ރާއްޖޭގެ ދާޚިލީ ކަންތައްތަކުގެ ތެރެއަށް ބޭރުގެ ފަރާތްތަކުންވަދެ، ނުފޫޒް ފޯރުވޭނެ ގޮތަކަށް އިންކުއަރީ ކޮމިޝަންގެ މަސައްކަތްތައް ބައްޓަންވެފައިވާ ކަމަށް ބުނެ ދެވަނަ ފަހަރަށް އިންކުއަރީ ކޮމިޝަނަށް މައުލޫމާތު ދެއްވަން ބޭނުންނުވާ ކަމުގައި ޕީޕީއެމްގެ އިންތިގާލީ ނައިބް ރައީސް އުމަރު ނަސީރު ވިދާޅުވެއްޖެއެވެ.
ކޮމިޝަނަށް ބަޔާން ދެއްވުމަށް އުމަރު ނަސީރުގެ ކިބައިން އެދިވަޑައިގަތުމާއި ގުޅިގެން އެކޮމިޝަންގެ ޗެއަރ، އިސްމާއިން ޝަފީޢު ފޮނުވާފައިވާ ސިޓީގެ ޖަވާބުގައި އުމަރު ވިދާޅުވެފައިވަނީ މިހާރުގެ ކޮމިޝަންގައި ބޭރުގެ ފަރާތްތަކުގެ ނުފޫޒުގަވަދެ ވަކި ގޮތަކަށް ކޮމިޝަން ހިނގަމުންދާ ދަނޑިވަޅެއްގައި ކޮމިޝަނަށް ހާޒިރުވެ ވަޑައިގެން މައުލޫމާތު ދެއްވެވެން ނެތްކަމަށެވެ.
ކޮމިޝަންގައި އޮބްޒާވަރުގެ ގޮތުގައި ތިއްބަވާ ބޭފުޅުންވެސް އެބޭފުޅުންގެ މެންޑޭޓުން ބޭރުވެ ކޮމިޝަނަށް ހާޒިރުކުރެވޭ ބޭބޭފުޅުންނާއި ސުވާލް ކުރައްވައި، ސުވާލުތައް ބައްޓަން ކުރައްވައި ހައްދަވަމުން ގެންދަވާކަމީ މިހާރުގެ ކޮމިޝަނާމެދު ކަންބޮޑުވެވަޑައިގަންނަވާ ކަމެއް ކަމުގައި އުމަރު ވިދާޅުވެފައިވެއެވެ.
" 17 ޖޫން 2012 ގައި ތިޔަ ކޮމިޝަން އަލަށް އެކުލަވާ ލެއްވުމަށް ފަހު އެކިއެކި ބޭފުޅުން ހާޒިރުކޮށް ސުވާލުކުރައްވަމުން ގެންދަވާއިރު ރައީސުލްޖުމްހޫރިއްޔާ ތިޔަ ކޮމިޝަނަށް ކަނޑައެޅުއްވި ބޭފުޅުން ނޫން ބޭފުޅުން ވެސް ކޮމިޝަންގެ މަސައްކަތުގެ ތެރެއަށް އަމިއްލަފުޅަށް ވަދެވަޑައިގެން ހާޒިރުކުރެވޭ އެކިއެކި ބޭފުޅުންނާ ސުވާލު ކުރައްވަމުން ގެންދަވާކަމުގެ މައުލޫމާތު ވަނީ އަޅުގަނޑަށް ލިބިފަ އެވެ." އުމަރު ނަސީރުގެ ސިޓީގައިވެ އެވެ.