ގއ. ކޫއްޑޫގައި މިއަދު ހުޅުވި ކޫއްޑޫ އެއާޕޯޓުން ރާއްޖޭގެ ޓޫރިޒަމަށާއި އިގުތިސާދަށް ކުރިއެރުންތަކެއް ލިބޭނެ ކަމަށް ރައީސް މުހައްމަދު ވަހީދު ވިދާޅުވެއްޖެ އެވެ. އެއާޕޯޓް ހުޅުވުމަށް ކޫއްޑޫގައި އޮތް ރަސްމިއްޔާތުގައި ވާހަކަފުޅު ދައްކަވަމުން ރައީސް ވަހީދު ވިދާޅުވީ ކުރިން ރާއްޖެ މަޝްހޫރުވެފައި އޮތީ ބޯޓުފަހަރު ދުއްވުމުގެ ދާއިރާއިން ކަމަށް ވިޔަސް މިހާރު ރާއްޖޭގެ ޝައުގުވެރިކަން އޮތީ ވައިގެ ދަތުރުފަތުރަށް ކަމަށެވެ. އެއާޕޯޓް ހުޅުއްވައިދެއްވުމަށް ރައީސް ވަހީދުގެ ދެކަނބަލުން ކޫއްޑު އަށް ވަޑައިގަތުމުން ހޫނު މަރުހަބާއެއް ދެންނެވި އެވެ. މި ރަސްމިއްޔާތުގައި ބައެއް މިނިސްޓަރުންނާއި ސަރުކާރުގެ ކުންފުނިތަކާއި އަމިއްލަ ބައެއް ކުންފުނިތަކުގެ އިސް ވެރިން ބައިވެރިވެވަޑައިގަތެވެ. ރައީސް ވަހީދު ވިދާޅުވި ގޮތުގައި ކޫއްޑޫ އެއާޕޯޓަކީ ގއ. ރައްޔިތުންނަށް ލިބުނު ވަރަށް ބޮޑު ކާމިޔާބީއަކާއި ފަސޭހައެކެވެ. އަދި ސަރުކާރު ބޭނުންވަނީ ރައްޔިތުންނަށް ލުއިފަސޭހަ ގޮތްތައް ހޯދައިދީ ދަތުރުފަތުރުގެ ނިޒާމް ތަރައްގީކުރުން ކަމަށް ވެސް ވިދާޅުވި އެވެ. ރައީސް ވިދާޅުވީ މިއަދަކީ ހުވަދު އަތޮޅަށް ޚާއްޞަކޮށް، ގއ. ގެ ރައްޔިތުންނަށް ވަރަށް ބޮޑު އުފަލެއް ލިބުނު ދުވަހެއް ކަމަށެވެ. އަދި އެއާޕޯޓެއް ޤާއިމްކުރެވި، މިއަދު އެއާޕޯޓް ހުޅުވުނު ކަމަށްޓަކައި ގއ. ރައްޔިތުންނަށް އެމަނިކުފާނު ވަނީ ތަހުނިޔާ ވެސް ވިދާޅުވެފަ އެވެ. ރައީސް ވަހީދު ވިދާޅުވި ގޮތުގައި ވައިގެ ދަތުރުފަތުރުގެ އިންޑަސްޓްރީ ވާން ޖެހޭނީ ދިވެހި ޤައުމަށާއި، ދިވެހި ރައްޔިތުންނަށް ބޮޑު އާމްދަނީއެއް ލިއްބައިދޭ، ޤައުމުގެ އިޤްތިޞާދުގެ ވަރަށް މުހިންމު ޞިނާޢަތަކަށެވެ. މިކަމުގައި އަމިއްލަ ފަރާތްތަކާއި ސަރުކާރުގެ ވަރަށް ބޮޑު މަސްއޫލިއްޔަތެއް އެބަ އޮތް ކަމަށް ވެސް ރައީސް ވިދާޅުވި އެވެ. އެންމެ ހަތް މަސް ދުވަހުގެ ތެރޭގައި ކޫއްޑޫ އެއާޕޯޓް ތަރައްގީކުރީ ސިންގަޕޫރުގެ ވިޔަފާރިވެރިއެއްގެ ކުންފުންޏެއް ކަމަށްވާ ބޮނަވިސްޓާ މޯލްޑިވްސްގެ ފަރާތުންނެވެ. އެއާޕޯޓް ހެދުމުގެ މަސައްކަތްކުރީ ދިވެހި ކުންފުންޏެއް ކަމަށްވާ ކޭ.އެޗް.އޭ. ރިޒޯޓްސް އެންޑް ކޮންޓްރަކްޝަން ޕްރައިވެޓް ލިމިޓެޑުންނެވެ.