ލޯކަލް ކައުންސިލް އިންތިހާބުގައި ގއ.ގެމަނަފުށިގެ ކައުންސިލަށް ކުރިމަތިލުމަށް އެމްޑީޕީއާއި ޖުމްހޫރީ ޕާޓީއިން އިއްތިހާދު ހަދައިފިއެވެ.
ދެޕާޓީއިން ކައުންސިލް އިންތިހާބުގައި ވާދަ ކުރާ ފަސް ކެންޑިޑޭޓުންގެ ކެމްޕެއިން ލޯންޗްކޮށްފައި ވަނީ މިދިޔަ ބުރާސްފަތި ދުވަހުގެ ރެއެވެ. އެރަސްމިއްޔާތުގައި، ޖުމްހޫރީ ޕާޓީގެ ޑެޕިއުޓީ ލީޑަރު އަދި ގެމަނަފުށީ ދާއިރާގެ މަޖިލީސް މެމްބަރު އިލްހާމް އަހްމަދު ވަނީ ބައިވެރިވެ ވަޑައިގެންފައެވެ. އަދި އެރަށުގައި ދިރިއުޅޭ ޕީޕީއެމްގެ ސަޕޯޓަރުންވެސް، އެމްޑީޕީއިން ކުރިމަތިލި ކެންޑޑޭޓުންނަށް ވޯޓް ދެއްވުމަށް އޭނާ ވަނީ ގޮވާލައްވާފައެވެ..
ގއ އަތޮޅު ކައުންސިލުގެ ގެމަނަފުށީ ގޮނޑިއަށް ކުރިމަތިލީ ޕީޕީއެމްގެ ދެ މެމްބަރުންނަކީ، ގެމަނަފުށްޓަށް ނިސްބަތް ނުވާ ދެ ބޭފުޅުން ކަމަށްވެފައި، އެމްޑީޕީގެ ފަރާތުން ކުރިމަތިލީ ކެންޑިޑޭޓަކީ ގެމަނަފުށީ ބޭފުޅަކަށް ވުމުން، އިލްހާމް ވަނީ އެމްޑީޕީގެ ކެންޑިޑޭޓަށް ވޯޓް ދެއްވުމަށް ވެސް ގޮވާލައްވާފައެވެ.
އިލްހާމް ވިދާޅުވީ، އެމްޑިޕީއާއި ގުޅިގެން ވިޔަސް، މަޖިލީހުގެ ގެމަނަފުށީ ދާއިރާގެ ގޮނޑީގައި އިންނަވަން ޖެހޭނީ ހަމަ ގެމަނަފުށީގެ ރައްޔިތެއް ކަމަށް ހެދުމަށް މަސައްކަތް ކުރުމަށް އޭނާ ހުރީ ތައްޔާރަށް ކަމަށެވެ.
މި ޖަލްސާގައި އިލްހާމް ވިދާޅުވީ، އިންތިޚާބު ކުރުމުގައި ބަލަން ޖެހޭނީ ނިސްބަތްވާ ޕާޓީއަށް ނޫން ކަމަށާއި، ތަރައްޤީއަށް ކަމަށވެ. އަދި އެމްޑީޕީގެ ކެންޑިޑޭޓުންނަށް ވޯޓް ދިނުމަށް ޖޭޕީއިން ގޮވާލީ ހިތްހެޔޮކަމާއި އިޚްލާސްތެރިކަމުގެ މިސާލެއްގެ ގޮތުން ކަމަށް އޭނާ ވިދާޅުވިއެވެ.
ގެމަނަފުށިން ވާހަކަ ދެއްކި ޖޭޕީގެ މެންބަރަކު މައުލޫމާތުދޭ ގޮތުގައި އެމްޑީޕީއާއި އެކު ކޯލިޝަން ހަދަން ޖެހުނީ، ވެފައިވާ އެއްބަސްވުމާއި ހިލާފަށް ޕީޕީއެމުން އަމަލު ކުރުމުންނެވެ.
"އެއްބަސްވެފައިވަނީ ރަށު ކައުންސިލްގެ ފަސް ގޮނޑީގެ ތެރެއިން ތިން ގޮނޑި ޕީޕީއެމަށް ދެ ގޮނޑި ޖޭޕީއަށް. ދެން ވީ ގޮތަކީ ޕީޕީއެމް ކައުންސިލް ޕްރައިމަރީއަށްފަހު ބަލިވީ ދެ މެންބަރަކު ވެސް ކައުންސިލް އިންތިހާބުގައި ވާދަ ކުރަނީ. ޕީޕީއެމުން އެމީހުންނަށް ތާއީދުކޮށް ކެމްޕޭން ވެސް ކުރަނީ،" ގެމަނަފުށިން ވާހަކަ ދެއްކި ޖޭޕީ މެންބަރު ބުންޏެވެ.