ދިވެހިންގެ މިނިވަންކަމާއި ސިޔާދަތަށް ނުރައްކާވެފައިވާ ކޮންމެ ފަހަރަކު އެކަން އެހެން ވެފައި ވަނީ ދިވެހިންގެ ތެރެއިން ބަޔަކު އިސްލާމް ދީނަށް ހިޔާނާތްތެރިވެ ފުރަގަސްދިނުމުގެ ސަބަބުން ކަމަށް ކުރީގެ ރައީސް އަދި ޑީއާރުޕީގެ މައުމޫން އަބްދުލް ގައްޔޫމް މިރޭ ވިދާޅުވެއްޖެ އެވެ.
ރާއްޖެ އިސްލާމްވި ދުވަސް ފާހަގަކުރުމަށް ޑީއާރުޕީގެ ދީނީ ގޮފިން އިންތިޒާމުކޮށްގެން ދަރުބާރުގޭގައި ބޭއްވި ބައްދަލުވުމުގައި ވާހަކަ ދައްކަވަމުން ޒައީމް މައުމޫން ވިދާޅުވީ ދިވެހިރާއްޖޭގެ މިނިވަން ކަމާއި ސިޔާދަތާ އިސްލާމްދީނާ ވަރަށް ބޮޑު ގުޅުމެއް އެބައޮތް ކަމަށާއި ދިވެހިރާއްޖެ ގައުމަކަށް ހަދައިދިން ހަގީގީ ބާރަކީ އިސްލާމްދީން ކަމަށެވެ. ބޭރުގެ ފަރާތްތަކުން ސީދާ ގޮތުންނާއި ނުސީދާ ގޮތުން އެތައް ފަހަރެއްގެ މަތިން ރާއްޖެ އަށް އެހެން ދީންތައް ގެނައުމަށާއި ރާއްޖެއިން އިސްލާމް ދީން ފޮހެލުމަށް މަސައްކަތްކޮށްފައިވާ ކަމަށް ވެސް ކުރީގެ ރައީސް މައުމޫން ވިދާޅުވި އެވެ.
ޕޯޗުގީޒުން ވެސް ރާއްޖެ ހިފުމަށް ފަހު މަސައްކަތްކުރީ ރާއްޖެއިން އިސްލާމް ދީން ފޮހެލަން ކަމަށާއި ކުރިއެކޭ އެއް ގޮތަށް މިހާރު ވެސް ރާއްޖޭގައި އެހެން ދީންތައް ފެތުރުމަށް ބޭރުގެ އެކި ފަރާތްތަކުން މަސައްކަތްކުރަމުން ގެންދާ ކަމަށް މައުމޫން ވިދާޅުވި އެވެ. ފަހުގެ ތާރީހަށް ބަލާއިރު ބޮޑެތި ބައެއް ޖަމާއަތްތަކުން ވެސް ރާއްޖޭގައި ނަސޯރާ ދީން ފެތުރުމަށް ވެސް މަސައްކަތްކޮށްފައިވާ ކަމަށާއި ނަމަވެސް އެއިން ކޮންމެ ފަހަރަކު ވެސް މާތް ﷲގެ ވާގިފުޅާ އެކު ރާއްޖެ ސަލާމަތްވެފައިވާ ކަމަށެވެ.
"މިއިން ވެސް އެނގެނީ އިސްލާމް ދީން، އެއީކަން ދިވެހިރާއްޖޭގެ މިނިވަންކަން ރައްކާތެރިކޮށް ދަމަހައްޓައިދިން އެއްޗަކީ،" ޕީއޭގެ ލީޑަރު އަދި މައުމޫންގެ ކޮއްކޯފުޅު އަބްދުﷲ ޔާމީން ވެސް ބައިވެރިވަޑައިގެންނެވި ޖަލްސާގާއި ވާހަކަ ދައްކަވަމުން މައުމޫން ވިދާޅުވި އެވެ.
ޑީއާރުޕީގެ ތެރޭގައި އުފެދިފައިވާ ބައިބައިވުމުގައި މައުމޫންގެ ފަހަތްޕުޅުގައި ތިއްބެވި އެ ޕާޓީގެ ބައެއް ޕާލަމަންޓް މެންބަރުންނާއި ގިނަ އަދަދެއްގެ އާންމުން ބައިވެރިވި ބައްދަލުވުމުގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ ދިވެހިންގެ ހަމަޖެހުން އޮތީ އިސްލާމް ދީނުގައި ތިބެގެން ކަމަށާއި އެހެން ދީނަކަށް ކުޑަ ވެސް ފުރުސަތެއް ލިބޭ ފަދަ ކަމަކަށް ފުރުސަތު ދީގެން ނުވާނެ ކަމަށެވެ.
