ރ. އަލިފުއްޓަށް ދިމާވެފައިވާ ކަރަންޓުގެ މައްސަލައަށް އަދިވެސް ދާއިމީ ހައްލެއް ލިބިފައި ނުވާ ކަމަށް އެރަށު ކައުންސިލުން ބުނެފި އެވެ.
ވީނިއުސް އަށް މިއަދު މައުލޫމާތު ދެއްވަމުން އަލިފުށީ ކައުންސިލް މެމްބަރު އާދަމް ޒަހީން ވިދާޅުވީ މިދިޔަ އަންގާރަ ދުވަހު އަލިފުށިން ކަރަންޓު ކަނޑައިގެން ދިޔަފަހުން އަދިވެސް މުޅިން ކަރަންޓުގެ މައްސަލަ ހައްލުނުވާ ކަމަށެވެ.
ޒަހީން ވިދާޅުވީ ރޭ މެންދަމް 12:00 ހާއިރު ކަރަންޓު ލިބުނު ނަމަވެސް އަނެއްކާވެސް މިއަދު ހެނދުނު ކަރަންޓު ކަނޑައިގެން ދިޔަފަހުން އަދިވެސް ކަރަންޓު ނުލިބޭ ކަމަށެވެ.
ޒަހީން ވިދާޅުވީ ފެނަކައިގެ ބޭފުޅުން ކަރަންޓުގެ މައްސަލަ ހައްލުކުރުމަށް މިހާރުވެސް މަސައްކަތް ކުރަމުންގެންދާ ކަމަށެވެ. އަދި ވަރަށް އަވަހަށް ކަރަންޓު ލިބޭނެ ކަމަށް ފެނަކައިން ބުނާ ކަމަށްވެސް ޒަހީން ވިދާޅުވި އެވެ.
އަލިފުށީގައި ހުންނަ ފެނަކައިގެ އިންޖީނުގެއާ މިވަގުތު ހަވާލުވެ ހުންނެވި ސުޕަވައިޒަރު އާދަމް އަޝްރަފް ވިދާޅުވީ އަލިފުއްޓަށް ކަރަންޓު ދިނުމުގެ މަސައްކަތް ހުއްޓުމެއް ނެތި ކުރަމުންދާ ކަމަށެވެ.
މިހާރު ކުރަމުން ދަނީ އަލަށް ގެނައި ޖަނަރޭޓަރު ގުޅާ ޓެސްޓު ކުރުމުގެ މަސައްކަތް ކަމަށާއި ޖަނަރޭޓަރު ޓެސްޓް ކުރަމުންދާއިރު ކަރަންޓު ކެނޑިގެން ދިއުމަކީ ވެދާނެ ކަމެއް ކަަމަށްވެސް އަޝްރަފް ވިދާޅުވި އެވެ. އެކަމަކު ވީހާވެސް އަވަހަށް ކަރަންޓު ދިނުމަށް މަސައްކަތް ކުރަމުންދާ ކަމަށްވެސް ވިދާޅުވި އެވެ.
އަލިފުށީގެ ކަރަންޓްގެ މައްސަލަ އަށް ހައްލެއް ނުލިބި ގިނަ ދުވަސް ވާތީ އެރަށުގެ ރައްޔިތުން ގެންދަނީ އެކަމާ ދެކޮޅަށް އަޑުއުފުލާ ކަންބޮޑުވުން ފާޅުކުރަމުންނެވެ.
އެގޮތުން އެރަށުގައި ކަރަންޓް ހިދުމަތްދޭ ފެނަކަ އޮފީސް ކައިރިއަށް މިދިޔަ އަންގާރަ ދުވަހުގެ ރޭ ގިނަ ބަޔަކު ޖަމާވެ އެރަށަށް 24 ގަޑިއިރު ކަރަންޓް ޔަގީންކޮށްދިނުމަށް ގޮވާލާފައިވެެސް ވެއެވެ.