ކުރީގެ ރައީސް އަލްއުސްތާޒް މައުމޫން އަބްދުލް ގައްޔޫމް މިހާރު ބަންގްލަދޭޝް އަށް ކުރައްވަމުން ގެންދަވާ ދަތުރުފުޅުގައި އެ ގައުމުގެ ބޮޑުވަޒީރު ޝޭހު ހަސީނާ އާ މިއަދު ހެނދުނު ބައްދަލު ކުރައްވައިފި އެވެ.
މައުމޫން ފައުންޑޭޝަނުން ނެރުނު ބަޔާނެއްގައި ބުނެފައި ވަނީ ބަންގްލަދޭޝްގެ ޔުނިވަސިޓީ އޮފް ސައިންސް އެންޑް ޓެކްނޮލޮޖީ ޗިޓަގޮންގެ އިނާމު ދިނުމުގެ ރަސްމިއްޔާތު ޝަރަފުވެރި ކޮށްދެއްވުމަށް އެ ޔުނިވަސިޓީން ދެއްވި ދައުވަތަށް އެ ގައުމަށް މައުމޫން ވަޑައިގެން ޝޭހު ހަސީނާ އާ އެކު މިއަދު ބޭއްވެވި ބައްދަލު ކުރެއްވުމުގައި ދެ ގައުމުގެ މެދުގައި ކުރިއްސުރެ އޮންނަ ގުޅުމާ މެދު ދެ ބޭފުޅުން ވާހަކަ ދެއްކެވި ކަމަށެވެ. އަދި ސާކްގެ ގުޅުމާއި ތައުލީމުގެ މުހިންމު ކަމާ މެދު ދެ ބޭފުޅުން ވެސް މަޝްވަރާ ކުރެއްވި ކަމަށް މައުމޫން ފައުންޑޭޝަނުން ބުނެ އެވެ.
މި ބައްދަލު ކުރެއްވުމުގައި ޝޭހު ހަސީނާ ވަނީ މިއީ މައުމޫން ބަންގްލަދޭޝް އަށް ކުރައްވާ ހަ ވަނަ ދަތުރުފުޅު ކަމަށްވާތީ އެކަމާ ވަރަށް ބޮޑަށް އުފާ ކުރައްވާ ކަމަށް ވިދާޅުވެ މައުމޫނަށް ހޫނު މަރުހަބާއެއް ވިދާޅުވެފައި ކަމަށް މައުމޫން ފައުންޑޭޝަންގެ ބަޔާނުގައިވެ އެވެ. އަދި ސާކް އުފެދުނީ ޝޭހު ހަސީނާގެ ބައްޕާފުޅު ޝޭހު މުޖީބުއްރަހުމާންގެ ތަސައްވުރަކަށް ކަމަށް ވާއިރު ސާކް އުފެއްދެވި ބާނީންގެ ތެރޭގައި މައުމޫން ހިމެނިވަޑައިގަންނަވާކަން ފާހަގަ ކުރައްވައި، އެ މަނިކުފާނަށް ބަންގްލަދޭޝްގެ ރައްޔިތުން ކުރާ އިހުތިރާމް އެކަމަނާގެ ވާހަކަފުޅުގައި ފާހަގަ ކުރެއްވި ކަމަށް ވެސް މައުމޫން ފައުންޑޭޝަނުން ބުނެ އެވެ.
މި ބައްދަލު ކުރެއްވުމުގައި ޝެއިހު ހަސީނާ ވިދާޅުވެފައި ވަނީ މައުމޫނަކީ ހަމައެކަނި ރާއްޖެ އަށް ހިދުމަތް ކުރެއްވި ލީޑަރެއް ނޫން ކަމަށާއި ދެކުނު އޭޝިއާ ސަރަހައްދުގެ ތަރައްގީ އާއި ކުރިއެރުމަށް އެ މަނިކުފާނު ހިދުމަތް ކޮށްދެއްވާފައިވާ ކަމަށެވެ. އެ ގޮތުން އަސާސީ ތައުލީމަށް މައުމޫން ދެއްވި އަހައްމިއްޔަތަކީ ރާއްޖެ އަށް ލިބިފައިވާ އިގުތިސާދީ އަދި އިޖުތިމާއީ ތަރައްގީގެ އަސްލު ކަމަށް ވިދާޅުވެ، ތައުލީމް އާންމު ކުރުމަށް މި ސަރަހައްދުގެ އިތުރު މަސައްކަތްތަކެއް ކުރުމުގެ މުހިންމުކަން ޝޭހު ހަސީނާ ފާހަގަ ކުރެއްވި ކަމަށް ވެސް މައުމޫން ފައުންޑޭޝަނުން ބުނެ އެވެ.
މައުމޫން ވަނީ އެ މަނިކުފާނު ބަންގްލަދޭޝް އަށް ކުރައްވާ ދަތުރުފުޅުގެ އިންތިޒާމްތައް ހަމަޖެހިފައިވާ ފުރިހަމަކަން ފާހަގަ ކުރައްވައިފަ އެވެ. މީގެ އިތުރުން ބަންގްލަދޭޝްގެ ސަރުކާރުން ތައުލީމަށް ދޭ ހާއްސަ އަހައްމިއްޔަތަށް މައުމޫން ތައުރީފު ކުރެއްވި ކަމަށް ވެސް މައުމޫން ފައުންޑޭޝަނުން ބުނެ އެވެ.