ދުނިޔެއަށް ކުރިމަތިވެފައިވާ ދަތި ދަނޑިވަޅެއްގައި، އިނގިރޭސިވިލާތާއި ޗައިނާއާ ދެމެދު އޮންނަ ގުޅުން މިހާރަށް ވުރެ ބަދަހިކުރުމަށް އިނގިރޭސި ބޮޑުވަޒީރު ކިއާ ސްޓާމާ އިއްޔެ ގޮވާލައްވައިފި އެވެ.
ޗައިނާގެ ރައީސް ޝީ ޖިންޕިންއާ ބައްދަލުކުރައްވައި ސްޓާމާ ވިދާޅުވީ، ދުނިޔޭގެ ހަމަޖެހުމާއި މޫސުމަށް އަންނަ ބަދަލުތަކުގެ އިތުރުން ބައިނަލްއަގުވާމީ މުހިންމު އެކި މައްސަލަތަކުގައި ދެ ގައުމު ގުޅިގެން މަސައްކަތް ކުރަންޖެހޭ ކަމަށެވެ.
"އިނގިރޭސިވިލާތާއި ޗައިނާއާ ދެމެދު ދިގު މުއްދަތުގެ، ދެމެހެއްޓެނިވި އަދި ފުރިހަމަ ގުޅުމެއް އޮންނަންޖެހޭނެ ކަމަށް އަޅުގަނޑު އަބަދު ވެސް ގަބޫލުކުރަން،" ބޮޑުވަޒީރު ވިދާޅުވި އެވެ.
ވޭތުވެދިޔަ އަށް އަހަރު ދުވަހުގެ ތެރޭގައި ޗައިނާއަށް ޒިޔާރަތްކުރެއްވި އިނގިރޭސިވިލާތުގެ ފުރަތަމަ ބޮޑުވަޒީރުގެ ހައިސިއްޔަތުން، ސްޓާމާ ވަނީ ބެއިޖިންގެ ގްރޭޓް ހޯލް އޮފް ދަ ޕީޕަލްގައި ރައީސް ޝީއާ އިއްޔެ ބައްދަލުކުރައްވާފަ އެވެ. މި ބައްދަލުވުމަކީ ފާއިތުވި އަހަރުތަކުގައި ދެ ގައުމުގެ މެދުގައި އުފެދިފައިވާ ނުތަނަވަސްކަން ކުޑަކޮށް، ގުޅުން ރަނގަޅުކުރުމަށް ކުރެވޭ މަސައްކަތުގެ ބައެކެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުތަކުގެ ސަބަބުން ބައިނަލްއަގުވާމީ ވިޔަފާރިއަށް ކުރިމަތިވެފައިވާ ބަދަލުތަކާ އެކު، ގިނަ ގައުމުތަކަކުން މިހާރު އަންނަނީ ވިޔަފާރި އާއި އިންވެސްޓްމަންޓްތައް ފުޅާކުރުމަށް އިސްކަންދެމުންނެވެ.
ސްޓާމާއަކީ މި މަހުގެ ތެރޭގައި ޗައިނާއަށް ޒިޔާރަތްކުރެއްވި އެމެރިކާގެ ގާތް އެކުވެރި ގައުމުތަކުގެ ހަތަރުވަނަ ލީޑަރެވެ. މީގެ ކުރިން ދެކުނު ކޮރެއާ، ކެނެޑާ އަދި ފިންލޭންޑްގެ ލީޑަރުން ވަނީ ޗައިނާއަށް ވަޑައިގެންފަ އެވެ. އަދި އަންނަ މަހު ޖަރުމަނުގެ ޗާންސެލަރު ޗައިނާއަށް ޒިޔާރަތްކުރައްވާނެ ކަމަށް ބެލެވެ އެވެ.
ޖުލައި 2024ގައި ބޮޑުވަޒީރުކަމާ ހަވާލުވެވަޑައިގަތް ސްޓާމާ، މި ދަތުރުގައި މަސައްކަތް ކުރައްވަނީ އިނގިރޭސިވިލާތުގެ އިގްތިސާދު މަޑުޖެހިފައިވާ ދަނޑިވަޅެއްގައި، އެ ގައުމުގެ ކުންފުނިތަކަށް ވިޔަފާރީގެ އާ ފުރުސަތުތައް ހޯދައިދިނުމަށެވެ. މި ދަތުރުގައި އިނގިރޭސިވިލާތުގެ 50އަށް ވުރެ ގިނަ އިސް ވިޔަފާރިވެރިންނާއި ސަގާފީ އިދާރާތަކުގެ އިސްވެރިން ބައިވެރިވެވަޑައިގަންނަވަ އެވެ.
ޝީގެ އިތުރުން، ސްޓާމާ ވަނީ ޗައިނާގެ ގާނޫނު ހަދާ މަޖިލިސް، ނޭޝަނަލް ޕީޕަލްސް ކޮންގްރެސްގެ ޗެއާމަން ޒާއޯ ލެޖީއާ ވެސް ބައްދަލުކުރައްވާފަ އެވެ.
ވޭތުވެދިޔަ އަހަރުތަކުގައި ދެ ގައުމުގެ ގުޅުން ހީނަރުވެފައިވަނީ، އިނގިރޭސިވިލާތުގައި ޗައިނާއިން ޖާސޫސީ ހަރަކާތްތައް ހިންގާ ކަމަށް ކުރެވޭ ތުހުމަތުތަކާއި ޔޫކްރެއިން ހަނގުރާމައިގައި ރަޝިޔާއަށް ޗައިނާއިން އެހީތެރިވާ ކަމަށް ބުނާ މައްސަލަ އަދި 1997 ވަނަ އަހަރު އިނގިރޭސިންގެ އަތުން ޗައިނާއާ ހަވާލުކުރި ހޮންކޮންގުގެ މިނިވަންކަމަށް ހުރަސްއަޅާ ކަމަށް ބުނެ ދެކެވޭ ވާހަކަތަކާ ގުޅިގެންނެވެ.