ހުޅުމާލެ އާއި މާލެއާ ދެމެދު ބްރިޖު އެޅުމަށް ބައެއް ގައުމުތަކުގެ ސަރުކާރުތަކުންނާއި ބޭރު ގައުމުތަކުގެ ކުންފުނިތަކުން މިހާރު ވެސް ޝައުގުވެރިކަން ފާޅުކޮށްފައިވާ ކަމަށް ހައުސިން މިނިސްޓަރު ޑރ. މުހަންމަދު މުއިއްޒު މިއަދު ވިދާޅުވެއްޖެ އެވެ. "ހަވީރަ" ށް ދެއްވި އިންޓަވިއުއެއްގައި މިނިސްޓަރު ވިދާޅުވީ ބައެއް ގައުމުތަކުގެ ސަރުކާރުތަކުންނާއި ކުންފުނިތަކުން ބްރިޖު އަޅައިދޭން ޝައުގުވެރިވި ނަމަވެސް އޭގެ ތަފުސީލީ މަސައްކަތްތަކެއް އަދި ކުރިއަށް ނުގެންދާ ކަމަށެވެ. ބްރިޖު ޑިޒައިންކުރުމުގެ ފުރުސަތު މިހާރު ހުޅުވާލާފައިވާއިރު ބްރިޖު އަޅާނެ ފައިސާ ހޯދާނެ ގޮތަކާ މެދު އަދި ގޮތެއް ނުނިންމާ ކަމަށް ވެސް ހައުސިން މިނިސްޓަރު ވިދާޅުވި އެވެ. ބްރިޖު ޑިޒައިން ކޮށްދޭނެ ފަރާތެއް ހޯދުމުގެ ފުރުސަތު ސަރުކާރުން ހުޅުވާލުމުން އެކަމަށް އެދި 18 ފަރާތަކުން ހުށަހެޅި އެވެ. އަދި އޭގެ ތެރެއިން 10 ފަރާތެއް ޝޯޓް ލިސްޓުކޮށް ޑިޒައިން ތައްޔާރުކޮށް ހުށަހެޅުމަށް ހަވާލުކޮށްފައިވާ ކަމަށް ޑރ. މުއިއްޒު ވިދާޅުވި އެވެ. ޑިޒައިން ހުށަހެޅުމަށް ދީފައި ވަނީ ތިން މަސް ދުވަހުގެ މުއްދަތެވެ. "ޑިޒައިން ހުށަހެޅުމުން ފިނޭންސް މިނިސްޓްރީގެ ޓެންޑަ ބޯޑުން ބަލައި ގޮތްތަކެއް ނިންމާނީ. އެ އޮންނަ ޕްރޮސެސްގެ ތެރެއިން ކަންތައް ދާނީ،" މިނިސްޓަރު ވިދާޅުވި އެވެ. ހުޅުމާލެ އާއި މާލެއާ ދެމެދު ބްރިޖު އަޅައި އެއީ އަމަލީ މަސައްކަތަކަށް ހެދުމަށް ކިހާ ދުވަހެއް ނަގާނެތޯ ދެންނެވުމުން މިނިސްޓަރު ވިދާޅުވީ އެކަން އެނގޭނީ ފައިސާ ހޯދާނެ ގޮތެއް ޔަގީންވުމުން ކަމަށެވެ. "ވީހާ ވެސް އަވަހަކަށް މިކަން ކުރުން އަޅުގަނޑުމެންގެ ބޭނުމަކީ،" ޑރ. މުއިއްޒު ވިދާޅުވި އެވެ.