ރައީސް އޮފީހުގެ ތަރުޖަމާނު އަދި އެންސްޕާގެ ސީއީއޯ ހީނާ ވަލީދާ ގުޅޭ ކޮރަޕްޝަނުގެ މައްސަލައެއް އަދި ލިބިފައި ނުވާ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
އެންސްޕާ އަށް ކޮރަޕްޝަންގެ ތުހުމަތުތަކެއް ކުރެވިފައިވަނީ ދާދިފަހުން ބްރޯޑްކާސްޓިން ފެށި "އެމްއެމް ޓީވީ" ޗެނަލްގެ ކުންފުނި ކަމަށްވާ، މޯލްޑިވްސް މީޑިއާ ހައުސް އިން ދިގު މުއްދަތަކަށް ކުއްޔަށް ހިފާފައިވާ އިމާރާތެއްގެ ފްލޯތަކެއްގައި އެންސްޕާ ހިންގަން ކުއްޔަށް ހިފުމުންނެވެ. ނަމަވެސް ފާޑުކިޔުންތައް އަމާޒުވުމުން އެންސްޕާ އިން މިހާރު ވަނީ މޯލްޑިވްސް މީޑިއާ ހައުސްއާއެކު ހަދާފައިވާ އެއްބަސްވުން އުވާލަން ނިންމާފަ އެވެ.
މި ޓީވީ ޗެނަލަށް އެންސްޕާ އިން 34 މިލިއަން ރުފިޔާ ހަރަދު ކޮށްފައިވާ ކަމަށް ވަނީ ތުހުމަތު ކޮށްފައިވެ އެވެ. މި މައްސަލަ ބަލައިދިނުމަށް އެދި އެންސްޕާ އިން ވަނީ އޭސީސީއަށް ވެސް ހުށަހަޅާފަ އެވެ.
ރައީސް އޮފީސް ދޮރުމަތީ ބައެއް ނޫސްވެރިންނާއެކު މިއަދު އޮތް ނޫސްވެރިންގެ ބައްދަލުވުމެއްގައި ނޫސްވެރިއަކު ވަނީ އެންސްޕާގެ ކޮރަޕްޝަން މައްސަަލަ އެނގިވަޑައިގެންފައިވޭތޯ ރައީސް މުއިއްޒާއި ސުވާލުކޮށްފަ އެެވެ.
އެ ސުވާލަށް ޖަވާބު ދެއްވަމުން ރައީސް ވިދާޅުވީ އެކަމުގެ މައުލޫމާތު އަދި ލިބިފައި ނުވާ ކަމަށާއި، އެފަދަ މައުލޫމާތެއް ލިބިއްޖެ ނަމަ ކަމާބެހޭ ފަރާތްތަކަށް ހުށަހަޅުއްވާނެ ކަމަށެވެ.
"އަޅުގަނޑާ ހަމައަށް ލިބިއްޖެޔާ އަޅުގަނޑު ހަމަ ކަމާ ބެހޭ ފަރާތްތަކަށް ދެންމެގައި ވެސް މި ދެންނެވި ގޮތަށް ހުށަހަޅާނަން،" ރައީސް ވިދާޅުވި އެވެ.
އެ މައްސަލައާ ގުޅިގެން ހީނާގެ އިސްތިއުފާ އަށް ބައެއް ފަރާތްތަކުން ސޯޝަލް މީޑިއާގައި ގޮވާލަމުން އަންނައިރު، އެންސްޕާ އިން ވަނީ އެކަމާ ގުޅޭ ފުރިހަމަ ތަހުގީގެއް ހިންގާ އެކަމުގެ ތަފްސީލު ރައްޔިތުންނަށް ހާމަކޮށް ދިނުމަށް އޭސީސީގައި އެދިފަ އެވެ.