"އެންމެންގެ ސާހިބާ"ގެ ނަމުގައި ކީރިތި ރަސޫލާގެ ސިޔަރަތު ކިޔައިދޭ ސީރީޒްއެއް މި ރޯދަ މަހު، ދައްކަން ފަށައިފިއެވެ. ވަންކްރީޑް ސްޓޫޑިއޯއާއި މަޝްހޫރު ދީނީ އިލްމުވެރިޔާ ޑރ. އާދަމް ޝަމީމް ބިން އިބްރާހީމާ ގުޅިގެން ގެނެސްދޭ މި ސިރީޒްގެ އެޕިސޯޑުތައް ޔޫޓިއުބުގައި ވަނީ އާންމުކުރަން ފަށާފައެވެ. މިގޮތުން، ކޮންމެ އެޕިސޯޑެއްގައި ރަސޫލާގެ ސިޔަރަތު ކިޔައިދީފައި ވަނީ، މުޅިން ތަފާތު ޝައުގުވެރި ގޮތެއްގައެވެ. ޒަމާނީ ވަސީލަތްތަކުގެ އެހީގައި އަޑާއި މަންޒަރު ހިމެނޭހެން މި އެޕިސޯޑުތަކުގައި ސިޔަރަތު ކިޔައީދީފައި ވަނީ، އެންމެނަށް އެނގޭނެ ފަދަ ގޮތަކަށެވެ. ޚާއްސަކޮށް، ދަރިވަރުންނާއި ކުޑަކުދިންނަށް ހަނދާން ބަހައްޓަން ފަސޭހަ ވާނެ ގޮތަށް، ޚުލާސާކޮށެވެ. އޭގެއިތުރަށް، މި ސީރީޒް ބިނާކޮށްފައި ވަނީ، ކީރިތި ގުރުއާނާއި ރަސޫލާގެ ސުންނަތްތުގެ މައްޗަށެވެ. އަދި، މި ސީރީޒް އެކުލަވާލުމުގައި ކީރިތި ރަސޫލާގެ ސިޔަރަތު ލިޔުއްވައި ތަޙުޤީޤު ކުރެއްވި ޢިލްމުވެރީންގެ ދިރާސާތަކާއި ފޮތްތަކުގެ ތެރެއިން މުޚްތަސަރު ކަމާއި މަޝްހޫރުކަމާއި ޞައްޙަކަމުގައި ޢިލްމުވެރިންގެ އަރިހުގައި އެންމެ އިތުބާރު ކުރެވިފައިވާ ފޮތްތަކަށް ވަނީ ބަލާފައެވެ. މި ޝައުގުވެރި ސިލްސިލާގެ ތެރެއިން މި ރޯދަ ގެނެސްދޭން ނިންމާފައި ވަނީ، ފުރަތަމަ ބަޔެވެ. އެއީ، މައްކާ އާބާދުވުމާ ހަމައިން ފަށައިގެން ރަސޫލާއަށް ވަހީ ބާވަލައްވައި، އެކަލޭގެފާނު ރަސޫލާ ކަމައިގެން ފޮނުއްވުމުގެ ހިސާބަށެވެ.