ނޭޓޯގެ އެއްބައިވަންތަކަން ދެމެހެއްޓުމަށާއި ޔޫކްރެއިންގެ ދިފާއުގައި އެހީތެރިކަން ފޯރުކޮށްދިނުން ކުރިއަށް ގެންދިއުމަށް އިނގިރޭސި ރަސްގެފާނު ޗާލްސް III ގޮވާލައްވައިފިއެވެ.
އެމެރިކާގެ ކެޕިޓޮލްގައި ތަގުރީރު ކުރައްވަމުން، ޗާލްސް ވަނީ ދެ ޤައުމުގެ ދެމެދުގައި އޮތް ތާރީޚީ ރަހުމަތްތެރިކަން ދެމެހެއްޓުމަށް ވެސް ގޮވާލައްވާފައެވެ.
​ހަތަރު ދުވަހުގެ ރަސްމީ ދަތުރުފުޅެއްގައި އެމަނިކުފާނު އެމެރިކާއަށް ވަޑައިގެން މި ތަގުރީރު ދެއްވާފައިވަނީ، އެމެރިކާ އާއި އިސްރާއީލުން ގުޅިގެން އީރާނާ ދެކޮޅަށް ހަނގުރާމަ ކުރަމުންދާ ވަގުތެއްގައެވެ. އަދި މިއީ ޓްރަމްޕް ނޭޓޯއަށް އަމާޒުކޮށް ފާޑުކިޔުންތައް އަމާޒުކުރަމުންދާ ދަނޑިވަޅެއްގެ އިތުރުން، ދެ ޤައުމުގެ މެދުގައި ވިޔަފާރީގެ ޓެކްސް މައްސަލަތައް ވެސް ހޫނުވެފައިވާ ވަގުތެކެވެ.
ތަގުރީރުގެ ފެށުން ވަރަށް ލުއިކޮށް ކުރިއަށް ގެންދަވަމުން ރަސްގެފާނު ވިދާޅުވީ، ވޮޝިންޓަން ޑީސީއަކީ "ދެ ޖޯޖުންގެ ވާހަކައެއް" ކަމަށެވެ. އެމަނިކުފާނު އެހެން ވިދާޅުވީ އެމެރިކާގެ ފުރަތަމަ ރައީސް ޖޯޖް ވޮޝިންޓަން އާއި އެމަނިކުފާނުގެ ކާބަފައިން ކަމަށްވާ ބްރިޓަނޭގެ ރަސްގެފާނު ޖޯޖް III އަށް އިޝާރާތް ކުރައްވައެވެ. އަދި އެމަނިކުފާނު އެމެރިކާއަށް ވަޑައިގެންނެވީ "އިންގިލާބީ ހަނގުރާމައިގެ ފަހަތުން އަންނަ ސިއްރު ހަމަލާއެއްގެ ގޮތުގައި ނޫން" ކަމަށް ވިދާޅުވުމުން މަޖިލީހުގެ ތެރެއިން ހޫނު އަތްތިލަބަޑިއެއްގެ އަޑު އިވިގެންދިޔައެވެ.
ނޭޓޯގެ ބަދަހިކަމާ ގުޅޭގޮތުން ވާހަކަފުޅު ދައްކަވަމުން، 2001 ވަނަ އަހަރުގެ ސެޕްޓެމްބަރު 11 ގެ ހަމަލާތަކަށްފަހު ނޭޓޯގެ 5 ވަނަ މާއްދާގެ ދަށުން ގައުމުތައް ގުޅިގެން ޖަވާބުދިން ގޮތް ފާހަގަކުރެއްވިއެވެ. އަދި ވޭތުވެދިޔަ ގަރުނެއްހާ ދުވަހު ދެ ބޮޑު ހަނގުރާމަ އާއި، ކޯލްޑް ވޯ އަދި އަފްޣާނިސްތާނުގައި ދެ ޤައުމުން "ކޮނޑާ ކޮނޑު ޖައްސައިގެން" މަސައްކަތް ކޮށްފައިވާކަން ހަނދާންކޮށްދެއްވިއެވެ.
ހައުސްގެ ރައީސް މައިކް ޖޯންސަންއަށް އަމާޒުކުރައްވައި ރަސްގެފާނު ވިދާޅުވީ، ޔޫކްރެއިންގެ ހިތްވަރުގަދަ ރައްޔިތުން ދިފާއުކުރުމަށް މިއަދު އެ ނުގުޑާފަދަ އަޒުމް ބޭނުންވާ ކަމަށެވެ. މިއީ ރިޕަބްލިކަން މެޖޯރިޓީ އޮންނަ ކޮންގްރެސްއިން ޔޫކްރެއިންއަށް ދޭ މާލީ އެހީތެރިކަން ކުޑަކުރަން މަސައްކަތް ކުރަމުންދާ ވަގުތެއްގައި ދެއްވި ވަރުގަދަ އިޝާރާތެކެވެ.
ތިމާވެށީގެ މައްސަލަތަކަށް ސަމާލުކަން ނުދީފިނަމަ އެއީ ޤައުމީ ސަލާމަތަށް އޮތް ނުރައްކަލެއް ކަމަށް ރަސްގެފާނު ވިދާޅުވިއެވެ. މިއީ މޫސުމީ ބަދަލުތަކަކީ "މަކަރުވެރި ކަމެއް" ކަމަށް ބުނެ ޕެރިސް އެއްބަސްވުމުން ވަކިވި ޓްރަމްޕްގެ ސިޔާސަތަށް ދެއްވި ރައްދެއް ކަމަށް ބެލެވެއެވެ.
ޤާނޫނުގެ ވެރިކަމާއި މިނިވަން ޝަރުޢީ ނިޒާމެއްގެ މައްޗަށް ދެ ޤައުމުގެ ގުޅުން ބިނާވެފައިވާކަން ފާހަގަކުރައްވައި، ވެރިކަން ކުރާ ފަރާތްތައް ކޮންޓްރޯލް ކުރެވެންޖެހޭނެ ކަމަށް ރަސްގެފާނު ވިދާޅުވިއެވެ. މިއީ ޓްރަމްޕްގެ ދައުރުގައި ޖަސްޓިސް ޑިޕާޓްމަންޓް ސިޔާސީ ކުރަމުންދާ ކަމަށް ކުރެވޭ ތުހުމަތުތަކާ ގުޅުވައި ދެއްވި ނުރަސްމީ ރައްދެއް ކަމަށް މުހައްލިލުން ބުނެއެވެ.
ތަގުރީރަށްފަހު ރަސްގެފާނާއި ރާނީ ކެމިލާ ވަނީ ޓްރަމްޕް ބާއްވާ ރަސްމީ ސްޓޭޓް ޑިނަރގައި ބައިވެރިވެވަޑައިގެންފައެވެ. މި ދަތުރުފުޅުގައި ނިއުޔޯކް އާއި ވާޖީނިއާއަށް ވަޑައިގަތުމަށްފަހު، ބުރާސްފަތި ދުވަހު ވައިޓް ހައުސްގައި ބާއްވާ ވަދާއީ ރަސްމިއްޔާތުން މި ދަތުރުފުޅު ނިންމަވާލައްވާނެއެވެ.