މި އަހަރުގެ ރިޔާސީ އިންތިހާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމަށް ތާއީދު ކުރައްވަން އުމަރު ނަސީރު ނިންމަވައި އޭނާ މިއަދު އެކަން އިއުލާންކުރައްވައިފި އެވެ. މޫކައި ސުއިޓްގައި ބޭއްވި ނިއުސް ކޮންފަރެންސްގައި އުމަރު ވިދާޅުވި ގޮތުގައި އެގޮތަށް ނިންމީ އޭނާގެ ޓީމާ އެކު މަޝްވަރާ ކުރެއްވުމަށް ފަހު އެވެ. އަދި ގާސިމަށް ތާއީދު ކުރަން ނިންމެވުމުގެ ކުރިން ރާއްޖޭގެ ސިޔާސީ މަސްރަހު ވެސް ވަރަށް ބޮޑަށް ދިރާސާ ކުރެއްވި ކަމަށް އުމަރު ވިދާޅުވި އެވެ. "ރާއްޖޭގައި މި ފަހަރުގެ ރިޔާސީ އިންތިހާބުގައި ވާދަކުރައްވާ ބޭފުޅުންތަކުގެ ތެރެއިން މި ގައުމުގެ ގައުމިއްޔަތު ހިފަހައްޓައި އަޅުގަނޑުމެންގެ ދީން ހިމާޔަތްކޮށް، ކޮރަޕްޝަންގެ މަގުން ދައުލަތުގެ ތެރެއަށް އަތް ބާނައި ދައުލަތުން ނާޖާއިޒް ގޮތްގޮތަށް ފައިސާ ނުނަގާނެ ކަމުގެ ޔަގީންކަން އޮތީ ކޮން ކެންޑިޑޭޓަކަށްތޯ އަޅުގަނޑުމެން ވަރަށް ބޮޑަށް ބެލިން. އަޅުގަނޑުމެންގެ ޓީމަކީ އަމާނާތްތެރިކަމަށް ވަރަށް ބޮޑަށް ވަކާލާތު ކުރާ ޓީމެއް. މިހާ ހިސާބަށް އަޅުގަނޑުމެން ވާނީ ހުދު ވަލެެއްގެ ވާހަކަ ވެސް ދައްކާފައި،" އުމަރު ވިދާޅުވި އެވެ.އުމަރު ވިދާޅުވީ އޭނާ ކުރިން ހުންނެވި ޕީޕީއެމް ހިންގަނީ އެ ޕާޓީގެ ރައީސް މައުމޫން އަބްދުލް ގައްޔޫމްގެ ވިސްނުންފުޅާ އެކު ނޫން ކަމަށެވެ. އަދި ޕީޕީއެމްގެ މެމްބަރުންގެ ގޮތުގައި ތިބެ އެ ޕާޓީން ނުކުމެ ގާސިމަށް ތާއީދު ކުރަން ނިންމެވީ ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނަށް ތާއީދު ކުރަން ބޭނުން ނުވާތީ ކަމަށް ވެސް އުމަރު ވިދާޅުވި އެވެ.އުމަރު ވިދާޅުވީ ކުރިން ވެސް އަދި މިހާރު ވެސް އޭނާގެ ޓީމުން މައުމޫނަށް ތާއީދު ކުރާ ކަމަށެވެ. އެކަމަކު އޭނާ ވިދާޅުވީ "އަބްދުﷲ ޔާމީނަކީ ރައީސް މައުމޫނެއް ނޫން" ކަމަށާއި މައުމޫންގެ ވެރިކަމެއްގައި "ހުރިހާ ހަތުރު ކަމެއް" މައުމޫނަށް ލިބުނީ ޔާމީނާ ހެދި ކަމަށް އުމަރު ވިދާޅުވި އެވެ. "އެހެންވީމާ އަޅުގަނޑުމެންނަށް ނެތް ޕީޕީއެމްގެ ކެންޑިޑޭޓަކަށް އަބްދުﷲ ޔާމީން ވުމަކުން އަބްދުﷲ ޔާމީނަށް ތާއީދު ކޮށްދެވޭކަށެއް،" ޕީޕީއެމްގެ ރިޔާސީ ޕްރައިމަރީގައި ޔާމީނާ ވާދަކުރައްވައި ނާކާމިޔާބުވި އުމަރު ވިދާޅުވި އެވެ. ޕީޕީއެމްގެ ކައުންސިލް ބައެއް މެމްބަރުންނާއި ބައެއް އާންމު މެމްބަރުންނާ އެކު ބޭއްވި ނިއުސް ކޮންފަރެންސްގައި އުމަރު ވިދާޅުވީ އޭނާ ޖުމްހޫރީ ކޯލިޝަނާ ގުޅިވަޑައިގަތީ އޭނާގެ "ޓީމް އުމަރަށް" ޕާޓީއެއްގެ ހައިސިއްޔަތު ދޭގޮތަށް ކަމަށެވެ.  އެގޮތުން ޖުމްހޫރީ ކޯލިޝަންގެ ސަރުކާރެއްގައި އުމަރުގެ ޓީމްގެ ވަރަށް ބޮޑު ދައުރެއް ވެސް އޮންނާނެ ކަމަށާއި އަދި އޭނާ ވެސް އެ ސަރުކާރުގެ މަގާމެއް ފުރުއްވާނެ ކަމަށް އުމަރު ވިދާޅުވި އެވެ. ނަމަވެސް ރިޔާސީ އިންތިހާބު ނިމުމުގެ ކުރިން އެއްވެސް ސިޔާސީ ޕާޓީއަކާ ގުޅިވަޑައިނުގަންނަވާނެ ކަމަށް އުމަރު ވިދާޅުވި އެވެ.       "އަޅުގަނޑުމެން ޖުމްހޫރީ ގުޅުމަށް ސަރުކާރު ހޯދައިދޭނަން. ހޯދައި ދީފައި މި ސަރުކާރުގެ ތެރޭގައި ހަމަ ސިޔާސީ ޕާޓީއެއްގެ ދައުރުގައި އަޅުގަނޑުމެން ތިބޭނަން އިރާދަކުރެއްވިއްޔާ ފަސް އަހަރު ވަންދެން،" އޭނާ ވިދާޅުވި އެވެ.       އުމަރު ވިދާޅުވީ ޔާމީނަށް އިންތިހާބު ކާމިޔާބު ނުކުރެވޭނެ ކަމެވެ. އޭނާ ވިދާޅުވި ގޮތުގައި ޕީޕީއެމަކީ ޔާމީން ކުރިން ހިންގެވި ޕީއޭ އިން ހިސޯރުކޮށްފައިވާ ޕާޓީއެކެވެ. އެހެންވެ މިހާރު ޕީޕީއެމްގެ އޮޑިން ލަކުޑިގަނޑު ނެއްޓިގެން އަންނަ ތަން ފެންނަ ކަމަށާއި ކުރިއަށް އޮތް ތަނުގައި ވެސް އެ ޕާޓީން މީހުން ވަކިވާނެ ކަމަށް އުމަރު ވިދާޅުވި އެވެ.