ދުނިޔޭގެ ސިއްހަތު ދުވަހާ ގުޅިގެން އާންމުން ސިއްހަތަށް ހޭލުންތެރިކުރުމާ ގުޅޭ އާއިލީ ހަވީރެއް ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހުޅުމާލޭގައި ބާއްވައިފި އެވެ.
އެޗްޑީސީން ބުނީ ސިއްހަތު ދުވަހާ ގުޅިގެން ހުޅުމާލޭގައި ބޭއްވި އާއިލީ ހަވީރުގައި ސިއްހީ މައުލޫމާތު ދިނުމުގެ އިތުރަށް ހިލޭ ޑޮކްޓަރަށް ދައްކައި ބައެއް ކަހަލަ މެޑިކަލް ޓެސްޓު ހެދުމުގެ ހިދުމަތް ވެސް ދީފައިވާ ކަމަށެވެ. މާލެއާއި ހުޅުމާލޭގެ ގިނަ އަދަދެއްގެ އާންމުން އެ ހަވީރުގައި ބައިވެރިވެފައިވާއިރު، މިއަދުގެ ހަވީރަކީ މިހާތަނަށް ހުޅުމާލޭގައި އެޗްޑީސީން ބޭއްވި އެންމެ ބޮޑު އާއިލީ ހަވީރު ކަމަށް ވެސް އެ ކުންފުނިން ބުންޏެވެ.
ސެންޓްރަލް ޕާކުގައި މިއަދު އެޗްޑީސީން ބޭއްވި އާއިލީ ހަވީރުގައި އެގޮތުން ހުޅުމާލޭގައި އަލަށް ހުޅުވި ޓްރީ ޓޮޕްގެ ހެލްތް ޓީމަކާއި ހުޅުމާލޭ ހޮސްޕިޓަލްގެ ޓީމަކުން ވަނީ ސިއްހީ ހިދުމަތް ދީފަ އެވެ. އޭގެ ތެރޭގައި ކިޑްނީގެ ބަލިތަކާބެހޭ ޑޮކްޓަރުންނާއި ޑައެޓިޝަނުން ވެސް ހިމެނެ އެވެ. މީގެ އިތުރުންވެސް ރާއްޖޭގައި ސިއްހީ ހިދުމަތްދޭ ތަފާތު އެންޖީއޯތަކާއި އަމިއްލަ ކުންފުނިތަކުން ވެސް ވަނީ މިއަދުގެ ހަވީރުގައިބައިވެރިވެފަ އެވެ.
މި ހަރަކާތް ކުރިއަށް ގެންގޮސްފައިވަނީ މިއަދު ހަވީރު 4:00 އިން 6:00 އަށެވެ. ހަރަކާތް ރާވާފައިވަނީ ކުޑަކުދިންނާ ގުޅޭ ތަފާތު ކުޅިވަރު ހަރަކާތްތައް ވެސް ހިމަނައިގެންނެވެ.