އިރާނަށް ހަމަލާދީ އެމެރިކާ އާއި އިޒްރޭލުން ހިންގަމުން ދަނީ ފިނޑި އަމަލުތަކެއް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.
މައުމޫން ފައުންޑޭޝަންގެ އިހްޔާ ޕްރޮގްރާމުގެ ދެވަނަ ޖަލްސާގައި ވާހަކަދައްކަމުން މައުމޫން ވިދާޅުވީ އެމެރިކާ އާއި އިޒްރޭލުން ގުޅިގެން އިސްވެ އިރާނަށް ދިން ހަމަލާތަކުގައި އެ ގައުމުގެ ރޫހާނީ ލީޑަރު، އާޔަތުالله ހާމަނާއީ އަވަހާރަކޮށްލުމަކީ މުޅި އިސްލާމީ އުންމަތަށް ލިބުނު ބޮޑު ހިތާމައެއް ކަމަށާއި އެމަނިކުފާނު އަވަހާރަކޮށްލީ އޮފީސްކޮޅުގައި މަސައްކަތްޕުޅުގައި އިންނަވަނިކޮށް ބޮން އަޅައިގެން ކަމަށެވެ.
މިއީ އަނިޔާވެރިކަމުގެ އިންތިހާއަށް ގޮސްފައިވާ އަމަލެއް ކަމަށާއި މިފަދަ އަމަލުތައް ރުހިގެން ނުވާނެކަން ފާހަގަކުރައްވަމުން މައުމޫން ވަނީ މިފަދަ އަމަލުތަކާ ދެކޮޅަށް ތެދުވަންޖެހޭނެ ކަމަށްވެސް ވިދާޅުވެފަ އެވެ.
"މިހާރު މިހިނގަމުންދާ ކަންތައްތަކަކީ ފިނޑި އަމަލުތަކެއް. ފިނޑިކަމުގެ ކޮޅެއްވެސް ނެތް އަމަލުތަކެއް. ބޮޑެތި ގައުމުތަކުގެ ވެރީން ރައްކާތެރި ތަންތާންގައި ނިދާފައި ތިބެގެން މި ފޮނުވަނީ އެކި ކަހަލަ ރޮކެޓްތަކާއި އަދިވެސް އެނޫންވެސް ނުރައްކާތެރި ހަތިޔާރުތައް ފޮނުވައިގެން އެހެން މީހުން ނިދާފައި ތިއްބާ ނުވަތަ މަސައްކަތުގައި ތިއްބާ މި މަރަނީ. މިއީ ވަރަށް ނުރައްކާތެރި އެއްވެސް އުސޫލެއް ނެތް ފިނޑި އަމަލުތަކެއް," މައުމޫން ވިދާޅުވި އެވެ.
މައުމޫން ވަނީ ހަނގުރާމައެއް ކުރަން ޖެހިއްޖެ ހާލަތެއްގައި ވެސް އެކަން ކުރަން ޖެހޭނީ އުސޫލެއްގެ ތެރެއިން ހަމަތަކެއްގެ މަތިން ކަމަށާއި އެއްގޮތަކަށް ވެސް ބޭނުންވިހާ ގޮތަކަށް މީހުންތައް މަރާ ތަންތަން ސުންނާފަތިކޮށް ހަދައިގެން ނުވާނެ ކަމަށްވެސް ވިދާޅުވި އެވެ.
އެމެރިކާ އާއި އިޒްރޭލު ގުޅިގެން އިރާނަށް ދިން ހަމަލާތަކުގެ ރައްދުގައި އިރާނުން އަންނަނީ އިޒްރޭލާއި، އެމެރިކާގެ އަސްކަރީ މަރުކަޒުތައް ހުންނަ މެދުއިރުމަތީގެ ބައެއް ގައުމުތަކަށް ވެސް ހަމަލާތައް ދެމުންނެވެ.