ޓެކްސް ބަޔާން ހުށަނާޅާ އަދި ފައިސާ ނުދައްކާ ފަރާތްތަކުގެ ނަން ހާމަ ކުރާ އުސޫލުގެ ދަށުން، 2024 ވަނަ އަހަރުގެ ދެވަނަ ކުއާޓަރުގެ ނިޔަލަށް ދައްކަންޖެހިފައިވާ ޓޫރިޒަމް ދާއިރާގެ ޖީ.އެސް.ޓީ އާއި ގްރީން ޓެކްސް ނުދައްކައިވާ 170 ފަރާތެއްގެ ނަން މީރާއިން ހާމަކޮށްފިއެވެ.
މިގޮތުން ހާމަކޮށްފައިވަނީ އެ މުއްދަތުގައި އެފަރާތުން ނުދައްކައިވާ ޓޫރިޒަމް ދާއިރާގެ ޖީ.އެސް.ޓީ އާއި ގްރީން ޓެކްސްގެ ޖުމްލަ އަދަދު 100،000.00 ރުފިޔާ އަށްވުރެ އިތުރުވާ ފަރާތްތަކުގެ ނަންތައް ކަމުގައި މީރާއިން މައުލޫމާތު ދެއެވެ.
ޓެކްސް ނުދައްކާ ފަރާތްތަކުގެ ނަން ހާމަ ކޮށްފައިވަނީ އެ ފަރާތްތަކުގެ ނަން ހާމަކުރުމުގެ ކުރިން ފައިސާ ދެއްކުމަށް ތަކުރާރުކޮށް  ހަނދާންކޮށްދީ ތަފާތު ނޯޓިސްތައް ފޮނުވައި އިތުރު މުއްދަތުތަކާއި ފުރުސަތުތައްވެސް ދިނުމަށްފަހު ކަމުގައި މީރާއިން މައުލޫމާތު ދެއެވެ. މިގޮތުން، ޓެކްސް ދެއްކުމުގެ ސުންގަޑީގެ 7 ދުވަސް ކުރިން އޮޓޮމެޓިކް ރިމައިންޑަރ ކޯލެއްދީ، ސުންގަޑީގެ 3 ދުވަސް ކުރިން އަދި ސުންގަޑީގަ އާއި ސުންގަޑީގެ 3 ދުވަސް ފަހުންވެސް އެސް.އެމް.އެސް މެދުވެރިކޮށް ހަނދާންކޮށްދީފައިވާނެ ކަމުގައި މީރާއިން ހާމަކުރެއެވެ. އަދި ސުންގަޑީގެ 10 ދުވަސް ފަހުން އެ ފަރާތްތަކަށް ފުރަތަމަ ނޯޓިސް ފޮނުވައި އެ ނޯޓިސް ފޮނުވިތާ 30 ދުވަސް ފަހުން، އެންފޯސްމަންޓްގެ އިތުރު ފިޔަވަޅުތައް އަޅާނެކަން ބަޔާންކޮށް ފައިނަލް ނޯޓިސް ވެސް ފޮނުވައިފައިވާނެކަމަށް މީރާއިން މައުލޫމާތު ދެއެވެ. އަދި ހަމައެއާއެކު މި މުއްދަތުތަކުގެ ތެރޭގައި އެފަރާތްތަކަށް އެއްފަހަރާ ފައިސާ ދެއްކެން ނެތްނަމަ އިންސްޓޯލްމަންޓް އުސޫލުން  ބަހާލައިގެން ފައިސާ ދެއްކުމުގެ އެއްބަސްވުމަކަށް އައުމުގެ ފުރުސަތު ވެސް ދީފައިވާނެކަމަށާއި މިފަދަ އެއްބަސް ވުމަކަށް އައިސް، ފައިސާ ދައްކަމުންގެންދާނަމަ އެންފޯސްމަންޓްގެ އިތުރު ފިޔަވަޅުތައް ނާޅާނެ ކަމުގެ ޔަގީންކަން އެ ފަރާތްތަކަށް ދީފައިވާނަކަމަށް ވެސް މީރާއިން މައުލޫމާތުދެއެވެ. އަދި ނަން ހާމަކުރުމުގެ ކުރިން، އެފަރާތްތަކުން ދައްކަންޖެހޭ ޓެކްސް ދެއްކިފައިނުވަނީ ދައުލަތުން ލިބެންޖެހޭ ފައިސާ ނުލިބުމުގެ ސަބަބުން ކަމުގައިވާނަމަ، އެކަން ބަޔާންކޮށް އެކަމާ ގުޅޭލިޔެކިޔުންތައް ހުށަހަޅާ ފަރާތްތަކުގެ ނަންތައް ހާމަ ނުކުރާކަމަށްވެސް މީރާއިން ބަޔާންކުރެއެވެ.
މީރާއިން އަބަދުވެސް މަސައްކަތް ކުރަމުން ދަނީ ޓެކްސް ދައްކާ ފަރާތްތަކަށް އެހީތެރިވެދީ އެފަރާތްތަކުގެ ޓެކްސް ކޮމްޕްލަޔަންސް ރަނގަޅުކުރުމަށެވެ. އެގޮތުން ފާއިތުވި 3 މަސް ދުވަހުގެ ތެރޭގައި ޖުމްލަ 44،390 އެސް.އެމް.އެސް، 22,761 ފޯނުކޯލް، އަދި 30,550 ނޯޓިސް ޓެކްސްދައްކާ ފަރާތްތަކަށް ފޮނުވައިފައިވާނެ ކަމުގައި މީރާއިން ވިދާޅުވެއެވެ. މީގެ އިތުރުންވެސް 397 ފަރާތަކަށް އިންސްޓޯލްމަންޓް ޕްލޭންތަކުގެ ދަށުން ބަހާލައިގެން ފައިސާދެއްކޭނެ ލުއިގޮތްތަށް ހަމަޖައްސައިދީފައިވާނެ ކަމުގައި ވެސް މީރާއިން ހާމަކުރެއެވެ.
ޓެކްސްދައްކާ ފަރާތަތްކުން، ޓެކުހުގެ އިލްތިޒާމްތައް ސުންގަޑިއަށް  އަދާކުރަމުންގެންދިއުމަށް މީރާއިން އިލްތިމާސްކުރެއެވެ.