ކަރަންޓު އިޤުތިޞާދުކުރުމަށް ކުރެވިދާނެ ކަންކަމާ ގުޅޭ ޢިލްމީ ދިރާސާއެއް ހެދުމަށް ފަހުމުނާމާއެއްގައި ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ޤައުމީ ޔުނިވާސިޓީއާއެކު ސޮއިކޮށްފިއެވެ.
މިއަދު މެންދުރުފަހު ބޭއްވި މި ރަސްމިއްޔާތުގައި ކަރަންޓު ބިލްތަކާއި، ކަރަންޓު ބޭނުން ކުރާ މިންވަރު ދެނަގަތުމަށާއި، ކަރަންޓު އިގްތިސާދު ކުރުމަށް ކުރެވިދާނެ ކަންކަމާއި ގުޅޭ އިލްމީ ދިރާސާއެއް ހެދުމަށް ސްޓެލްކޯގެ ފަރާތުން މި ފަހުމުނާމާގައި ސޮއިކޮށްފައިވަނީ އެ ކުންފުނީގެ މެނޭޖިން ޑިރެކްޓަރ ޙުސައިން ފަހުމީ އެވެ. އަދި ގައުމީ ޔުނިވާސިޓީގެ ފަރާތުން ސޮއިކުރެއްވީ އެ ޔުނިވާސިޓީގެ ވައިސް ޗާންސެލަރ ޑރ. ޢާއިޝަތު ޝެހެނާޒްއެވެ.
ފަހުމުނާމާގައި ސޮއިކުރުމަށްފަހު ވާހަކަފުޅު ދައްކަވަމުން ސްޓެލްކޯގެ އެމްޑީ ޙުސައިން ފަހުމީ ވިދާޅުވީ، މިއީ ދިރާސާތަކަށް ބިނާކޮށް ނިންމުންތައް ނިންމާ ތާރީހީ ދުވަހެއް ކަމަށާއި، މިކަމާއި ގުޅޭ ދިރާސާ އިންސާފުވެރިކަމާއިއެކު ކުރެއްވުމަށްފަހު އާއްމުކޮށްދިނުމަށް އެދޭ ކަމަށެވެ.
Advertisement
"ބައެއް ގޭގޭ ތަކުގައި ކަރަންޓު ބިލު ބޮޑުވަނީ. މި މައްސަލައިގައި އަޅުގަނޑުމެން ވަރަށް ބޮޑަށް އެދޭ އެދުމެއް މިނިވަންކަމާއި އެކު، އިންސާފުވެރިކަމާއިއެކު، ދިރާސާއެއް ކުރައްވާފައި ޕަބްލިޝްކޮށްލަދެއްވުން."
ފަހުމީ ވިދާޅުވިއެވެ.
މި ދިރާސާ ހެދުމަށްޓަކައި އެއްވެސް ހިފެހެއްޓުމެއް ނެތި، ސްޓެލްކޯގެ ސިސްޓަމްގައިވާ މައުލޫމާތުތައް ފޯރުކޮށްދޭނެ ކަން ފާހަގަކުރައްވަމުން ފަހުމީ ވަނީ އެއްވެސް ހިފެހެއްޓުމެއްނެތި ރައްޔިތުންނަށް މިކަމުގެ ހަގީގަތް ހާމަކޮށްދެއްވުމަށް އެދިވަޑައިގެންފައެވެ.
ފަހުމީގެ އިތުރުން، އެމްއެންޔޫގެ ވައިސް ޗާންސެލަރ ޑރ. ޢާއިޝަތު ޝެހެނާޒް ވިދާޅުވީ، ކަރަންޓު އިޤްތިޞާދުކުރުމަށް ކުރެވިދާނެ ކަންކަމާ ގުޅޭ ޢިލްމީ ދިރާސާގެ އެންމެ މުހިންމު އެއް އަމާޒަކީ ރައްޔިތުންގެ މެދުގައި ކަރަންޓުގެ މައްސަލައާއ ގުޅިގެން އުފެދިފައިވާ ހިތްހަމަ ނުޖެހުމަށް ހައްލެއް ގެނެސްދިނުން ކަމަށެވެ.
" މި ދިރާސާގައި މީޓަރުތަކުން ދައްކާ އަދަދާއި ބިލު ކުރެވިފައިވާ އަދަދުގައި އެއްވެސް ކަހަލަ ފަރަގެއް ހުރިތޯ އާއި އަދި ބިލުތަކުގެ އަދަދު ސަރީހަކޮށް ހިސާބުކުރެވިފައިވާކަން ކަށަވަރު ކުރުމާއި އޭގައިވެސް ތަފާތުތަކެއް ހުރިތޯ ނެތްތޯ ބެލުމަކީވެސް އަޅުގަނޑުމެންގެ ދިރާސާގެ އެންމެ ބޮޑު އެއް މަގްސަދު."
ޑރ. ޢާއިޝަތު ޝެހެނާޒް ވިދާޅުވިއެވެ.
މި ފަހުމުނާމާގެ ތެރެއިން މި ދާއިރާއިން އިތުރަށް ކިޔެވުމަށް ފަހިކޮށްދޭއިރު، ސްޓެލްކޯއިން ފާއިތުވި 10 އަހަރު ދުވަހުގެ ތެރޭގައި ދޫކުރި ކަރަންޓު ބިލުތަކުގެ ފުރިހަމަ ދިރާސާއެއްވެސް ހެދިގެން ދާނެއެވެ.