މެދުއިރުމަތީގައި މިހާރު ކުރަމުން އަންނަ ހަނގުރާމައާ ގުޅިގެން ދިވެހި އުމްރާވެރިއަކަށް ކަމެއް ދިމާވެއްޖެނަމަ ގުޅާނެ ހޮޓްލައިނެއް ހަމަޖައްސައިފިއެވެ. އެމެރިކާއާއި އިޒްރޭލުން ގުޅިގެން އީރާނަށް ދިން ވަރުގަދަ ހަމަލާގެ ބަދަލު ހިފުމުގެ ގޮތުން އީރާނުން ވަނީ ގަލްފުގެ (އަރަބި) ގައުމުތަކުގައި ހުރި އެމެރިކާގެ އެސެޓްތަކަށް ހަމަލާ ދީފައެވެ. އޭގެ ތެރޭގައި ސައުދީ ވެސް ހިމެނެއެވެ. މިގޮތުން، އުމްރާވެރިއަކަށް ކަމެއް ދިމާވެއްޖެ ނަމަ ގުޅުމަށް އިސްލާމިކް މިނިސްޓްރީން ހަމަޖައްސާފައިވާ ހޮޓްލައިން ނަމްބަރަކީ، 3007070އެވެ. ދިވެހި ރާއްޖެއިން ބޭރުން ގުޅާނަމަ، 3007070(960)+އެވެ. އެ މިނިސްޓްރީން ވަނީ، ރާއްޖޭން އުމްރާގެ އަޅުކަން އަދާކުރުމަށް ދަތުރުކުރާ މީހުންނާއި މިހާރު މައްކާގައި ތިބި މީހުންނަށް ކަމެއް ދިމާވެއްޖެނަމަ، އެ ހޮޓްލައިންތަކަށް ގުޅައި ރިޕޯޓުކުރަން އެދިފައެވެ. ފާހަގަކުރެވޭ ގޮތުގައި، އިސްރާއީލުން އީރާނަށް ހަމަލާ ދިނުމުގެ ސަބަބުން މެދުއިރުމަތީގެ މަސްރަހު ހޫނުވެ، މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ވަނީ ވަގުތީ ގޮތުން ބަންދުކޮށްފައެވެ. މީގެ ސަބަބުން ސަޢޫދީ ހިމެނޭހެން އެ ސަރަހައްދުގެ ގިނަ ގައުމުތަކެއްގެ ވައިގެ ދަތުރުތަކަށް ވަނީ ބަދަލުތަކެއް ގެންނަން ޖެހިފައެވެ.