ވެލާނާ އިންޓަނޭޝަލް އެއާޕޯޓުން މިރޭ އެއް ގަޑިއިރަށް ކަރަންޓް ކަނޑާލަން ހަމަޖެހިފައިވާ ކަމަށް އެ ތަން ހިންގާ މޯލްޑިވްސް އެއާޕޯޓު ކޮމްޕެނީ ޕްރައިވެޓް ލިމިޑެޓް (އެމްއޭސީއެލް) އިން ބުނެފި އެވެ.
ތަފްސީލް - އެމްއޭސީއެލްއިން ކުރި ޓްވީޓެއްގައި ބުނިގޮތުގައި ކަރަންޓް ކަނޑާލާނީ މިރޭ ދަންވަރު 1 އިން 2 އަށެވެ.
ވީ ކިހިނެއް؟ - އެ ކުންފުނިން ބުނީ، ކަރަންޓް ކަނޑާލަނީ ސްޓެލްކޯއާ ގުޅިގެން "ޕަވާ ސިންކްރޮނައިޒޭޝަން" ހަރަކާތެއް ހިންގުމަށް ކަމަށެވެ. އެއީ އެއާޕޯޓު ގްރޭޓާ މާލޭ ކަރަންޓް ވިއުގައާ ގުޅުވާލުމަށް ހިންގާ ހަރަކާތެކެވެ.
އެނގުން މުހިންމު - ރާއްޖޭގެ މައި އެއާޕޯޓުގެ ފްލައިޓް ޝެޑިއުލްއަށް ބަލާއިރު މިރޭ އެންމެ ފަހުން ފުރާނީ 11:40ގައި މާލެއިން ފުރައިގެން ދުބާއީއަށް ދާ ފްލައި ދުބާއީގެ ފްލައިޓެވެ. އެއަށް ފަހު އެއާޕޯޓުން އެންމެ އަަވަހަށް ފުރާނީ މާދަމާ ހެނދުނު 6:25ގައި މާލެއިން ފުރައިގެން ފުވައްމުލަކަށް ދާ މޯލްޑިވިއަންގެ ފްލައިޓެވެ. އަދި މިރޭ ވެލާނާ އެއާޕޯޓަށް ޖައްސާނެ ފަހު ފްލައިޓަކީ 11:50ގައި ފުވައްމުލަކުން މާލެ އަންނަ ފްލައިޓެވެ. އެއަށް ފަހު އެންމެ އަވަހަށް ޖައްސާނީ ބަހްރެއިންއިން ހެނދުނު 6:05ގައި އަންނަ ފްލައިޓެކެވެ.
މުޅި އެއާޕޯޓުން ކަރަންޓް ކަނޑާލަން ހަމަޖެހިފައިވާއިރު، އެ ކަމާ ގުޅިގެން ދިމާވެދާނެ ދަތިތަކަށް އެމްއޭސީއެލްގެ ޓްވީޓްގައި މައާފަށް އެދިފައިވެ އެވެ.