ހއ. ތުރާކުނާއި މ. މުލަކުގެ އިންޖީނުގޭތަކުގައި ބޭނުންކުރާ ޖަނަރޭތަރުތަކަށް މައްސަލަ ދިމާވެ އެ ދެ ރަށުން ކަރަންޓްގެ ހިދުމަތް މެދުކެނޑިއްޖެ އެވެ.
އާބާދީގައި 600 އަށް ވުރެ ގިނަ މީހުން ދިރިއުޅޭ ތުރާކުނު ކައުންސިލްގެ ރައީސް އަލީ އަބުދުލްލަތީފް މިއަދު "ސަން" އަށް ވިދާޅުވީ މި މަހުގެ ހަ ވަނަ ދުވަހުން ފެށިގެން އެ ރަށުން ދޭތެރެ ދޭތެރެއިން ކަރަންޓް ކެނޑެމުން އަންނަ ކަމަށެވެ.
"ރައްޔިތުން ވަރަށް ބޮޑަށް ޝަކުވާ ކުރަމުންދަނީ، އަނެއްކާ ތަކެއްޗަށް ވެސް ގެއްލުން ލިބެމުންދަނީ، ހާއްސަކޮށް ސްކޫލާއި ސިއްހީ މަރުކަޒު ފަދަ ތަންތަނަށް ބޮޑެތި ދަތިތަކާއި ކުރިމަތިވޭ،" ލަތީފް ވިދާޅުވި އެވެ.
ފެނަކަ ކޯޕަރޭޝަންގެ ދަށުން ހިންގާ އެ ރަށު އިންޖީނުގެ އާއި ހަވާލާދީ އޭނާ ވިދާޅުވީ އެ މައްސަލަ ދިމާވަނީ އެ ރަށުގައި ބޭނުންކުރާ ތިން އިންޖީނުގެ ތެރެއިން އެއް އިންޖީނަށް ދިމާވި މައްސަލައަކާ ގުޅިގެން ކަމަށެވެ. އަދި އެ ރަށަށް މެދުނުކެނޑި ހިދުމަތް ދެވެން އަންނަނީ އިތުރު ޖަނަރޭޓަރެއް ލިބިގެން ކަމަށާއި ނަމަވެސް އެކަން ވާނެ ދުވަހެއް ބުނަން ނޭނގޭ ކަމަށް ލަތީފް ވިދާޅުވި އެވެ.
އާބާދީގައި 1600 މީހުން ދިރިއުޅޭ މ. މުލަކުގައި ހުންނަ ފެނަކަ އިންޖީނުގެ އާއި ހަވާލު ހުންނަ އަހުމަދު ސޮބާހު މިއަދު "ސަން" އަށް ވިދާޅުވީ އެ ރަށު އިންޖީނުގޭގައި ހުންނަ ތިން ޖަނަރޭޓަރުގެ ތެރެއިން އެކަތި ހަލާކުވުމުގެ ސަބަބުން އެރަށުން ކަރަންޓް ކެނޑޭތާ ދެ ދުވަސް ވެފައިވާ ކަމަށެވެ.
އޭނާ އިތުރަށް ވިދާޅުވީ ކަރަންޓްދިނުމަށް ދިމާވެފައިވާ މައްސަލަ ހައްލުކުރުމަށް މެދުނުކެނޑި މަސައްކަތް ކުރަމުންދާ ކަމަށާއި ނަމަވެސް ކަރަންޓް ދެވޭނެ ވަކި ވަގުތެއް އަދި ބުނަން ނޭނގޭ ކަމަށެވެ.
އެދެ ރަށުން ކަރަންޓް ކެނދުމުގެ މައްސަލަ ދިމާވެފައިވާ އިރު އަތޮޅުތެރޭ ގިނަ ރަށްރަށަށް ދަނީ އެ މައްސަލަ ދިމާވަމުންނެވެ.