ކްލިނިކަލް ހީމަޓޮލޮޖީ ނުވަތަ ލޭގެ ބަލިތަކަށް ޚާއްސަވި ފުރަތަމަ ދިވެހި ޑޮކްޓަރު، ޑރ. ޒީނާ މުޙައްމަދު ފުއާދު، ކޮންސަލްޓަންޓް ސަބް-ސްޕެޝަލިސްޓެއްގެ ގޮތުގައި އައިޖީއެމްއެޗްގައި ޚިދުމަތް ދެއްވަން ފަށްޓަވައިފިއެވެ. އައިޖީއެމްއެޗް އިން މިއަދު ކުރި ޕޯސްޓެއްގައި ބުނީ ލޭގެ ބަލިތަކަށް ޚާއްސަ ދާއިރާއިން ޑރ. ޒީނާ ހޯއްދެވި ކާމިޔާބީއަކީ ރާއްޖޭގެ ސިއްހީ ދާއިރާއަށް ލިބުނު ބޮޑު ކުރިއެރުމެއް ކަމަށެވެ. އޭނާގެ ތަޖުރިބާގެ ސަބަބުން ލޭގެ އެކި ބަލިތަކަށް ފަރުވާ ހޯދާ ބަލިމީހުންނަށާއި މުޅި މުޖުތަމައަށް ބޮޑެތި ފައިދާތަކެއް ކުރާނެ ކަމަށް އައިޖީއެމްއެޗް އިން ބުންޏެވެ. https://x.com/igmhmv/status/2056691378235838722 ޑރ. ޒީނާ ޓީމާ ގުޅިވަޑައިގަތުމާ ގުޅިގެން، އެ ހޮސްޕިޓަލުން ވަނީ އޭނާއަށް ހޫނު މަރުހަބާއެއް ކިޔާފައެވެ. އަދި މިއީ ރާއްޖޭގައި މިފަދަ މުހިންމު ދާއިރާތަކުން ދިވެހި ފަންނުވެރިން ބިނާވަމުންދާކަމުގެ އުއްމީދީ ނިޝާނެއް ކަމަށް އައިޖީއެމްއެޗް އިން ބުންޏެވެ. ޑރ. ޒީނާއަށް އެޕޮއިންޓްމަންޓް ބޭނުން ނަމަ، 3335335 އަށް ގުޅުމަށް އައިޖީއެމްއެޗުން ވަނީ އެދިފައެވެ. ހީމަޓޮލޮޖީއަކީ ލޭގެ ބައިތަކާއި، ލޭ އުފައްދާ ގުނަވަންތަކާއި، އަދި ލޭގެ ބަލިތަކާ ބެހޭގޮތުން ދިރާސާކުރާ ބޭސްވެރިކަމުގެ އަދި ބަޔޮލޮޖީގެ ދާއިރާއެކެވެ. މީގެ ތެރޭގައި ލޭމަދުވުން ފަދަ އާންމު ބަލިތަކުން ފެށިގެން، ކެންސަރު ފަދަ ނުރައްކާތެރި ބަލިތައް ދެނެގަތުމާއި، ފަރުވާކުރުން އަދި ބަލިތަކުން ރައްކާތެރިވުން ހިމެނެއެވެ.