ރިޝްވަތު ދިނުމާއި ރިޝްވަތު ހިފުމަކީ ނުބައިކަން ބޮޑު ވަބާއެއް ކަމަށާއި އެ ވަބާއިން އަޅުގަނޑުމެންގެ މުޖްތަމައު ސަލާމަތްކުރަން ވެއްޖެކަމުގައި ކުރީގެ ރައީސުލްޖުމްހޫރިއްޔާ އަލްއުސްތާޒް މައުމޫން ޢަބްދުލްޤައްޔޫމް ވިދާޅުވެއްޖެ އެވެ.
ރޭ އިސްލާމީ މަރުކަޒުގައި މައުމޫން ފައުންޑޭޝަންގެ ފަރާތުން ބޭއްވި ރަމަޟާން މަހުގެ ރޭތައް އިހްޔާކުރުމުގެ ތިން ވަނަ ޖަލްސާގައި ވާހަކަފުޅު ދައްކަވަމުން މައުމޫން ވިދާޅުވީ ރިޝްވަތު ދިނުމާއި ރިޝްވަތު ހިފުމަކީ ކީރިތި ޤުރްއާނުގައި މާތް ﷲ ނަހީ ކުރައްވާފައިވާ މީސްތަކުންގެ މުދާތައް ބާތިލުގޮތުގައި ކެއުމުގެ ތެރޭގައި ހިމެނޭ ވަރަށް ބޮޑު ފާފައެއް ކަމަށެވެ. އަދި ކީރިތި ރަސޫލާ ރިޝްވަތުދޭ މީހާއަށާއި ރިޝްވަތު ހިފާ މީހާ އަށް ލަޢްނަތް ލައްވާފައިވާ ކަމަށް ވިދާޅުވި އެވެ.
އަދި އެނުބައިކަން ބޮޑު ވަބާ އެއްވެސް ތަނެއްގައި ފެތުރިއްޖެ ނަމަ އެތަނެއް ހަލާކުގެ ތެރެއަށް ވެއްޓިގެންދާނެ ކަމަށް އެމަނިކުފާނު ވިދާޅުވި އެވެ.
"ކީރިތި ޤުރްއާނުގެ އަލީގައި މުދަލާއި ފައިސ" މި މައުޟޫއުގެ މައްޗަށް ވާހަކަފުޅު ދައްކަވަމުން، މުދަލާއި ފައިސާއަކީ މާތް ﷲ ދެއްވާ ވަރަށް ބޮޑު ނިޢުމަތެއް ކަމަށާއި އެ ނިޢުމަތުގެ ބޭނުންކުރަން ޖެހޭނީ ހެޔޮގޮތުގައި ކަމަށް ރައީސް މައުމޫން ވިދާޅުވި އެވެ.
ކީރިތި ޤުރްއާނުގެ ވަރަށް ގިނަ އާޔަތްތަކެއްގައި މުދަލުގެ ވާހަކަ ބަޔާން ކުރައްވާފައިވާ ކަމަށް ވިދާޅުވެ، ރައީސް މައުމޫން ވިދާޅުވީ އެ އާޔަތްތަކުން އެނގޭ ގޮތުގައި ހުރިހާ މުދަލެއްގެ ވެސް ހަގީގީ ވެރިފަރާތަކީ މާތް ﷲ ކަމަށެވެ. އަދި އެކިއެކި މީސް މީހުންގެ އަތުގައި ހުންނަ މުދަލާއި ފައިސާއަކީ ވަކި ހަމަތަކަކާއި އުސޫލުތަކެއްގެ މަތިން ހޭދަކުރުމަށް މާތް ﷲ އެމީހުންނާ ހަވާލުކުރައްވާފައިވާ އެއްޗެއް ކަމަށެވެ.
ކީރިތި ޤުރްއާނުން އެނގޭ ގޮތުގައި މުދާ ހޭދަކުރަން ވާނީ މިދުނިޔޭގައި ކަރާމަތްތެރި ދިރިއުޅުމެއް ހޯދުމަށާއި އެކިއެކި ސަބަބުތަކަށްޓަކައި އެހީއަށް ބޭނުންވެފައިވާ މީހުންނަށް އެހީވެދިނުމަށާއި ގިނަ ބަޔަކަށް ދެމިހުންނަނިވި ފައިދާއެއް ކުރާނެ ކަންކަމަށާއި ޤައުމަށް ތަރައްޤީ އާއި އުފާފާގަތިކަން ހޯދައިދިނުމަށް ކަމަށް ރައީސް މަޢުމޫން ވިދާޅުވި އެވެ. އަދި އިސްލާމީ އުންމަތަކީ މީސްތަކުންގެ ކުރިމަތީގައި ޢިއްޒަތާއި ޤަދަރު ލިބިފައިވާ މިނިވަން އުންމަތެއްގެ ގޮތުގައި ދެމިއޮތުމަށް ބޭނުންވާ މިންވަރަށް އިޤްތިސާދީ ތަނަވަސްކަމާއި ޢިލްމާއި ހުނަރު ހޯދުމަކީ އިސްލާމީ އުންމަތުގެ ވާޖިބެއް ކަމުގައި ވެސް އެމަނިކުފާނު ވިދާޅުވި އެވެ.
ރޭގެ ޖަލްސާގައި "އަލުން ބަދުރު ހަނގުރާމަ އިޢާދަ ކުރެވިދާނެތަ؟" މި މައުޟޫޢުގެ މައްޗަށް ވާހަކަފުޅު ދައްކަވަމުން ޑރ. އަފްރާޝީމް ޢަލީ ވިދާޅުވި ގޮތުގައި ބަދުރު ހަނގުރާމައިން ލިބޭ ޢިބްރަތްތަކާއި ފިލާވަޅުތަކަކީ އޭގެ ބޭނުން ކޮށްފި ނަމަ އަބަދުވެސް މުސްލިމުންނަށް ހުރިހާ ރޮނގެއްގައި ވެސް ނަސްރާއި ކާމިޔާބީ ކަށަވަރުކޮށްދޭނެ ކަމެއް ކަމަށް ވިދާޅުވި އެވެ. އަދި ބަދުރު ހަނގުރާމައިން ދަސްކޮށްދޭ އެންމެ މުހިންމު ދެ ފިލާވަޅަކީ މާތް ﷲ ނޫން އެހެން ފަރާތަކުން ވާގިވެރިކަމާއި އެހީތެރިކަމަށް ނޭދުމާއި ނަސްރު ލިބޭނީ ﷲ ގެ ޙަޟްރަތުގައި ދުޢާ ދެންނެވުމާ އެކު އެކަމަށް ވަރުގަދަ އަޒުމަކާ އެކު ކެނޑިނޭޅި މަސައްކަތް ކުރުމުން ކަމަށް ވިދާޅުވި އެވެ.
ރަމަޟާން މަހުގެ ރޭތައް އިޙްޔާކޮށް ދިރުވުމަށް މައުމޫން ފައުންޑޭޝަނުން ހިންގަވާ ޕްރޮގްރާމުގެ 4 ވަނަ އަދި އެންމެ ފަހު ޖަލްސާ އޮންނާނީ މި ރަމަޟާން މަހުގެ 24 ވާ ބުދަ ދުވަހުގެ ރޭ އިސްލާމީ މަރުކަޒުގަ އެވެ.