ދުނިޔޭގެ ނުކުޅެދުންތެރިކަން ހުންނަ މީހުންގެ ދުވަސް ފާހަގަކުރުމުގެ ގޮތުން ބްލައިންޑް އެސޯސިއޭޝަނުން އިންތިޒާމުކޮށް މާދަމާ އާއިލީ ހަވީރެއް ބޭއްވުމަށް ނިންމައިފިއެވެ.
ބްލައިންޑް އެސޯސިއޭޝަންގެ ރައީސް މުހައްމަދު މާޒިން ވިދާޅުވީ މާދަމާ ހަވީރު ހުޅުމާލޭ ރުއްގަނޑު ސަރަހައްދުގައި ވަރަށް ޚާއްސަ އާއިލީ ހަވީރެއް ބޭއްވުމަށް ހަމަޖެހިފައިވާކަމަށެވެ.
ހުކުރު ދުވަހު މޫސުން ތަންނުދިނުމުގެ ސަބަބުން ފަސްކޮށްފައިވާ އާއިލީ މި ހަވީރު މާދަމާ ފެށުމަށް ހަމަޖެހިފައިވަނީ ހަވީރު 4:00 ގައެވެ.
މާޒިން ވިދާޅުވީ ގިނަ މުއައްސަސާތަކެއްގެ އެހީތެރިކަމާއިއެކު ކުރިއަށް ގެންދާ މި ހަވީރުގައި ވީހާވެސް ގިނަ ބަޔަކު ބައިވެރިވުމަށް އިލްތިމާސްކުރާކަމަށެވެ.
މި ހަވީރުގެ މަގުސަދަކީ ލޯފަން ކުދިންގެ ހުނަރުވެރިކަން ދައްކާލުމާއި، އެ ކުދިންނަކީވެސް މުޖްތަމައުގައި މުހިންމު ބައެއްކަން އަންގައިދިނުންކަމަށް މާޒިން ވިދާޅުވިއެވެ.
ބްލައިންޑް އެސޯސިއޭޝަންގެ ނާއިބް ރައީސް އަލީ ޝަމީމް ވިދާޅުވީ މި ހަވީރުގައި ކުޑަކުދިންގެ އިތުރަށް ވީހާވެސް ގިނަ ބޮޑެތި މީހުން ބައިވެރިވުމަށް އިލްތިމާސްކުރާކަމަށެވެ. ބޮޑެތި މީހުންނަށް ޚާއްސަކޮށްގެން މި ހަވީރުގައި ވަރަށް ސަޕްރައިޒިން އިވެންޓެއް ކުރިއަށް ގެންދާނެކަމަށްވެސް ޝަމީމް ވިދާޅުވިއެވެ.
ބްލައިންޑް އެސޯސިއޭޝަންގެ ކުޑަކުދިންގެ ހަވީރުގައި އެކި އެކި މުއްސަސާތަކުންވެސް ސޯޓޯލްތައް ބަހައްޓާނެއެވެ.
އޭގެ ތެރޭގައި އެމްއެންޑީއެފް، ޕޮލިސް، އެޗްއާރުސީއެމް، ހުޅުމާލެ ހޮސްޕިޓަލް ހިމެނެއެވެ.
މީގެ އިތުރަށް މި ހަވީރު ބޭއްވުމަށް ވީމީޑިއާގެ ވީކެއާ، ރެޑްކްރެސެންޑް، އެޗްޑީސީގެ އެހީތެރިކަން ލިބިފައިވާކަން އެ އެސޯސިއޭޝަނުން ފާހަގަކުރެއެވެ.
މި އިވެންޓްގެ އަޑު ވީއެފްއެމްއިން ވަގުތުން ދުރަށް ފޮނުވުމަށް ނިންމާފައިވާއިރު، ވީޓީވީން ހަވީރުގެ ބައެއް މަންޒަރުތައް ވަގުތުން ގެނެސްދޭނެއެވެ.
މާދަމާއަކީ ދުނިޔޭގެ ނުކުޅެދުންތެރިކަން ހުންނަ މީހުންގެ ދުވަސްކަމަށްވާތީ ވީމީޑިއާއިން ޚާއްސަ ލައިވް ކަވަރޭޖެއް ކުރިއަށް ގެންދިއުމަށް ވަނީ ނިންމާފައެވެ.
ކޮންމެ އަހަރެއްގެ ދުނިޔޭގެ ނުކުޅެދުންތެރިކަން ހުންނަ މީހުންގެ ދުވަސް ކުލަގަދަކޮށް ފާހަގަކުރުމަށް ބްލައިންޑް އެސޯސިއޭޝަނުން ގެންދަނީ ގިނަ ހަރަކާތްތަކެއް ކުރިއަށް ގެންދަމުންނެވެ.
މީގެ ކުރިން އެ ހަރަކާތްތައް ކުރިއަށް ގެންގޮސްފައިވަނީ އަތޮޅުތެރޭގެ ރަށްރަށުގައެވެ.