ޖީއެމްއާރުގެ މައްސަލަ ނިމިގެންދާނީ ރައްޔިތުން އެންމެ އެދޭ ގޮތަށް ކަމަށް ރައީސުލްޖުމްހޫރިއްޔާ މުހައްމަދު ވަހީދު މިއަދު ވިދާޅުވެފައިވާ ކަމަށް މަދަނީ އިއްތިހާދުން ބުނެފި އެވެ. އިބްރާހިމް ނާސިރު އިންޓަނޭޝަނަލް އެއާޕޯޓް (އައިއެންއައިއޭ) ހިންގާ އިންޑިއާގެ ޖީއެމްއާރު ކުންފުންޏާއި ދިވެހި ސަރުކާރާ ދެމެދު ސޮއިކޮށްފައިވާ އެއްބަސްވުން އުވާލުމަށް ގޮވާލައި މަދަނީ އިއްތިހާދުން ތައްޔާރުކުރި ޕެޓިޝަން ރައީސަށް މިއަދު ހުށަހެޅުމަށް ފަހު ނޫސްވެރިންނާ ބައްދަލުކުރައްވައި އެ އިއްތިހާދުގެ ނައިބު ރައީސް އަބްދުﷲ މުހައްމަދު ވިދާޅުވީ ރައީސްގެ ޖަވާބާ މެދު ހިތްހަމަޖެހިވަޑައިގަންނަވާ ކަމަށެވެ. އަދި އެގްރީމެންޓާ މެދު ވަކި ގޮތެއް ނުނިމި ގިނަ ދުވަސްތަކެއްވީ ގާނޫނީ ގޮތުން ބަލަން ޖެހޭ ކަންތައްތަކެއް ހުރުމުން ކަމަށާއި އެކަމަކު މިހާރު އެކަންތައްތައް ނިންމާފައިވާ ކަމަށް ރައީސް ވިދާޅުވެފައިވާ ކަމަށް އަބްދުﷲ ވިދާޅުވި އެވެ. "ރައީސް ވިދާޅުވި ގޮތުގައި މި މައްސަލައިގައި ގޮތެއް ނުނިމި ގިނަ ދުވަސްވެފައިވަނީ މި އެގްރީމެންޓަކީ ގާނޫނީ ގޮތުން ވަރަށް ގިނަ ހައްސާސްތަކެއް އެކުލެވޭ އެއްޗަކަށް ވެފައި ގާނޫނީ ގޮތުން ބަލަން ޖެހޭ ކަންތައްތަކެއް ހުރުމުން. އެކަމަކު ގާނޫނީ ގޮތުން ކުރަން ޖެހޭ ހުރިހާ ކަމެއް މިހާރު ނިމިފައިވާ ކަމަށް ވެސް އެމަނިކުފާނު ވިދާޅުވި،" ހޯމް މިނިސްޓްރީގެ ސްޓޭޓް މިނިސްޓަރު ކަމުގެ މަގާމުގައި ހުންނެވި އަބްދުﷲ ވިދާޅުވި އެވެ. އޭނާ ވިދާޅުވީ މި މައްސަލަ ވަރަށް އަވަހަށް ކެބިނެޓަށް ހުށަހަޅުއްވާނެ ކަމަށް ރައީސް ވިދާޅުވެފައިވާ ކަމަށެވެ. ޖީއެމްއާރާ ދެކޮޅަށް މަދަނީ އިއްތިހާދުން ކުރިއަށްގެންދާ ހަރަކާތްތަކުގެ ތެރެއިން ތައްޔާރު ކުރި ޕެޓިޝަނުގައި މާލެ އާއި ރަށްރަށުން ބައިލައްކައަށް ވުރެ ގިނަ މީހުން ސޮއިކޮށްފައިވާ ކަމަށް އެ ޖަމާއަތުން ކުރިން ވަނީ ބުނެފަ އެވެ. އަބްދުﷲ ވިދާޅުވި ގޮތުގައި މިއަދު ރައީސަށް ހުށަހެޅުއްވީ އޭގެ ތެރެއިން 35،000 ފޯމެވެ. "ރަށްރަށުގައި ވެސް 45 ހާހެއްހާ ފޯމު އެބަހުރި. އެ ފޯމުތައް އަޅުގަނޑުމެންނަށް ލިބުނުހާ އަވަހަކަށް އަންނަ ހަފުތާގައި އަނެއްކާ ވެސް ރައީސްއަށް ހުށަހަޅާނަން،" އަބްދުﷲ ވިދާޅުވި އެވެ. ޖީއެމްއާރާ ދެކޮޅަށް މަދަނީ އިއްތިހާދުން ހިންގާ ހަރަކާތްތައް ފުޅާކޮށްފައިވާ އިރު މާދަމާ ރޭ ވެސް "އެއާޕޯޓް ސައްލާ"ގެ ނަމުގައި އާޓިފިޝަލް ބީޗުގައި ހަރަކާތެއް ވަނީ ހިންގުމަށް ނިންމާފަ އެވެ.