ޗާންދަނީ މަގުގައި ހުންނަ އެމްޑީޕީގެ 'ދަނޑިކޮށި' ޖަގަހައަށް ރޭ ބަޔަކު ކަޅުތެޔޮ ޖެހި މައްސަލަ ފުލުހުން ބަލަން ފަށައިފި އެވެ.
ވީ ކިހިނެއް؟ - އިދިކޮޅު އެމްޑީޕީ ޖަގަހައިގެ ބޭރު ފާރުގައި ވެރިކަންކުރާ ޕީއެންސީގެ ބައެއްގެ ފޮޓޯ ޖަހާފައިވެ އެވެ. އެއީ ވަގު ފޯމުތައް ލައިގެން ޕީއެންސީއަށް މެންބަރުން އިތުރުކުރާ މީހުން ކަމަށް ތުހުމަތުކޮށް، އެ ފޮޓޯތަކުގައި އެގޮތަށް ލިޔެފައިވެ އެވެ.
ރޭގެ ވަގުތެއްގައި ކަޅުތެޔޮ ޖަހާފައި ހުރީ އެ ފޮޓޯތަކަށެވެ.
ބުނީ ކީކޭ؟ - "ރޭ 1 ޖަހާކަށް ހާއިރު ޗާންދަނީ މަގުގައި ހުންނަ އެމްޑީޕީ ދަނޑިކޮށި ޖަގަހައަށް ކަޅުތެޔޮ ޖެހި މައްސަލަ ފުލުހުންނަށް ރިޕޯޓްކޮށްފައިވޭ. މި މައްސަލަ ފުލުހުން ދަނީ ތަހުގީގު ކުރަމުން،" ފުލުހުން މިއަދު މީޑިއާތަކަށް ފޮނުވި މެސެޖުގައިވެ އެވެ.
ގުޅުން ހުރި - ސަރުކާރަށް އެއް އަހަރު ވުމުގެ ކުރިން 75،000 މެންބަރުން ހަމަ ކުރުމަށް ހިންގާ މެންބާޝިޕް ޑްރައިވްގެ ތެރެއިން ބައެއް މީހުންނަށް ނޭނގި އެ މީހުން ޕީއެންސީއަށް ވެއްދި ކަމުގެ ތުހުމަތު އެ ޕާޓީއަށް ދިޔައީ އަމާޒުވަމުންނެވެ.
އޭގެ ފަހުން އެމްޑީޕީގެ ދަފްތަރުގައި ތިބި އެ ޕާޓީގެ ބައެއް މެންބަރުން އެ މީހުންނަށް ނޭނގި ޕީއެންސީއަށް ވައްދާފައިވާ މައްސަލަ މި ފަހުން ފެންމަތިވި އެވެ. އޭގެ ތެރޭގައި އެމްޑީޕީގެ ގައުމީ މަޖިލީހުގެ ބައެއް މެންބަރުންނާއި ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސެން ޒިޔާދު (ފިއްޓެ) ވެސް ހިމެނެ އެވެ.
ޕީއެންސީން އެ ތުހުމަތުތަކާ ގުޅޭ ގޮތުން ފުރަތަމަ ފަހަރަށް ވާހަކަ ދެއްކީ އިއްޔެ އެވެ. އެ ޕާޓީން ބުނީ "މަދުން ނަމަވެސް" ސައްހަ ނޫން ފޯމުތަކެއް އުޅޭކަން ފާހަގަ ކުރެވިފައިވާ ކަމަށާއި އެކަން ބެލުމުގެ ގާބިލް ކަމެއް ޕާޓީގައި ނެތް ކަމަށެވެ. ވަގު ފޯމެއްކަން ބަލަން ޖެހޭނީ އިލެކްޝަންސް ކޮމިޝަން (އީސީ)ން ކަމަށް ވެސް އެ ޕާޓީން ނެރުނު ބަޔާނުގައި ބުނެފައިވެ އެވެ.