މަނަދޫގައި އިރުއިރު ކޮޅާ ކަރަންޓު ކެނޑޭ މައްސަލަ ބޮޑުވެ، ރައްޔިތުން މުޒާހަރާ ކުރަން ފެށުމުން ސަރުކާރުގެ އިދާރާތަކުން ކަރަންޓު ކަނޑާލައިގެން ނަމަވެސް ރައްޔިތުންނަށް ކަރަންޓު ދިނުމަށް އެއްބަސްވެ މުޒާހަރާ ނިންމާލައިފިއެވެ.
ސީއެންއެމަށް މައުލޫމާތު ދެއްވަމުން މަނަދޫ ކައުންސިލުގެ ރައީސް އިބުރާހީމު ނަސީރު ވިދާޅުވީ އެގޮތަށް އެއްބަސްވީ ރައްޔިތުން ޑިމާންޑު ކުރުމުން ކަމަށެވެ.
"ރައްޔިތުން ޑިމާންޑް ކުރީ ސަރުކާރުގެ ތަންތަނުން ކަނޑާލައިގެން ނަމަވެސް ގެތަކަށް ލިބެންޖެހޭނެ ކަމަށް. އެކަމަކު ރައްޔިތުންގެ މާނައެއް ނުކުރޭ ކޮންމެހެން ހުރިހާ ތަނަކުން ކަރަންޓު ކަނޑާލާ ހިދުމަތްދޭން ނުޖެހޭނެ ކަމަށް. ރައްޔިތުން އަސްލު ބޭނުންވަނީ ކޮންމެހެން ކަރަންޓުގެ ބޭނުން ކުރަން ނުޖެހޭ އިރުތަކާއި، ތަންތަނުގައި ކަރަންޓު ކަނޑާލައިގެން އެހިދުމަތް ދިނުމަށް. މިހާރު އެގޮތަށް މިގެންދަނީ،" ނަސީރު ވިދާޅުވިއެވެ.
ނަސީރު ވިދާޅުވީ ރައްޔިތުންގެ ޑިމާންޑުތަކާއި ގުޅިގެން ސުކޫލައި އަތޮޅު ކައުންސިލާއި އަތޮޅު ހޮސްޕިޓަލާއި އެހެނިހެން ވެސް އިދާރާތަކުގެ ވެރިންނާއި ވެސް ބައްދަލުކޮށްފައިވާ ކަމަށާއި ހުރިހާ ފަރާތްތަކަކުން ވެސް އެގޮތަށް އަމަލު ކުރުމަށް ނިންމާފައިވާ ކަމަށެވެ. އަދި މިއަދު އެގޮތަށް އަމަލު ކުރަން ފެށުމުން ކަރަންޓު ކެނޑުމުގެ މައްސަލައަށް ވެސް ހައްލެއް ލިބިފައިވާ ކަމަށް ނަސީރު ވިދާޅުވިއެވެ.
މަނަދޫއިން ސީއެންއެމަށް މައުލޫމާތުދިން މީހަކު ބުނީ މުޒާހަރާގެ ބައިވެރިން ކައުންސިލްތަކުގެ ބޭފުޅުންނާއި މަޝްވަރާ ކުރީ ދުވާލުގަޑީގައި ދައުލަތުގެ މުއައްސަސާތަކުން ކަރަންޓު ކަނޑާލައިގެން ނަމަވެސް އާއްމު ގެތަކަށް ކަރަންޓު ފޯރުކޮށްދިނުމަށެވެ. އަދި ޖަނެރޭޓަރެއް ލިބެންދެން އެ އޮފީސްތަކަށް އިހަށް ކަރަންޓު ނުދީ ބަހައްޓަން ފެންނަ ކަމަށް އެމީހުން ބުނަމުން ދިޔަ ކަމަށްވެސް އޭނާ ބުންޏެވެ.
މުޒާހަރާގެ ބައިވެރިން އެގޮތަށް އެދިފައިވަނީ އެރަށުގެ ބައެއް ސަރުކާރުގެ މުއައްސަސާތަކުން އެކަށީގެންވާ ގޮތަކަށް ކަރަންޓް ފީވެސް ނުދައްކާ ބިލްތައް ލަސްކުރަމުންދާތީ އެތަންތަނަށް ކަރަންޓު ދިނުމުން އޯވަލޯޑުވެ ގޭގެއިން ކަރަންޓު ކެނޑޭތީ ކަމަށް މަނަދޫ އިން ވާހަކަ ދެއްކި މީހާ މައުލޫމާތުދިނެވެ.
ކައުންސިލްތަކާއި އެކު ކުރިއަށް ގެންދިޔަ މަޝްވަރާތައް ނިމުމުގެ ކުރިން މުޒާހަރާ ކުރަމުން ދިޔަ ސަރަހައްދަށް ދިޔަ ބަޔަކުވަނީ އިންޖީނުގެއަށް ވަދެ މުޅި ރަށުން ކަރަންޓު ކަނޑާ ވެސް ލާފައެވެ. އެމައްސަލާގައި ހަމަނުޖެހުމެއް ނުހިނގީ ކިރިޔާ ކަމަށާއި އެވަގުތު އެސަރަހައްދުގައި ފުލުހުން ވެސް ހަރަކާތްތެރިވި ކަމަށް އޭނާ ބުންޏެވެ. ނަމަވެސް އެމައްސަލާގައި އެއްވެސް މީހަކު ހައްޔަރުކުރި ކަމެއް އަދި އެނގިފައެއް ނުވެއެވެ.