އިރުއުތުރު ސީރިޔާގެ ކަރަންޓު އުފައްދާ ޕުލާންޓަކަށް އިސްލާމިކް ސްޓޭޓް (އައިއެސް) އިން ހަމަލާދީފިއެވެ.
ސީރިޔާގެ އުތުރުއިރުމަތީ ކަނުގައި އޮންނަ އަލް-ހަސަކާގައި ހުންނަ މިކަރަންޓު ޕުލާންޓަށް އައިއެސް އިން ހަމަލާ ދީފައިވަނީ ޓްރަކެއްގައި ގޮވާ ތަކެތި ހަރުކުރުމަށްފަހު އެ ޕުލާންޓާ ހަމަވުމުން ގޮއްވާލައިގެން ކަމަށް ސީރިއާގެ އަސްކަރިއްޔާއިން ޚަބަރުދެއެވެ.
ސީރިޔާގެ ތަދުބީރީ ރަށެއް ކަމަށްވާ އަލް ހަސަކާގައި ދިން މިހަމަލާގައި "މާއްދީ ގެއްލުމާއި އިންސާނީ ގެއްލުން" ލިބިފައިވާ ކަމަށް ސީރިއަން ޓީވީ އިން ހަބަރުދެއެވެ.
ސީރިޔާގެ އިރުއުތުރު ކަނަކީ ތަދުބީރީ ގޮތުން އައިއެސް އަށް މުހިއްމު ސަރަހައްދަކަށް ވަނީ، މި ސަރަހައްދަކީ އައިއެސް އިން އިރާގުގައި ހިފާފައިވާ ހިސާބުތަކާއި ސީރިޔާ ގައި ހިފާފައިވާ ހިސާބުތައް ގުޅުވައިދޭ ސަރަހައްދަކަށްވާތީއެވެ.
އަމިއްލައަށް ޚިލާފަތު އިޢުލާނުކޮށްފައިވާ ޖަމާޢަތް، އިސްލާމިކް ސްޓޭޓް ދަނީ މެދުއިރުމަތީގެ ގިނަ ޤައުމުތަކެއްގައި ހަރަކާތްތެރިވަމުންނެވެ. އެގޮތުން، ސީރިޔާއާއި، އިރާޤާއި، މިޞްރާއި، ލީބިޔާއާއި ކުވޭތު އަދި މިނޫންވެސް ޤައުމުތައް ހިމެނެއެވެ.