މި ޖަލްސާގައި ވާހަކަ ދައްކަވަމުން ޑީއާރުޕީގެ ދީނީ ގޮފީގެ ރައީސް ޑރ. އަފްރާޝީމް އަލީ ވިދާޅުވީ އިމާންތެރިކަން އިތުރުކުރުމުގަ އާއި މީހުންނަށް އިސްލާމް ދީން އޮޅުންފިލުވައިދިނުމުގައި ވަކި ތަރުތީބުތަކެއް ގެންގުޅެންޖެހޭ ކަމަށާއި އެންމެ ފުރަތަމަ ފަށައިގަންނަންޖެހޭނީ އެންމެ ފަސޭހަ އިން ގަބޫލުކުރެވޭ ކަންތައްތައް ކަމަށާއި ދީނުގެ ރުކުންތަކުން ކަމަށެވެ.
"އިހަށްދުވަހު އިސްލާމް ދީނަށް ވަންނަ މީހާ ކައިރީގައި ދައްކަންޖެހޭނީ ވަރަށް އަސާސީ ވާހަކަތަކެއް. އިސްލާމްދީނުގެ ކަންތައްތަކުގެ ތަރުތީބަށް ބަލާއިރު ވަރަށް ފަހަތުގައި ހުންނަ ކަންތައްތަކުގެ ވާހަކަތައް ދެއްކުމަކީ އެއީ އާލަމީ ކުރުމެއް ނޫން،" ޑރ. އަފްރާޝީމް ވިދާޅުވި އެވެ.
އޭނާ ވިދާޅުވީ އީމާންތެރިކަން އިތުރުކުރުމަށް ކޮންމެ މީހަކު ތުނބުޅި ބަހައްޓަން ބޭނުން ނުވެދާނެ ކަމަށާއި އީމާންތެރިކަން އިތުރުކުރަން ބޭނުންވާ ކޮންމެ މީހަކީ އޭނާގެ ފައިކުރި ތަނބިކައްޓަށް ވުރެ މާ މައްޗަށް ބަހައްޓާ ފައިކުރިއަކަށް ހަދައިގެން އިމާންތެރިކަން އިތުރުކުރަން ބޭނުންވާ މީހަކަށް ނުވެދާނެ ކަމަށެވެ.
"ހެދުން އެޅުމުގައި ދީނުގައި ކަނޑައެޅުއްވި އަސްލު މަގުސަދަކީ އިއްފަތްތެރިކަން ސަލާމަތްކުރުން. އެހެން ނަމަވެސް އިއްފަތްތެރިކަން ސަލާމަތްކުރުމަށް ވަސީލަތްތައް ހުންނާނެ. އެއް ވަސީލަތްތެއް އެއީ އައުރަ ނިވާކުރުން. ނަމަވެސް މީހެއްގެ އީމާންތެރިކަން އިތުރުކުރުމަށްޓަކައި ވަކި ކުލައަކުން ވަކި ގޮތަކަށް ހެދުން އަޅާ ވާހަކަ ދެއްކީމާ، އިތްފަތްތެރިކަން ސަލާމަތްކުރަން ބޭނުންވާ ކޮންމެ އަންހެނަކަށް މި ވާހަކަ ބަލައިނުގަނެވި ހިނގައިދާނެ،" ޑރ. އަފްރާޝީމް ވިދާޅުވި އެވެ.
ޑީއާރުޕީގެ ދީނީ ގޮފީގެ ނާއިބު ރައީސް އައްޝައިހް ހަސަން ތައުފީގު ވިދާޅުވީ ބޭރުގެ އެކި ފަރާތްތަކުން ރާއްޖެ އަށް އެކި ފުރުސަތުތައް ލިބޭ ކަމަށާއި ނަމަވެސް އެފަދަ ފުރުސަތުތަކުގެ ބޭނުން ހިފާ އިރު ވަރަށް ބޮޑަށް ވިސްނަންޖެހޭނެ ކަމަށެވެ.