ކަރަންޓު ބިލް ބޮޑުވާ މައްސަލާގައި ސްޓެލްކޯ އާއި ޤައުމީ ޔުނިވާސިޓީ (އެމްއެންޔޫ) ގުޅިގެން އިލްމީ ދިރާސާއެއް ހެދުމަށް އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި ސްޓެލްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގް ޑިރެކްޓަރު ހުސެއިން ފަހުމީއެވެ. އެމްއެންޔޫގެ ފަރާތުން ސޮއިކުރެއްވީ އެ ޔުނިވާސިޓީގެ ވައިސް ޗާންސެލާ ޑރ. އައިޝަތު ޝެހެނާޒް އާދަމެވެ.
ސްޓެލްކޯ އާއި އެމްއެންޔޫއާ ދެމެދު ސޮއި ކުރީ 2014 އިން ފެށިގެން މިއަހަރާ ހަމައަށް ސްޓެލްކޯއިން ދޫކުރި ކަރަންޓު ބިލުތަކުގެ ފުރިހަމަ ތަހުލީލީ ދިރާސާއެއް ހެދުމަށްފަހު އާންމު ކުރުމަށެވެ.
އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ފަހުމީ ވިދާޅުވީ ކަރަންޓު ބިލާ ގުޅޭގޮތުން ހިޔާލު ތަފާތުވުންތައް އެބަހުރި ކަމަށެވެ. އެހެންވެ ކަރަންޓު ބިލް ބޮޑުވާ މައްސަލާގައި އިންސާފުވެރިކަމާއެކު އިލްމީ ދިރާސާއެއް ކޮށްފައި ޕަބްލިޝް ކޮށްދިނުމަށް އެދިވަޑައިގެންނެވިއެވެ.
"މިކަމަށްޓަކައި އަޅުގަނޑުމެން ކޮށްދެއްވާނެ ކަމަކީ އެއްވެސް ހިފެހެއްޓުމެއް ނެތި، ދެވެން ހުރި ހުރިހާ މައުލޫމާތެއްދީ، އަޅުގަނޑުމެންގެ ސިސްޓަމަށް އެކްސެސް ވުމުގެ ފުރުސަތު ދެއްވާނަން. އެކަމުގައި ނޯންނާނެ މިނެއް، އިމެއް. ހުރިހާ ރިސޯސެސްއެއް އަޅުގަނޑުމެން ފޯރުކޮށްދޭނަން،" ފަހުމީ ވިދާޅުވިއެވެ.
މި ރަސްމިއްޔާތުގައި ވައިސް ޗާންސެލާ ޝެހެނާޒް ވިދާޅުވީ އެ ދިރާސާގެ މައިގަނޑު މަގުސަދަކީ ކަރަންޓުގެ ދާއިރާއިން އިލްމީ ދިރާސާތަކެއް ހެދުމާއި މަތީ ތައުލީމަށް ފުރުސަތު ހޯދައި ދިނުމުގެ އިތުރުން އިންޓާންޝިޕްގެ ފުރުސަތުތައް ފަހިކޮށްދިނުން ކަމަށެވެ.
ދިރާސާގައި މަސައްކަތް ކުރަނީ:
1. ދުވާލެއްގެ އެކި ދަންފަޅިތަކުގައި ކަރަންޓު ބޭނުންކުރާ މިންވަރު ދެނެގަތުން
2. ކަރަންޓު ބޭނުންކުރާ މިންވަރުގައި މޫސުމީ ގުޅުމެއް ހުރިތޯ ދެނެގަތުން
3. ސްޓެލްކޯގެ ބިލިން ޕްރޮސެސްގެ ސައްހަކަން ބަލައި، ހާމަކަން އިތުރު ކުރުމަށް ކުރެވިދާނެ ކަންކަން ބެލުން
4. މީޓަރުން ދައްކާ އަދަދާއި ބިލް ކުރެވިފައި ހުރި އަދަދުގައި އެއްވެސް ތަފާތު ކުރުމެއް ހުރިތޯ ބެލުން
5. ބިލުތަކުގެ އަދަދު ސާފުކޮށް ހިސާބު ކުރެވިފައިވާ ގޮތް ކަށަވަރު ކުރުމާއި އޭގައި ތަފާތު ހުރިތޯ ބެލުން
މީގެ އިތުރުން އެ ދިރާސާގައި ކަރަންޓު އިގްތިސާދު ކުރުމަށް ކުރެވިދާނެ ކަންކަން ބަލައި ހަރަދު ކުޑަ ކުރަންވީ ކޮން ދާއިރާއަކުން ކަން އެނގޭނެ ކަމަށް ޝެހެނާޒް ވިދާޅުވިއެވެ.
ސްޓެލްކޯ އިން ބުނިގޮތުގައި ކޮންމެ އަހަރު ވެސް އެވްރެޖުކޮށް ކަރަންޓް ބޭނުން ކުރާ މިންވަރު 8-10 ޕަސެންޓާ ހަމައަށް ވަނީ އިތުރުވެފައެވެ. ކުރިއަށް އޮތް އަހަރެއްގެ ތެރޭ ޕީކް ވަގުތުތަކުގެ ކަރަންޓު ބޭނުން ކުރާ ވަރު 120 މެގަވޮޓަށް އަރާނެ ކަމަށްވެސް ސްޓެލްކޯއިން ލަފާކުރެއެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi