މިއީ ރައީސް ޑރ. މުހައްމަދު މުއިއްޒުގެ ސަރުކާރުގައި ރާއްޖޭން ބައިނަލްއަގްވާމީ އިންތިހާބެއްގައި ބައިވެރިވެ، ހޮވުނު ފުރަތަމަ ފަހަރެވެ.
އދ.ގެ އިކޮނޮމިކް އެންޑް ސޯޝަލް ކައުންސިލް (އިކޮސޮކް)ގެ ދަށުން އުފައްދާފައިވާ ކޮމިޝަން އޮން ދަ ސްޓޭޓަސް އޮފް ވިމެން ގެ 2026-2030 ދައުރުގެ އޭޝިއާ ޕެސިފިކް ގްރޫޕަށް ފަސް މެމްބަރުން އިންތިހުބުކުރުމަށް ރޭ އެމެރިކާގެ ނިއު ޔޯކްގައި ބޭއްވުނު އިންތިހާބުގައި ފުރަތަމަ ފަހަރަށް އެ ކޮމިޝަނަށް ރާއްޖެ ހޮވިއްޖެ އެވެ. ފޮރިން މިނިސްޓްރީން ބުނީ، މި ކާމިޔާބީ ރަމްޒުކޮށްދެނީ މިންތީގެ ހަމަހަމަކަމަށާއި އަންހެނުން ބާރުވެރި ކުރުމަށް ރާއްޖޭން ދޭ އަހަންމިއްޔަތުކަން ކަމަށެވެ. ރާއްޖޭގެ އިތުރުން ގަތަރު، ޖަޕާން، ޗައިނާ އަދި މޮންގޯލިއާ ވަނީ މި ކޮމިޝަނަށް ހޮވިފަ އެވެ.
މިއީ ރައީސް ޑރ. މުހައްމަދު މުއިއްޒުގެ ސަރުކާރުގައި ރާއްޖޭން ބައިނަލްއަގްވާމީ އިންތިހާބެއްގައި ބައިވެރިވެ، ހޮވުނު ފުރަތަމަ ފަހަރެވެ. މި ކޮމިޝަނަކީ ސިޔާސީ، އިގްތިސާދީ، އިޖްތިމާއީ އަދި ތައުލީމީ ދާއިރާތަކުގައި އަންހެނުންގެ ހައްގުތައް ކުރިއެރުވުގެ މަގްސަދުގައި އުފައްދާފައިވާ ކޮމިޝަނެކެވެ. ރާއްޖޭން މި ކޮމިޝަންގެ މެމްބަރެއްގެ ހައިސިއްޔަތުން ކޮމިޝަންގެ މަސައްކަތްތަކުގައި މާނަހުރި ގޮތެއްގައި ބައިވެރިވެ އެހީތެރިކަން ފޯރުކޮށްދީ، އަންހެނުންގެ ހައްގުތަކާއި ބާރުވެރިކުރުވުމާ ގުޅުންހުރި ކަންކަމުގައި އިކޮސޮކް އަށް ލަފާ ދިނުމުގައި މަސައްކަތް ކުރާނެކަމަށް ފޮރިން މިނިސްޓްރީން ބުންޏެވެ.އަދި އަންހެނުންގެ ހައްގުތައް ކުރިއެރުވުމަށާއި ހިމާޔަތްކުރުމަށް މި ސަރުކާރުން ދޭ އިސްކަން ހާމަކޮށް ކުރެވެމުންދާ މަސައްކަތްތައް ހިއްސާކުރާނެ ކަމަށް ވެސް ބުނެފައިވެ އެވެ.
ރާއްޖޭން މިހާތަނަށް ވަނީ ބައިނަލްއަގުވާމީ އަދި ގައުމީ ފެންވަރުގައި މިންތީގެ ހަމަހަމަކަން ކުރިއެރުވުމުގައި ގިނަ ކުރިއެރުންތަކެއް ހޯދާފަ އެވެ. އެގޮތުން އަންހެނުންގެ ހައްގުތައް ރައްކާތެރިކުރުމަށް ގޮވާލައި އެކި ފެންވަރުގެ ސިޔާސަތުތައް އެކުލަވާލައި، ހުރިހާ ދާއިރާއެއްގައިވެސް އަންހެނުންގެ އިސްނެންގެވުމާއި ބައިވެރިވުން އިތުރުކުރުމަށް އެކި މަސައްކަތްތައް ދަނީ ކުރެވެމުންނެވެ.
ކޮމިޝަން އޮން ދަ ސްޓޭޓަސް އޮފް ވިމެންއަކީ މިންތީގެ ހަމަހަމަކަމާއި އަންހެނުންގެ ހައްގުތަކާއި ކުރިއެރުވުމަށް އެއްބާރުލުންދިނުމުގެ ގޮތުން އުފައްދާފައިވާ މައިގަނޑު ބައިނަލްއަގުވާމީ ކޮމިޝަންއެވެ. މި ކޮމިޝަން އުފެދިފައިވަނީ 1946 ވަނަ އަހަރުގެ ޖޫން މަހު އދ.ގެ އިިކޮސޮކް ގައި ފާސްކުރި ގަރާރުގެ ދަށުންނެވެ.
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