ނޫސްވެރިކަމުގެ އަމަލީ ތަޖުރިބާ ހޯދުމަށް ކުރިމަތިލުމުގެ ފުރުސަތު "ހަވީރު"ން ހުޅުވާލައިފި އެވެ.
މިއީ ރާއްޖޭގެ އެންމެ ގިނަ ދުވަސް ވީ ދުވަހު ނޫހާއި އެންމެ ގިނަ ބަޔަކު ބަލާ ވެބްސައިޓް ހަވީރު އޮންލައިންގައި މަސައްކަތްކުރަން ޝައުގުވެރިވާ ފަރާތްތަކަށް ފުރުސަތު ދިނުމަށް ކުރިއަށް ގެންދާ އިންޓާންޝިޕް ޕްރޮގްރާމެއް ކަމަށް "ހަވީރު"ން ބުންޏެވެ.
ތިން މަސް ދުވަހުގެ މި އިންޓާންޝިޕްގައި ތިން ދާއިރާއަކުން ފުރުސަތު ވަނީ ހުޅުވާލާފަ އެވެ. އެއީ ރާއްޖޭގެ ޚަބަރުތައް އުފެއްދުމާއި އިނގިރޭސި އެޑިޝަން އަދި ވާހަކަލިޔުމެވެ.
އިންޓާންޝިޕްގެ ބައިވެރިންނަށް މަހަކު 1،500 ރުފިޔާގެ އެލަވަންސެއް ދޭ ގޮތަށް ވަނީ ހަމަޖެހިފަ އެވެ. އަދި ތިން މަސްދުވަހުގެ މަސައްކަތަށް ބެލުމަށް ފަހު އޭގެ ތެރެއިން އެންމެ ރަނގަޅު ތިން ނޫސްވެރިއަކަށް "ހަވީރު"ން ވަޒީފާ ދޭނެ އެވެ.
"ހަވީރު" ގެ އެޑިޓަރު މޫސާ ލަތީފު ވިދާޅުވި ގޮތުގައި އިންޓާންޝިޕްގެ ބައިވެރިންނަށް ނޫސްވެރިކަމުގެ ގިނަ ތަޖުރިބާތަކެއް ލިބޭނެ އެވެ. އަދި ރާއްޖޭގައި ލިއުންތެރިކަން ރަނގަޅު ނުސްވެރިން އުފެއްދުމަކީ "ހަވީރު"ގެ ވަރަށް ބޮޑު މަގުސަދެއް ކަމަށް ވެސް މޫސަ ވިދާޅުވި އެވެ.
"އިންޓާންޝިޕެއް މި ހުޅުވާލީ ހަވީރު ނިއުސްރޫމްގައި މަސައްކަތްކޮށް އެ ކުދިންނަށް ތަޖުރިބާ ހޯދައިދޭން. އަމަލީ ގޮތުން ވަރަށް ގިނަ ފުރުސަތުތަކެއް ލިބޭނެ. ހަވީރުގެ ނޫސްވެރިންނާ އެކު މަސައްކަތްކުރެވޭނެ. އަޅުގަނޑުމެން މި އިންޓާންޝިޕްގެ ބައިވެރިންނަށް އެތެރޭގައި ނޫސްވެރިކަމުގެ ސްޓައިލްތަކާއި ލިއުންތައް ބައްޓަންކުރަންވާ ގޮތް ކިޔައިދޭނެ،" މޫސަ ވިދާޅުވި އެވެ.
އޭނާ ވިދާޅުވި ގޮތުގައި ހަވީރު އޮންލައިނަކީ ވަގުތުން ވަގުތަށް ޚަބަރު ގެނެސްދޭ ސައިޓަކަށް ވާތީ ހަވީރުގައި މަސައްކަތް ފަށާ ޒުވާނުންނަށް ވަރަށް ރަނގަޅު ތަޖުރިބާތަކެއް ހޯދޭނެ އެވެ.
"ޝައުގުވެރިކަން ބޮޑު ދާއިރާއެއް ނޫސްވެރިކަމަކީ. އަނެއްކާ ރާއްޖޭގައި ކުރިމަގު ވެސް އޮތް މަސައްކަތެއް މިއީ،" މޫސަ ވިދާޅުވި އެވެ.
"ރަނގަޅު ނޫސްވެރިން އުފެއްދުން ހަވީރުގެ މަގުސަދަކީ. އެހެންވެ ޒުވާން ނޫސްވެރިން އުފެއްދުމުގެ މަސައްކަތް އަބަދުވެސް ހަވީރުން ކުރަމުން ދޭ. އޭގެ ބައެއް އަނެއްކާ މި ހުޅުވާލީ."
އިންޓާންޝިޕްގައި ބައިވެރިވުމަށް އެދި މި މަހު 15 ގެ ކުރިން "ހަވީރަ"ށް ހުށަހަޅަން ޖެހެ އެވެ.