށް އަދި އިންސާފުވެރިކޮށް ކަމަށް ޕީޕީއެމްގެ ޕްރައިމަރީގައި ވާދަކުރައްވާ އުމަރު ނަސީރު މިއަދު ވިދާޅުވެއްޖެ އެވެ.
ކަލާފާނުގައި ބަހައްޓާފައި ހުރި ވޯޓު ފޮށްޓަށް ވޯޓުލެއްވުމަށް ފަހު ނުކުމެވަޑައިގެން އުމަރު ވިދާޅުވީ އޭނާގެ ބައެއް ސަޕޯޓަރުންނަށް ވޯޓުލުމުގައި މައްސަލަތަކެއް ކުރިމަތިވަމުންދާ ކަމަށާއި އަދި ލިސްޓުގައި ނަން ނެތުން ފަދަ މައްސަލަތައް އެބަހުރި ކަމަށެވެ. އެފަދަ ޝަކުވާތައް ކަމާ ބެހޭ ފަރާތްތަކަށް ހުށަހަޅާފައިވާނެ ކަމަށް ވެސް ވިދާޅުވި އެވެ.
"އިންސާފުވެރި އިންތިހާބެއް ވެއްޖެއްޔާ ނަތީޖާ އަބަދުވެސް ގަބޫލުކުރާނަން. މިހާތަނަށް އިންސާފުވެރި އިންތިހާބެއް ކަމަށް ގަބޫލުކުރަމުން މިދަނީ. މި ދަންނަވާހެން ޝަކުވާތައް ބެލީމާ ދެން އެނގޭނީ އަޅުގަނޑުމެންނަށް ކުރިއަށް ދާންވީ ގޮތް،" އުމަރު ވިދާޅުވި އެވެ.
އިންތިހާބުގެ ވޯޓުލުން ކުރިއަށްދާ އިރު ބައެއް ސަރަހައްދުތަކުގައި ދެބަސްވުންތައް ހިނގާ ކަމަށް ދެ ފަރާތުން ވެސް ބުނެފައިވެ އެވެ.
އުމަރު ވިދާޅުވީ މިފަދަ ވާދަވެރި އިންތިހާބެއްގައި އެފަދަ ކަންކަން ފެންނާނެ ކަމަށެވެ. އެހެންނަމަވެސް އިންތިހާބަށް ފަހު ޕާޓީ އަށް ހީނަރުކަމެއް ނާންނާނެ ކަމަށް އޭނާ ވިދާޅުވި އެވެ.
އިންތިހާބުގައި ވާދަކުރައްވާ އަބުދުﷲ ޔާމީން ވެސް ވޯޓުލެއްވުމަށް ފަހު ވިދާޅުވީ ހަމަނުޖެހުންތަކެއް ފެނުނަސް ޕާޓީ ބައިބައިވެގެން ނުދާނެ ކަމަށެވެ.
"އަޅުގަނޑަށް ހީވަނީ ދެ ފަރާތުގެ ސަޕޯޓަރުންނަކީ ވެސް ވަރަށް ވަރުގަދަ ސަޕޯޓަރުން. މިކަހަލަ ވާދަވެރި އިންތިހާބެއް ރާއްޖެއަކު ނުއެއް ހިނގާ. އެހެންވީމާ މި ކަހަލަ ވާދަވެރި އިންތިހާބެއް ހިނގާ އިރުގައި ދެ ފަރާތުގެ މެދުގައި ވެސް ހުންނާނެ އެކަހަލަ ކުދިކުދި ކަންކަން،" އުމަރު ވިދާޅުވި އެވެ.
"ޕާޓީ ބައިބައެއް ނުވާނެ. އަޅުގަނޑު ދެކޭ ގޮތުގައި ޕާޓީ އިތުރަށް ވަރުގަދަވާނީ. ސަބަބަކީ މި އެކްސަސައިޒްގެ ސަބަބުން ފެނިގެން މިދަނީ ޕީޕީއެމްގެ އެތެރޭގެ ޑިމޮކްރަސީ ހަރުދަނާކުރެވިފައި އޮތް މިންވަރު."
ކެމްޕެއިން ތެރޭގައި އެއް ބޭފުޅަކު އަނެއް ބޭފުޅަކަށް ވަރަށް ބޮޑަށް ފާޑުވިދާޅުވުމުގެ ސަބަބުން މައްސަލަތައް އިންތިހާ އަށް ގޯސްވެފައިވީ ނަމަވެސް މޮޅުވާ ކެންޑިޑޭޓެއްގެ ފަހަތުގައި އަނެއް ކެންޑިޑޭޓަކު ހުންނަވާނެ ކަމަށް ވެސް އުމަރު ވިދާޅުވި އެވެ.
"އަޅުގަނޑު މޮޅުވާ ކެންޑިޑޭޓެއްގެ ފަހަތުގައި ބަލިވާ ކެންޑިޑޭޓަކު ހުންނާނެ ކަމަށް ދެ ކެންޑިޑޭޓުން ވެސް އޮންނާނީ އެއްބަސްވެފައި. އެހެންވީމާ އެއަކަށް އެއްވެސް ބަދަލެއް ނާދޭ އެއްވެސް ކެނޑިޑޭޓެއްގެ ފަރާތަކުން،" އުމަރު ވިދާޅުވި އެވެ.