ބޮޑުއީދު ކުޅިވަރެއްގެ ގޮތުގައި އަލަށް ނެރެން ފެށި 'ފަންމާލި' ކުޅިވަރުގައި ބައިވެރިވާން ބޭނުންވާ ފަރާތްތަކަށް ފުރުސަތު ހުޅުވާލައިފި އެވެ.
މި ހަރަކާތް އިންތިޒާމުކޮށް ނެރެންފެށީ މިދިޔަ އަހަރުގެ ބޮޑުއީދުގަ އެވެ. 'ދައްސޫރަ' ބޮޑުބެރު ގުރޫފުން އިންތިޒާމުކުރި މިހަރަކާތަށް ގިނަ ބައެއްގެ ސަމާލުކަން ލިބިގެންދިޔަ އެވެ.
ފަނާއި ކެޔޮފަތް ފަދަ ތަކެތިން ވިޔެ ނެރުނު މި މާލި ހިނގާލުން މިއަހަރުގެ ބޮޑުއީދުގައިވެސް ބާއްވަން އަންނަނީ މަސައްކަތްކުރަމުންނެވެ.
އެގޮތުން މިކަމުގައި އަމަލީގޮތުން ބައިވެރިވާން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާކަން އެ ގުރޫޕުން ވަނީ ހާމަކޮށްފަ އެވެ. އަދި މާލި ހިނގާލުން ސްޕޮންސަރ ކުރުމުގެ ފުރުސަތުވެސް އޮތީ ހުޅުވާލާފަ އެވެ.
މިހަރަކާތުގައި ބައިވެރިވާން ބޭނުންވާ ފަރާތްތަކުން ނަމާއި އައިޑީކާޑް ނަންބަރު އަދި ފޯނު ނަންބަރު ޖަހައި 7685911 ނަންބަރަށް ވައިބާކޮށް ނަންނޯޓްކުރުމަށް ވަނީ އެދިފަ އެވެ.
ކޮންމެ އަހަރެއްގައި ބޮޑުއީދުގައި ކުޅުދުއްފުށީގައި އަންނަނީ ގިނަ ކުޅިވަރުތަކެއް ކުޅެމުންނެވެ. އޭގެ ތެރޭގައި ތަފާތު މާލި ޕެރޭޑްތަކާއި ސަގާފީ ކުޅިވަރުތަކުގެ އިތުރުން ސްޓޭޖް ޝޯ ކޮންމެ އަހަރަކުވެސް ބާއްވަ އެވެ.