ހއ. އަތޮޅުގެ ވެރިކަން ކުރާ ދިއްދޫ އަށް ގޭސް ވިއްކުން ފެނަކާއިން ހުއްޓާލުމުން އެރަށުގެ ރައްޔިތުން ކެއްކުމަށް ދަރު އުދުނާއި ތެޔޮ އުދުން ބޭނުން ކުރަން ފަށައިފިއެވެ.
އެރަށު ކައުންސިލުން ބުނި ގޮތުގައި ރަށަށް ގޭހުގެ ދަތިކަން ކުރިމަތި ވެފައިވާތާ މިހާރު ތިން ދުވަސް ވެއްޖެއެވެ. އަދި އެރަށުގައި 821 ގެ އެއްގައި 4000 އަށް ވުރެ ގިނަ މީހުން ދިރިއުޅެމުން އަންނަ އިރު ގިނަ ގެތަކުގައި މި ތިން ދުވަހު ބޭނުން ކުރަމުން އަންނަނީ ތެޔޮ އުދުނާއި ދަރު އުދުން ކަމަށްވެސް ކައުންސިލުން މައުލޫމާތު ދެއެވެ.
ފެނަކައިން ބުނެފައި ވަނީ، ދިއްދޫގައި ގޭސް ވިއްކުން ހުއްޓަލަނީ ވިޔަފާރީގައި ގެއްލުން ލިބެމުން ދާތީ ކަމާށެވެ.
ކައުންސިލްގެ ރައީސް އިބްރާހީމް ސިނާން ވިދާޅުވީ އެރަށަށް ގޭހުގެ ދަތިކަން ކުރިމަތިވެފައިވަނީ ފެނަކަ ކޯޕަރޭޝަނުން އެރަށަށް ގޭސް ވިއްކުމުގެ ވިޔަފާރި ކުރަމުން އައިސް އެކަން ހުއްޓާލުމާއި ގުޅިގެން ކަމަށެވެ. ފެނަކަގެ އިތުރުން އެރަށުގައި ގޭސް ވިއްކާ އަމިއްލަ ފަރާތުގެ ސްޓޮކްގައި ވެސް މިހާރު ހުރީ 100 އެއްހާ ފުޅި ކަމަށް އޭނާ ވިދާޅުވިއެވެ.
އޭނާ ވިދާޅުވީ ދިއްދޫގައި ގޭހުގެ ހިދުމަތް ދިނުން ހުއްޓާލާނެކަން މިދިޔަ މަހުގެ 14 ވަނަ ދުވަހު ފެނަކަ އިން އާންމު އިއުލާނެއް ކޮށްފައިވާ ކަމަށެވެ. އެ އިއުލާނުގައި ބުނެފައި ވަނީ ސްޓޮކް ހުސްވުމުން ހިދުމަތް ހުއްޓާލާނެ ކަމަށެވެ.
ސިނާނު ވިދާޅުވި ގޮތުގައި ގޭހުގެ ދަތިކަން ހައްލުކޮށްދިނުމަށް މަސައްކަތްތަކެއް ކައުންސިލުން ވެސް ދަނީ ކުރަމުންނެވެ، ނަމަވެސް އެކަމަށް އަދި ހައްލެއް ލިބުމުގެ އިތުރުން އަލިމަގެއް ވެސް ފެނިފައިނުވާކަމަށް އޭނާ ވިދާޅުވިއެވެ.