ރާއްޖޭގައި ފާލުބަލަން އުޅުނު އިންޑިއާ ފާދިރީންތަކެއް ޑީޕޯޓު ކޮށްލުމުގެ މަސައްކަތް އިމިގްރޭޝަނުން ފަށައިފިއެވެ.
އިމިގްރޭޝަނުން އެކްސްގައި ކުރި ޕޯސްޓުގައި ބުނެފައިވަނީ ރާއްޖޭގައި ފާލުބަލަން އުޅުނު ކަމުގެ ތުހުމަތުގައި އިންޑިއާގެ ތިން މީހަކު ހައްޔަރުކޮށްފައިވާ ކަމަށާއި މި ތިން މީހުން ހައްޔަރުކޮށްފައިވަނީ އިއްޔެ ފުލުހުންނާއި ގުޅިގެން ކުރިއަށް ގެންދިޔަ އޮޕަރޭޝަނެއްގައި ކަމަށެވެ.
މި މައްސަލައިގައި އިމިގްރޭޝަނުން ހައްޔަރުކޮށްފައިވަނީ އުމުރުން 18 އަހަރުގެ ދަނަންޖޭ ބައިލަޕަތީ، އުމުރުން 39 އަހަރުގެ ނާގަރާޖަ ބައިލަޕަތީގެ އިތުރުން އުމުރުން 25 އަހަރުގެ ސްރީހަރިވަނަމް އެވެ.
އިމިގްރޭޝަނުން ބުނީ މި ތިން މީހުން ތިބީ އިމިގްރޭޝަންގެ ބެލުމުގެ ދަށުގައި ކަމަށާއި އެ ތިން މީހުން ޑީޕޯޓު ކުރުމުގެ މަސައްކަތް ކުރަމުން އަންނަ ކަމަށެވެ.
އިންޑިއާ މީހަކު ރާއްޖެ އައިސް އަތް ބެލުމާއި ފާލުބެލުމުގެ ކަންކަން ކުރަމުންދާކަން އަންގައިދޭ އިސްތިހާރުތައް ސޯޝަލް މީޑިއާގައި އާއްމުވުމުން އެމައްސަލަ ބަލަމުންދާ ކަމަށް އިއްޔެ ފުލުހުން އޮތީ ބުނެފައެވެ.